ಟೋಲ್ ಸಂಗ್ರಹ, ಬಿಜೆಪಿ ಅವಧಿಯ ಪಾಪದ ಕೂಸು: ಆಯನೂರು ಮಂಜುನಾಥ್
ಟೋಲ್ಗೇಟ್ ರದ್ದು, ಡಿಸಿಎಂಗೆ ಮನವಿ: ಆಯನೂರು ಮಂಜುನಾಥ್
ಪ್ರಜಾವಾಣಿ ವಾರ್ತೆPublished 30 ಆಗಸ್ಟ್ 2024, 16:23 IST Last Updated 30 ಆಗಸ್ಟ್ 2024, 16:23 IST 
ಆಯನೂರು ಮಂಜುನಾಥ್
ಶಿವಮೊಗ್ಗ: ‘ಶಿಕಾರಿಪುರ– ಶಿವಮೊಗ್ಗ– ಶಿರಾಳಕೊಪ್ಪ ರಸ್ತೆಯಲ್ಲಿ ಟೋಲ್ಗೇಟ್ ಆರಂಭಿಸಿದ್ದೇ ಬಿಜೆಪಿ ನೇತೃತ್ವದ ಸರ್ಕಾರ. ಈಗ ರೈತ ಮೋರ್ಚಾ ಹೆಸರಲ್ಲಿ ಅದರ ವಿರುದ್ಧ ಹೋರಾಟ ಮಾಡುತ್ತಿರುವುದೇ ಹಾಸ್ಯಾಸ್ಪದ. ಜಾತ್ರೆಯಲ್ಲಿ ಕಳ್ಳ ತನ್ನನ್ನು ಹಿಡಿಯಲು ಬಂದಾಗ ತಾನೇ ಕಳ್ಳ ಕಳ್ಳ ಎಂದು ಕೂಗುತ್ತ ಓಡಿ ಹೋದ ರೀತಿ ಜನರು ತಮ್ಮ ವಿರುದ್ಧ ತಿರುಗಿ ಬೀಳುವ ಮೊದಲು ಬಿಜೆಪಿಯವರು ಹೋರಾಟ ಆರಂಭಿಸಿದ್ದಾರೆ’ ಎಂದು ಕೆಪಿಸಿಸಿ ವಕ್ತಾರ ಆಯನೂರು ಮಂಜುನಾಥ್ ಲೇವಡಿ ಮಾಡಿದರು.
‘ಬಿಜೆಪಿಯವರಿಗೆ ಅಲ್ಲಿ ಟೋಲ್ಗೇಟ್ ಹಾಕಬೇಕು ಎಂಬ ದುರಾಲೋಚನೆ ಬಂದದ್ದೇ ಆದಾಯ ಕಣ್ಣಮುಂದೆ ಇಟ್ಟುಕೊಂಡು. ಬೇಕಾದವರಿಗೆ ಟೆಂಡರ್‌ ಕೊಡಿಸಿ ಹತ್ತಾರು ವರ್ಷಗಳ ಆದಾಯದ ಲೆಕ್ಕಾಚಾರ ಇಟ್ಟುಕೊಂಡು ಟೋಲ್ಗೇಟ್ ಆರಂಭಿಸಲು ಆವಕಾಶ ಮಾಡಿಕೊಟ್ಟರು. ಈಗ ತೋರಿಕೆಯ ಹೋರಾಟಗಳ ಮೂಲಕ ಜನರ ದಾರಿತಪ್ಪಿಸುವ ಕೆಲಸ ಮಾಡುತ್ತಿದ್ದಾರೆ’ ಎಂದು ಶುಕ್ರವಾರ ಇಲ್ಲಿ ಸುದ್ದಿಗೋಷ್ಠಿಯಲ್ಲಿ ಆರೋಪಿಸಿದರು.
