ತುರುವೇಕೆರೆ: ಕುಲಾಂತರಿ ಬೀಜ ನಿಷೇಧಕ್ಕೆ ರೈತರ ಆಗ್ರಹ

ತುರುವೇಕೆರೆ: ರೈತರಿಗೆ ಮಾರಕವಾಗಿರುವ ಕುಲಾಂತರಿ ಬೀಜಗಳನ್ನು ರಾಜ್ಯ ಹಾಗೂ ಕೇಂದ್ರ ಸರ್ಕಾರ ನಿಷೇಧಿಸಬೇಕು ಎಂದು ಆಗ್ರಹಿಸಿ ರೈತ ಸಂಘ ಹಾಗೂ ದಲಿತ, ಪ್ರಗತಿ ಪರ ಸಂಘಟನೆಗಳು ತಾಲ್ಲೂಕು ಕಚೇರಿ ಮುಂದೆ ಸೋಮವಾರ ಪ್ರತಿಭಟನೆ ನಡೆಸಿದವು.

ರೈತ ಸಂಘದ ತಾಲ್ಲೂಕು ಅಧ್ಯಕ್ಷ ಶ್ರೀನಿವಾಸ್ ಗೌಡ ಮಾತನಾಡಿ, ‘ಕುಲಾಂತರಿ ತಳಿಗಳ ಬೆಳೆಗೆ ಅವಕಾಶ ಮಾಡಿಕೊಡಬಾರದು. ಅನೇಕ ಬಹುರಾಷ್ಟ್ರೀಯ ಕಂಪನಿಗಳು ಕುಲಾಂತರಿ ತಳಿಗಳನ್ನು ಜಾರಿಗೆ ತರುವ ಮೂಲಕ ದೇಶಿಯ ತಳಿಗಳನ್ನು ನಾಶ ಮಾಡಲು ಹೊರಟಿವೆ. ಕುಲಾಂತರಿ ತಳಿಗಳಿಂದ ಮಾರಕ ರೋಗಗಳಿಗೆ ತುತ್ತಾಗಬೇಕಾಗುತ್ತದೆ’ ಎಂದರು.

ರೈತ ಸಂಘದ ರಹಮತ್, ದಂಡಿನಶಿವರ ಕುಮಾರ್, ಬೋರಪ್ಪ, ಸಿಐಟಿಯು ಸತೀಶ್, ಬೀದಿಬದಿ ವ್ಯಾಪಾರಿಗಳ ಸಂಘದ ಅಧ್ಯಕ್ಷ ಮಾರುತಿ, ಆಟೊಚಾಲಕರ ಸಂಘದ ಗಂಗಣ್ಣ ಇದ್ದರು.