ಕುಂಸಿ | ಬೈಕ್‌ಗಳ ಡಿಕ್ಕಿ: ವ್ಯಕ್ತಿ ಸಾವು

ಕುಂಸಿ: ಸಮೀಪದ ಹುಬ್ಬನಹಳ್ಳಿ ರಸ್ತೆಯಿಂದ ಕುಂಸಿಗೆ ಹೋಗುವ ರಸ್ತೆ ನಡುವೆ ಭಾನುವಾರ ಸಂಜೆ ನಡೆದ ಬೈಕ್‌ಗಳ ಮುಖಾಮುಖಿ ಡಿಕ್ಕಿಯಲ್ಲಿ ಬೈಕ್‌ ಚಾಲಕ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಹಾರನಹಳ್ಳಿಯ ನಿವಾಸಿ ಶಶಿಕುಮಾರ್ (21) ಮೃತ ವ್ಯಕ್ತಿ. ಅವರು ಹಾರನಹಳ್ಳಿಯಿಂದ ಸ್ನೇಹಿತ ನಾಗರಾಜುನನ್ನು ಬೈಕ್‌ನಲ್ಲಿ ಕೂರಿಸಿಕೊಂಡು ಕುಂಸಿ ಕಡೆ ಹೋಗುತ್ತಿದ್ದರು. ಇದೇ ವೇಳೆ ಕೋಟೇಶ್ ಅವರು ತಂದೆಯನ್ನು ಕೂರಿಸಿಕೊಂಡು ಕುಂಸಿಯಿಂದ ಹುಬ್ಬನಹಳ್ಳಿಯ ಕಡೆ ಬೈಕ್‌ನಲ್ಲಿ ಹೋಗುತ್ತಿದ್ದರು. ಈ ವೇಳೆ ಅವಘಡ ಸಂಭವಿಸಿದೆ.

ಕೋಟೇಶ್ ಹಾಗೂ ಅವರ ತಂದೆ ಮುರುಗೇಶ್ ಅವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಈ ಕುರಿತು ಕುಂಸಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.