‘ಅಲ್ಲಿ ಟೋಲ್ ಹಾಕುವ ವಿಚಾರದಲ್ಲಿ ಆಗ ಏನು ನಡೆಯಬಹುದೋ ಆ ವ್ಯವಹಾರಗಳೆಲ್ಲವೂ ನಡೆದಿವೆ. ಟೋಲ್ ತಕ್ಷಣ ರದ್ದು ಮಾಡಬೇಕು ಎಂದು ಹೇಳುತ್ತಿರುವರು ಸ್ಥಾಪನೆ ಮಾಡಿದ್ದು ಏಕೆ? ಎಲ್ಲ ಕಾಮಗಾರಿ ಬಿಜೆಪಿ ಅಧಿಕಾರದ ಕಾಲದಲ್ಲಿಯೇ ಆಗಿದೆ. ಈಗ ಏಕೆ ಹೋರಾಟ. ಸ್ವಂತ ಹಿತಾಸಕ್ತಿ ಕಾಪಾಡಿಕೊಳ್ಳಲು ಮಾಡಿಕೊಂಡ ವ್ಯವಸ್ಥೆ ಅದು. ಈಗ 60 ಕಿ.ಮೀ. 35 ಕಿ.ಮೀ. ಇವೆಲ್ಲ ನೆನಪಾಗುತ್ತಿವೆ. ನಾಟಕದ ಹೋರಾಟ ತಕ್ಷಣ ನಿಲ್ಲಿಸಿ’ ಎಂದು ಆಗ್ರಹಿಸಿದರು.
‘ಕಾಂಗ್ರೆಸ್‌ ಟೋಲ್ ಗೇಟ್‌ ಪರ ಇಲ್ಲ. ಅಲ್ಲಿ ಟೋಲ್ ಸಂಗ್ರಹದಿಂದ ರೈತರಿಗೆ ಆಗುತ್ತಿರುವ ತೊಂದರೆ ಬಗ್ಗೆ ಡಿಸಿಎಂ ಡಿ.ಕೆ.ಶಿವಕುಮಾರ್ ಗಮನಕ್ಕೆ ತಂದಿದ್ದೇವೆ. ಅದನ್ನು ರದ್ದು ಮಾಡಬೇಕೇ? ಏನು ಮಾಡಬೇಕು. ಅದಕ್ಕಿರುವ ಕಾನೂನಾತ್ಮಕ ತೊಡಕುಗಳೇನು ಎಂಬುದರ ಬಗ್ಗೆ ಅವರು ಪರಿಶೀಲಿಸುತ್ತಿದ್ದು, ಶೀಘ್ರ ತೀರ್ಮಾನ ಕೈಗೊಳ್ಳಲಿದ್ದಾರೆ’ ಎಂದರು.
ಸುದ್ದಿಗೋಷ್ಠಿಯಲ್ಲಿ ಡಿಸಿಸಿ ಬ್ಯಾಂಕ್ ಅಧ್ಯಕ್ಷ ಆರ್.ಎಂ.ಮಂಜುನಾಥಗೌಡ, ಉಪಾಧ್ಯಕ್ಷ ಎಸ್.ಕೆ.ಮರಿಯಪ್ಪ, ಭೋವಿ ನಿಗಮದ ಅಧ್ಯಕ್ಷ ಎಸ್.ರವಿಕುಮಾರ್‌, ಮುಖಂಡರಾದ ಬಿ.ಎ.ರಮೇಶ ಹೆಗ್ಡೆ, ಶ್ರೀನಿವಾಸ ಕರಿಯಣ್ಣ, ಜಿ.ಡಿ.ಮಂಜುನಾಥ, ಯು.ಶಿವಾನಂದ, ಧೀರರಾಜ್‌ ಹೊನ್ನವಿಲೆ, ವೈ.ಎಚ್.ನಾಗರಾಜ್‌, ಪೂರ್ಣೇಶ, ಹಿರಣ್ಣಯ್ಯ, ಎಚ್.ಎಂ.ಮಧು, ನಿರಂಜನ ಹಾಜರಿದ್ದರು.
ಪತ್ರಕರ್ತರ ಹೆಸರಲ್ಲಿ ನಿವೇಶನ ಹಗರಣ !
