Karnataka Budget 2023: ರಾಮನಗರ ಅಭಿವೃದ್ದಿಗೆ ಸಿಗುವುದೇ ವೇಗ?

ರಾಮನಗರ: ಕಾಂಗ್ರೆಸ್ ನೇತೃತ್ವದ ನೂತನ ಸರ್ಕಾರದ ಸಾರಥಿ ಮುಖ್ಯಮಂತ್ರಿ ಸಿದ್ಧರಾಮಯ್ಯ ಅವರು ಜುಲೈ 7ರಂದು ಬಜೆಟ್ ಮಂಡಿಸಲಿರುವ ಬಜೆಟ್‌ನಲ್ಲಿ ರಾಮನಗರ ಜಿಲ್ಲೆಗೆ ಏನೇನು ಸಿಗಬಹುದು ಎಂಬ ಲೆಕ್ಕಾಚಾರ ಜೋರಾಗಿದೆ.

ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಇದೇ ಜಿಲ್ಲೆಯವರಾಗಿರುವುದರಿಂದ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ರಾಮಲಿಂಗಾ ರೆಡ್ಡಿ ಅವರು ಪಕ್ಕದ ಬೆಂಗಳೂರಿನವರೇ ಆಗಿರುವುದರಿಂದ ಅಭಿವೃದ್ಧಿಯ ನಿರೀಕ್ಷೆಯ ಭಾರ ಹೆಚ್ಚಾಗಿದೆ.

ಈಗಾಗಲೇ ಘೋಷಣೆಯಾಗಿ ಪೇಪರ್‌ನಲ್ಲಿ ಮಾತ್ರವೇ ಉಳಿದಿರುವ ಅಭಿವೃದ್ಧಿ ಯೋಜನೆಗಳಿಗೆ ಮರುಜೀವ ಕೊಡುವರೇ? ತೆವಳುತ್ತಿರುವ ಯೋಜನೆಗಳಿಗೆ ತ್ವರಿತಗತಿಯ ಬೂಸ್ಟ್ ಸಿಗುವುದೇ? ರಾಜಧಾನಿ ಪಕ್ಕದಲ್ಲಿರುವ ಜಿಲ್ಲೆಗೆ ಹೊಸ ಯೋಜನೆಗಳನ್ನು ಘೋಷಿಸಿ, ಅಭಿವೃದ್ಧಿಯಲ್ಲಿ ಮೇಲ್ದರ್ಜೆಗೇರಿಸಲಾಗುವುದೇ... ಹೀಗೆ ಹಲವು ಲೆಕ್ಕಾಚಾರಗಳು ಜಿಲ್ಲೆಯ ಜನರ ತಲೆಯಲ್ಲಿ ಹರಿದಾಡುತ್ತಿವೆ.

ಮೇಕೆದಾಟು ಸಾಕಾರವಾಗಲಿ: ‘ಡಿಸಿಎಂ ಅವರೇ ಹೆಚ್ಚು ಆಸ್ಥೆ ವಹಿಸಿದ್ದ ಮೇಕೆದಾಟು ಅಣೆಕಟ್ಟೆ ಯೋಜನೆ ಅವರ ಸರ್ಕಾರದ ಅವಧಿಯಲ್ಲೇ ಸಾಕಾರವಾಗಬೇಕು ಎಂಬುದು ಜನರ ಬಯಕೆ. ಅದಕ್ಕೆ, ಬಜೆಟ್‌ನಲ್ಲಿ ಮತ್ತಷ್ಟು ಮೊತ್ತ ತೆಗೆದಿರಿಸಿ ಯೋಜನೆಗೆ ಚಾಲನೆ ನೀಡುವ ಕೆಲಸವಾಗಬೇಕು’ ಎಂದು ರೈತರ ಕೆಂಚೇಗೌಡ ಅಭಿಪ್ರಾಯಪಟ್ಟರು.

