ವರದಾ ನದಿ, ಮಾವಿನಹೊಳೆ, ಕನ್ನೆ ಹೊಳೆ ಪ್ರವಾಹ: ಹಾನಿ ವೀಕ್ಷಿಸಿದ ಮಧು ಬಂಗಾರಪ್ಪ

ಶಿವಮೊಗ್ಗ: ಭಾರಿ ಮಳೆಯಿಂದ ಸಾಗರ ತಾಲ್ಲೂಕಿನ ಹಿರೇನಲ್ಲೂರು ಬಳಿ ವರದಾ ನದಿ ಹಾಗೂ ಮಾವಿನಹೊಳೆ ಉಕ್ಕಿ ಹರಿಯುತ್ತಿವೆ. ಇದರಿಂದ ಸಾವಿರಾರು ಎಕರೆ ಭತ್ತದ ಗದ್ದೆ, ಅಡಿಕೆ, ಬಾಳೆ ತೋಟಗಳು ಜಲಾವೃತವಾಗಿವೆ. ಭಾನುವಾರ ಜಿಲ್ಲಾ ಉಸ್ತುವಾರಿ ಸಚಿವ ಮಧು ಬಂಗಾರಪ್ಪ ಭೇಟಿ ನೀಡಿ ಹಾನಿಯ ಪ್ರಮಾಣ ವೀಕ್ಷಣೆ ಮಾಡಿದರು.

ಕಾನಲೆ, ಬೀಸನಗದ್ದೆ, ಸೈದೂರು ಸುತ್ತಲೂ ಕನ್ನೆ ಹೊಳೆ, ವರದಾ ಅಬ್ಬರ ಸೃಷ್ಟಿಸಿರುವ ಅವಾಂತರವನ್ನು ವೀಕ್ಷಿಸಿ ಬೆಳೆಗಳಿಗೆ ಆಗಿರುವ ಹಾನಿಯ ಬಗ್ಗೆ ಸ್ಥಳೀಯರಿಂದ ಮಾಹಿತಿ ಪಡೆದರು.

ಮಾವಿನ ಹೊಳೆಯ ಎರಡು ಕಡೆ ದಂಡೆ ಒಡೆದು ಹೋಗಿದೆ. ಪ್ರತೀ ಮಳೆಗಾಲದಲ್ಲೂ ದಂಡೆ ಒಡೆದು ಹೋಗಿ ಜಮೀನುಗಳು ಜಲಾವೃತವಾಗುವುದು ಸಾಮಾನ್ಯ. ತಡೆಗೋಡೆ ಕಟ್ಟಿಸಿ ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸುವಂತೆ ಸ್ಥಳೀಯರು ಸಚಿವರಿಗೆ ಮನವಿ ಮಾಡಿದರು.

ವರದಾ ನದಿಗೆ ಬ್ಯಾರೇಜ್ ನಿರ್ಮಿಸುವಂತೆ ಶುಂಠಿಕೊಪ್ಪ, ತಟ್ಟೆಗುಂಡಿ ಗ್ರಾಮಸ್ಥರು ಕೇಳಿದರು.

ನಂತರ ಸಮೀಪದ ಮಂಡಗಳಲೆಯ ಸರ್ಕಾರಿ ಶಾಲೆಯಲ್ಲಿ ತೆರೆದಿರುವ ಕಾಳಜಿ ಕೇಂದ್ರಕ್ಕೆ ಭೇಟಿ ನೀಡಿದ ಮಧು ಬಂಗಾರಪ್ಪ, ಮನೆ ಕುಸಿದುಬಿದ್ದು ಅಲ್ಲಿ ಆಶ್ರಯ ಪಡೆದಿರುವ ಅದೇ ಗ್ರಾಮದ ಎರಡು ಕುಟುಂಬಗಳ ಸದಸ್ಯರ ಅಳಲು ಆಲಿಸಿದರು. ಸರ್ಕಾರದಿಂದ ಪರಿಹಾರ ಕೊಡಿಸಿ ಮನೆ ಕಟ್ಟಿಸಿಕೊಡಲು ತಕ್ಷಣ ಕ್ರಮ ಕೈಗೊಳ್ಳುವಂತೆ ಪಿಡಿಒಗೆ ಸೂಚನೆ ನೀಡಿದರು.

ಜಿಲ್ಲಾಧಿಕಾರಿ ಗುರುದತ್ತ ಹೆಗಡೆ, ಜಿಲ್ಲಾ ಪಂಚಾಯ್ತಿ ಸಿಇಒ ಎನ್.ಹೇಮಂತ್ ಕುಮಾರ್ ಈ ವೇಳೆ ಸಚಿವರ ಜೊತೆ ಇದ್ದರು.