‘ಶಿವಮೊಗ್ಗದಲ್ಲಿ ಪತ್ರಕರ್ತರ ಹೆಸರಲ್ಲೊಂದು ಮರಿ ಮೂಡಾ ಹಗರಣ ನಡೆದಿದೆ. ಇಲ್ಲಿನ ಹುಡ್ಕೋದ ಪತ್ರಕರ್ತರ ಕಾಲೊನಿಯಲ್ಲಿ 50x80 ಅಳತೆಯ ಹತ್ತಾರು ದೊಡ್ಡ ನಿವೇಶನ ಹಾಗೂ ಮನೆಗಳು ನಕಲಿ ಪತ್ರಕರ್ತ ಹೆಸರಲ್ಲಿ ಬಿಜೆಪಿ ನಾಯಕರ ಮನೆಯ ಡ್ರೈವರ್ ಕಸಗುಡಿಸುವವರು ಮನೆ ಕೆಲಸದವರ ಹೆಸರಿಗೆ ಮಂಜೂರು ಆಗಿವೆ. ನಂತರ ಬೇನಾಮಿಯಾಗಿ ಬೇರೆಯವರ ಹೆಸರಿಗೆ ವರ್ಗಾವಣೆ ಆಗಿವೆ’ ಎಂದು ಆಯನೂರು ಮಂಜುನಾಥ್ ಆರೋಪಿಸಿದರು. ಇದರಲ್ಲಿ ಮುಚ್ಚು ಮರೆ ಏನೂ ಇಲ್ಲ. ಇಲ್ಲಿರುವ ಪತ್ರಕರ್ತರೇ ಜೀವಂತ ಸಾಕ್ಷಿ ಬೇನಾಮಿ ಆಗಿ ನಕಲಿ ಪತ್ರಕರ್ತರ ಹೆಸರಲ್ಲಿ ಮಂಜೂರು ಆದ ಸೈಟುಗಳು ನಂತರ ಯಾರ ಹೆಸರಿಗೆ ಯಾವ ಕುಟುಂಬದವರ ಹೆಸರಿಗೆ ವರ್ಗಾವಣೆ ಆದವು. ಅದರಲ್ಲಿ ಇನ್ನೂ ಕೆಲವು ಬೇನಾಮಿ ಆಗಿಯೇ ಉಳಿದಿವೆ. ಅಲ್ಲಿ ಪತ್ರಕರ್ತರೂ ಬಂದಿಲ್ಲ. ಬೇರೆಯವರೂ ಇಲ್ಲ. ಯಾರು ಖಾತೆ ಮಾಡಿಕೊಂಡಿದ್ದಾರೆ. ಆ ನಿವೇಶನ ಮನೆಗಳು ಯಾರ ಬೇನಾಮಿ ಆಸ್ತಿ ಎಂಬುದನ್ನು ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷರು ಸಂಸದರು ಹೇಳಬಹುದಾ? ಅವರಿಗೆ ಮೈಸೂರಿನ ಮೂಡಾ ಮಾತ್ರ ಗೊತ್ತಾಗುತ್ತಿದೆ ಎಂದು ವ್ಯಂಗ್ಯವಾಡಿದರು.
ಆಸ್ಪತ್ರೆಗಾಗಿ ಬಿಡಿ ಭೂಮಿ ಸ್ವಾಧೀನ ಏಕೆ?
ಶಿವಮೊಗ್ಗದ ಮಂಡ್ಲಿಯಲ್ಲಿ ಕೆಐಎಡಿಬಿಯಿಂದ ಕೈಗಾರಿಕಾ ವಸಾಹತು ಸ್ಥಳದಿಂದ 3 ಕಿ.ಮೀ ದೂರದಲ್ಲಿ ಆಸ್ಪತ್ರೆ ಮಾಲೀಕರೊಬ್ಬರ ಹೆಸರಲ್ಲಿ 35 ರಿಂದ 40 ಎಕರೆ ಜಾಗವಿದೆ. ಅದನ್ನು ಬಿಟ್ಟು ಅವರದ್ದೇ ಆಸ್ಪತ್ರೆಗೋಸ್ಕರ ಕೇವಲ ನಾಲ್ಕು ಎಕರೆ ಬಿಡಿ ಭೂಮಿ ಸ್ವಾಧೀನ ಮಾಡಿ ಬಿಜೆಪಿ ಅವಧಿಯಲ್ಲಿ ಅಧಿಕಾರ ದುರುಪಯೋಗಪಡಿಸಿಕೊಳ್ಳಲಾಗಿದೆ ಎಂದು ಆಯನೂರು ಮಂಜುನಾಥ್ ಆರೋಪಿಸಿದರು. ಆಸ್ಪತ್ರೆ ಮಾಲೀಕರದ್ದೇ ಜಾಗ ಇದ್ದರೂ ಬಡ ರೈತನ ನಾಲ್ಕು ಎಕರೆ ಜಮೀನು ಮಾತ್ರ ಸ್ವಾಧೀನಪಡಿಸಿಕೊಂಡಿದ್ದು ಏಕೆ. ಆ ಆಸ್ಪತ್ರೆ ಮಾಡಿದವರು ಯಾರು? ಇಲ್ಲಿ ಅಧಿಕಾರ ದುರುಪಯೋಗ ಆಗಿಲ್ಲವೇ. ಆಸ್ಪತ್ರೆ ಟ್ರಸ್ಟ್ ಯಾರದ್ದು? ಇಂತಹ ಪ್ರಕರಣ ರಾಜ್ಯದಲ್ಲಿ ಎಲ್ಲಿಯಾದರೂ ನಡೆದಿದೆಯೇ? ಎಂದು ಉತ್ತರಿಸುವ ಧೈರ್ಯ ಇದ್ದರೆ ಬಿಜೆಪಿಯವರು ಸವಾಲನ್ನು ಸ್ವೀಕರಿಸಲಿ. ಇದರ ಬಗ್ಗೆ ಯಾವಾಗ ಪಾದಯಾತ್ರೆ ಮಾಡುತ್ತೀರಿ ಎಂದು ಪ್ರಶ್ನಿಸಿದರು.
