ಶಿಕಾರಿಪುರ: ಮತ್ತೆ ಬಂತು ಹೋರಿ ಹಬ್ಬ

ಶಿಕಾರಿಪುರ: ದೀಪಾವಳಿ ಪ್ರಯುಕ್ತ ಪಟ್ಟಣ ಸೇರಿದಂತೆ ತಾಲ್ಲೂಕಿನ ವಿವಿಧ ಗ್ರಾಮಗಳಲ್ಲಿ ನಡೆಯುವ ಹೋರಿ ಹಬ್ಬ ಮತ್ತೆ ಬಂದಿದೆ. ಅಂತೆಯೇ ಸಿದ್ಧತೆ ಗರಿಗೆದರಿದೆ. ಈ ಬಾರಿ ಹೋರಿಗಳ ಓಟ ನೋಡಲು ಬರುವ ಯಾರಿಗೂ ಅಪಾಯ ಆಗದಂತೆ, ಸಾವು–ನೋವು ಸಂಭವಿಸದಂತೆ ಸ್ಪರ್ಧೆ ಆಚರಿಸಲು ಸಂಘಟಕರು ಸಿದ್ಧತೆ ಕೈಗೊಂಡಿದ್ದಾರೆ.

ದೀಪಾವಳಿ ಬಂದರೆ ಹೋರಿ ಬೆದರಿಸುವ ರೋಮಾಂಚನಕಾರಿ ಸ್ಪರ್ಧೆ ವೀಕ್ಷಿಸಲು ಸುತ್ತಮುತ್ತಲಿನ ಜಿಲ್ಲೆಯವರೂ ಕಾತರದಿಂದ ಕಾಯುತ್ತಾರೆ. ಹಬ್ಬ ಆರಂಭದ ದಿನದಿಂದ ಮುಂದಿನ ಎರಡು ತಿಂಗಳವರೆಗೆ ತಾಲ್ಲೂಕಿನ ವಿವಿಧ ಗ್ರಾಮಗಳಲ್ಲಿ ಹೋರಿಗಳನ್ನು ಬೆದರಿಸುವ ಸ್ಪರ್ಧೆಗಳು ನಡೆಯುತ್ತವೆ.

ಹೋರಿಗಳ ಮಾಲೀಕರು ರಾಜ್ಯದ ಇತರೆ ಜಿಲ್ಲೆಗಳು ಹಾಗೂ ನೆರೆಯ ತಮಿಳುನಾಡಿನಿಂದ ಸ್ಪರ್ಧೆಗೆ ಕರೆತರುತ್ತಾರೆ. ಉತ್ತಮ ಪ್ರದರ್ಶನ ತೋರುವ ಹೋರಿಗಳನ್ನು ಲಕ್ಷಾಂತರ ರೂಪಾಯಿ ಕೊಟ್ಟು ಖರೀದಿಸುತ್ತಾರೆ. ಈ ವರ್ಷವೂ ತಾಲ್ಲೂಕಿನಲ್ಲಿ ಹೋರಿ ಪ್ರಿಯರು ಲಕ್ಷಾಂತರ ರೂಪಾಯಿ ನೀಡಿ ಹೋರಿಗಳನ್ನು ಖರೀದಿಸಿ ತಂದಿದ್ದು, ಅವುಗಳಿಗೆ ಪೌಷ್ಟಿಕ ಆಹಾರ ನೀಡಿ ಪೋಷಣೆಯಲ್ಲಿ ನಿರತರಾಗಿದ್ದಾರೆ.

ಸ್ಪರ್ಧೆಯಲ್ಲಿ ಭಾಗಿಯಾಗುವ ಹೋರಿಗಳನ್ನು ಕೊಬ್ಬರಿ ಮಾಲೆ, ಬಲೂನ್‌, ಕಾಲ್ಗೆಜ್ಜೆ ಸೇರಿದಂತೆ ವಿವಿಧ ಅಲಂಕಾರಿಕ ವಸ್ತುಗಳಿಂದ ಸಿಂಗರಿಸಿರುತ್ತಾರೆ. ಹೋರಿ ಹಬ್ಬದ ಸಂದರ್ಭದಲ್ಲಿ ಹೋರಿ ಮಾಲೀಕರು ‘ಹಾಕೋ ಕೈಯ್ಯಾ ಮುಟ್ಟೋ ಮೈಯ್ಯಾ’ ಎಂದು ಭಾವೋದ್ವೇಗದಿಂದ ಘೋಷಣೆ ಹಾಕುತ್ತಾ ಹೋರಿ ಹಿಂದೆ ಓಡುತ್ತಾರೆ.

ಹೋರಿಗಳಿಗೆ ತಮಗೆ ಇಷ್ಟವಾದ ದೇವರು ಹಾಗೂ ಸಿನಿಮಾದ ಹೆಸರುಗಳನ್ನು ಇಟ್ಟಿದ್ದು, ಹೋರಿಯ ಚಿತ್ರಗಳನ್ನು ಹಾಗೂ ವಿಡಿಯೊ ತುಣುಕುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟು ಪ್ರಚಾರ ನಡೆಸುತ್ತಿದ್ದಾರೆ.

ಹೋರಿ ಹಬ್ಬ ನಡೆಯುವ ಸ್ಥಳದಲ್ಲಿ ವೀಕ್ಷಕರ ಸುರಕ್ಷತೆಗಾಗಿ ಸುತ್ತಲೂ ಮರದ ದಿಮ್ಮಿಗಳಿಂದ ಬೇಲಿ ನಿರ್ಮಿಸಬೇಕು.  ಗಾಯಗೊಂಡವರನ್ನು ಕರೆದುಕೊಂಡು ಹೋಗಲು ಆಂಬ್ಯುಲೆನ್ಸ್‌ ವ್ಯವಸ್ಥೆ ಮಾಡಬೇಕು. ತಿವಿಯುವ ಹೋರಿ ಬದಲು ಓಡುವ ಹೋರಿಗಳಿಗೆ ಮಾತ್ರ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ಅವಕಾಶ ನೀಡಬೇಕು ಎಂಬುದು ಸಾರ್ವಜನಿಕರ ಕೋರಿಕೆಯಾಗಿದೆ.