ಭದ್ರಾವತಿ | ಹೆಚ್ಚಿದ ಬಿಸಿಲ ತಾಪ; ಜನ ತಲ್ಲಣ

ಭದ್ರಾವತಿ: ಹೆದ್ದಾರಿ ಮತ್ತು ರಸ್ತೆಗಳ ನಿರ್ಮಾಣಕ್ಕಾಗಿ ನಗರದಲ್ಲಿ ಕಳೆದೊಂದು ವರ್ಷದಲ್ಲಿ ಅಧಿಕೃತವಾಗಿ 204 ಮರಗಳಿಗೆ ಕೊಡಲಿ ಏಟು ಬಿದ್ದಿದೆ. ಅನಧಿಕೃತವಾಗಿ ಕಣ್ಮರೆಯಾಗಿರುವ ಮರಗಳಿಗೆ ಲೆಕ್ಕವಿಲ್ಲ.

ಬಿ.ಎಚ್. ರಸ್ತೆ, ತಾಲ್ಲೂಕು ಕಚೇರಿ ರಸ್ತೆ, ತರೀಕೆರೆ ರಸ್ತೆ, ಸಿ.ಎನ್.ರಸ್ತೆ, ಹುತ್ತಾ ಕಾಲೊನಿ ರಸ್ತೆಗಳಲ್ಲಿ ಹಲವು ವರ್ಷಗಳಿಂದ ತಲೆ ಎತ್ತಿದ್ದ ಬೃಹದಾಕಾರದ ಮರಗಳನ್ನು ರಸ್ತೆ ವಿಸ್ತರಣೆ ಕಾಮಗಾರಿಗೋಸ್ಕರ ಧರೆಗುರುಳಿಸಲಾಗಿದೆ. ಮರಗಳ ಕಡಿತಲೆಯಿಂದಾಗಿ ನಗರದಲ್ಲಿ ಬಿಸಿಲ ತಾಪ ಹೆಚ್ಚಾಗಿದೆ.

ವ್ಯಾಪಾರಕ್ಕಾಗಿ ಮರಗಳ ನೆರಳನ್ನೇ ಆಶ್ರಯಿಸುತ್ತಿದ್ದ ಬೀದಿ ಬದಿ ವ್ಯಾಪಾರಿಗಳು ಈಗ ದೊಡ್ಡ ಛತ್ರಿಗಳ ಮೊರೆ ಹೋಗುತ್ತಿದ್ದಾರೆ. ಪ್ರಯಾಣಿಕರು ಬಿಸಿಲಿನ ತಾಪ ತಡೆಯಲಾಗದೆ ಬಸ್ ಬರುವವರೆಗೂ ಅಂಗಡಿ ಮುಂಗಟ್ಟುಗಳೊಳಗೆ ಕುಳಿತುಕೊಳ್ಳಬೇಕಾದ ಅನಿವಾರ್ಯ ಸ್ಥಿತಿ ಇದೆ. ಕೂಲಿ ಕಾರ್ಮಿಕರು, ವಿದ್ಯಾರ್ಥಿಗಳು, ರೋಗಿಗಳು ನೆರಳು ಹುಡುಕಲು ಅಲೆದಾಡುವ ಪರಿಸ್ಥಿತಿ ಇದೆ. ಪಶು– ಪಕ್ಷಿಗಳು ನೀರು ಹಾಗೂ ನೆರಳಿಗಾಗಿ ಹಾತೊರೆಯುವಂತಾಗಿದೆ.

ವಿಐಎಸ್ಎಲ್ ಕಾರ್ಖಾನೆಯ ಸುತ್ತಮುತ್ತಲ ಪ್ರದೇಶಗಳು ಬಿಟ್ಟರೆ ನಗರದ ಬೇರೆಲ್ಲೂ ಹಸಿರು ಕಾಣುತ್ತಿಲ್ಲ. ಮರಗಳಿಲ್ಲದೆ ಮಳೆ ಇಲ್ಲ, ಮಳೆ ಇಲ್ಲದೆ ಬೆಳೆ ಇಲ್ಲ, ಬೆಳೆಗಳ ಅಭಾವದಿಂದ ಬೆಲೆಗಳಲ್ಲಿ ಏರಿಕೆ ಖಂಡಿದೆ ಎಂದು ಸ್ಥಳೀಯ ವ್ಯಾಪಾರಸ್ಥರು ದೂರಿದರು.

ಎರಡು– ಮೂರು ದಿನಗಳಿಂದ ನಗರದಲ್ಲಿ ಸರಾಸರಿ 37ರಿಂದ 38 ಡಿಗ್ರಿವರೆಗೆ ಉಷ್ಣಾಂಶ ಏರಿಕೆಯಾಗಿದೆ. ಮರಗಳ ಅಭಾವದಿಂದ ಉಷ್ಣಾಂಶ ಇನ್ನೂ ಹೆಚ್ಚಾಗುವ ಸಂಭವವಿದೆ. ಪರಿಸ್ಥಿತಿ ಹೀಗೆ ಮುಂದುವರಿದರೆ ಚರ್ಮರೋಗಗಳು ಕಾಣಿಸಿಕೊಳ್ಳುವ ಅಪಾಯ ಇದೆ. ತಾಪಮಾನವನ್ನು ತಗ್ಗಿಸಲು ಮತ್ತು ಗಾಳಿಯ ಗುಣಮಟ್ಟ ಸುಧಾರಿಸುವಲ್ಲಿ ಮರಗಳ ಪಾತ್ರ ಮಹತ್ವದ್ದಾಗಿದೆ. 

‘ದೊಡ್ಡ ಮರಗಳು ಮಾಲಿನ್ಯಕಾರಕ ಅನಿಲಗಳನ್ನು ಹೀರಿಕೊಳ್ಳುತ್ತವೆ. ಎಲೆಗಳು ಮತ್ತು ತೊಗಟೆ ದೂಳು, ಕೊಳಕು ಅಥವಾ ಹೊಗೆಯಂತಹ ಸೂಕ್ಷ್ಮ ಕಣಗಳನ್ನು ಶುದ್ಧೀಕರಿಸಲು ನೆರವಾಗುತ್ತವೆ’ ಎಂದು ತಾಲ್ಲೂಕು ವೈದ್ಯಾಧಿಕಾರಿ ಡಾ.ಅಶೋಕ್ ತಿಳಿಸಿದರು.