‘ಹಾಸನ ಘಟನೆಯ ವಿರುದ್ಧವೂ ಪ್ರತಿಭಟಿಸಿ’
ಅತ್ಯಾಚಾರ ಯಾರ ಮನೆಯ ಹೆಣ್ಣಿನ ಮೇಲಾದರೂ ಸರಿ. ಅದನ್ನು ಖಂಡಿಸಬೇಕು. ಬಿಜೆಪಿ ಮಹಿಳಾ ಮೋರ್ಚಾದವರು ಕಾರ್ಕಳದಲ್ಲಿ ಯುವತಿ ಮೇಲೆ ನಡೆದ ಅತ್ಯಾಚಾರ ವಿರೋಧಿಸಿ ಪ್ರತಿಭಟನೆ ನಡೆಸಿದರು. ಆದರೆ ಹಾಸನದಲ್ಲಿ ನೂರಾರು ಯುವತಿಯರ ಮೇಲೆ ಅತ್ಯಾಚಾರ ನಡೆದಾಗ ಏಕೆ ಪ್ರತಿಭಟನೆ ಮಾಡಲಿಲ್ಲ ಎಂದು ಆಯನೂರು ಮಂಜುನಾಥ್ ಪ್ರಶ್ನಿಸಿದರು. ಹಾಸನದಲ್ಲಿ ನಮ್ಮ ಸಹೋದರಿಯರ ಮೇಲೆ ಮಾತ್ರವಲ್ಲ ಸಹೋದರರ ಮೇಲೂ ಅತ್ಯಾಚಾರ ನಡೆದಿದೆ. ಅಲ್ಲಿ ನೂರಾರು ಸಂಸಾರಗಳು ನಾಶವಾಗಿ ಬೀದಿಗೆ ಬಿದ್ದಿವೆ. ಕಾರ್ಕಳದಲ್ಲಿ ಮುಸ್ಲಿಮನೊಬ್ಬ ಮಾಡಿದ್ದಾನೆ ಎಂಬ ಕಾರಣಕ್ಕೆ ಆ ಪ್ರಕರಣಕ್ಕೆ ಸಿಕ್ಕ ಖಂಡನೆ ಮಾನ್ಯತೆ ಹಾಸನ ಜಿಲ್ಲೆಯ ನೂರಾರು ಮಹಿಳೆಯರ ಮಾನಕ್ಕೆ ಸಿಗಲೇ ಇಲ್ಲವಲ್ಲ. ನಮ್ಮನ್ನು ರಕ್ಷಿಸಿ ಎಂದು ಅಲ್ಲಿಯ ಹುಡುಗರೂ ಓಡಿಹೋಗಬೇಕಿದೆ. ಅದರ ವಿರುದ್ಧವೂ ಹೋರಾಟ ಮಾಡಬೇಕು ಎಂದು ಬಿಜೆಪಿ ಮಹಿಳಾ ಮೋರ್ಚಾ ಸದಸ್ಯರಿಗೆ ಸಲಹೆ ನೀಡಿದರು.