ಬೇಕು ಸುಸಜ್ಜಿತ ಬಸ್ ನಿಲ್ದಾಣ: ‘ಜಿಲ್ಲಾ ಕೇಂದ್ರವಾದರೂ ರಾಮನಗರದಲ್ಲಿ ಸುಸಜ್ಜಿತ ಬಸ್ ನಿಲ್ದಾಣವಿಲ್ಲ. ಏಳೆಂಟು ಬಸ್‌ಗಳು ಸಹ ನಿಲ್ಲುವಷ್ಟು ಜಾಗವಿಲ್ಲ. ಬೆಂಗಳೂರು ಕಡೆಯಿಂದ ಬರುವ ಬಸ್‌ಗಳು ನಿಲ್ದಾಣ ಪ್ರವೇಶಿಸುವುದೇ ಇಲ್ಲ. ವಿವಿಧ ಊರುಗಳಿಗೆ ಇಲ್ಲಿಂದ ನೇರ ಬಸ್‌ಗಳಿಲ್ಲ. ಹಾಗಾಗಿ, ಬಸ್ ನಿಲ್ದಾಣದ ಸಂಕೀರ್ಣ ನಿರ್ಮಿಸಬೇಕು’ ಎಂದು ಸಾಮಾಜಿಕ ಕಾರ್ಯಕರ್ತ ಲೋಕೇಶ್ ಆಗ್ರಹಿಸಿದರು.

ಪ್ರವಾಸೋದ್ಯಮ ಅಭಿವೃದ್ಧಿ: ‘ಜಿಲ್ಲೆಯಲ್ಲಿ ವಾಸೋದ್ಯಮಕ್ಕೂ ಉತ್ತೇಜನ ಕೊಡಬೇಕು. ಜಿಲ್ಲಾ ಕ್ರೀಡಾಂಗಣ, ರಾಜೀವ್ ಗಾಂಧಿ ಆರೋಗ್ಯ ವಿಶ್ವವಿದ್ಯಾಲಯದ ಆರಂಭ, ಅರ್ಕಾವತಿ ನದಿಯನ್ನು ಪುನರುಜ್ಜೀವನಗೊಳಿಸಿ ಅಭಿವೃದ್ಧಿಪಡಿಸುವುದು, ಬಿಎಂಟಿಸಿ ಬಸ್ ಸೇವೆಯನ್ನು ಜಿಲ್ಲೆಗೆ ವಿಸ್ತರಣೆ, ಮಾಗಡಿಯ ಕೆಂಪೇಗೌಡರ ಕೋಟೆ ಅಭಿವೃದ್ಧಿ, ಮೈಸೂರು ದಸರಾ ಮಾದರಿಯಲ್ಲಿ ರಾಮನಗರದ ಚಾಮುಂಡೇಶ್ವರಿ ಕರಗವನ್ನು ಜಿಲ್ಲಾಡಳಿತವೇ ಅದ್ಧೂರಿಯಾಗಿ ಆಚರಿಸಬೇಕು. ಘನತ್ಯಾಜ್ಯ ವಿಲೇವಾರಿ ಘಟಕ ನಿರ್ಮಾಣ ಮಾಡಬೇಕು’ ಎಂದು ಹರೀಶ್‌ಕುಮಾರ್ ಮತ್ತು ನಾಗರಾಜ್ ಅಭಿಪ್ರಾಯಪಟ್ಟರು.

ನೀರಾವರಿಗೆ ಉತ್ತೇಜನ ಬೇಕು: ‘ಜಿಲ್ಲೆಯಲ್ಲಿ ನೀರಾವರಿ ಯೋಜನೆಗಳಿಗೆ ಉತ್ತೇಜನ ನೀಡಬೇಕು, ಮಂಚನಬೆಲೆ ಎಡದಂತೆ ಮತ್ತು ಬಲದಂಡೆ ಕಾಲುವೆಗಳನ್ನು ಸ್ವಚ್ಛಗೊಳಿಸಬೇಕು. ಇದರಿಂದ ರೈತರಿಗೆ ತುಂಬಾ ಅನುಕೂಲವಾಗಲಿದೆ’ ಎಂದು ಕೆಎಂಎಫ್ ಮಾಜಿ ಅಧ್ಯಕ್ಷ ಪಿ. ನಾಗರಾಜ್ ಒತ್ತಾಯಿಸಿದರು.