ತುಮಕೂರು: ಹಾಸ್ಟೆಲ್‌ಗೆ ಬೇಕಿದೆ ‘ತುರ್ತು ಚಿಕಿತ್ಸೆ’

ತುಮಕೂರು: 10ರಿಂದ 12 ಜನ ಇರಬೇಕಾದ ಕಡೆ 20 ಮಂದಿ ವಾಸ, ಗಬ್ಬು ನಾರುವ ಶೌಚಾಲಯ, ಮೂಲೆ ಸೇರಿದ ಶುದ್ಧ ಕುಡಿಯುವ ನೀರಿನ ಘಟಕ, ಅನೈರ್ಮಲ್ಯದ ಮಧ್ಯೆ ದಿನ ದೂಡುವ ವಿದ್ಯಾರ್ಥಿಗಳು. ಇದು ನಗರದ ವಿದ್ಯಾರ್ಥಿ ನಿಲಯಗಳ ಸ್ಥಿತಿಗತಿಯ ಒಂದು ಕಿರು ನೋಟ.

ಸಮಾಜ ಕಲ್ಯಾಣ ಇಲಾಖೆ, ಪರಿಶಿಷ್ಟ ವರ್ಗಗಳ ಕಲ್ಯಾಣ, ಅಲ್ಪಸಂಖ್ಯಾತರ ಕಲ್ಯಾಣ, ಹಿಂದುಳಿದ ವರ್ಗಗಳ ಅಭಿವೃದ್ಧಿ ಇಲಾಖೆಗಳಿಂದ ನಡೆಯುತ್ತಿರುವ ಹಾಸ್ಟೆಲ್‌ಗಳಲ್ಲಿ ಅವ್ಯವಸ್ಥೆ ಹೆಚ್ಚುತ್ತಿದೆ. ರಕ್ಷಣೆ, ಅಗತ್ಯ ಸೌಲಭ್ಯ ಕಲ್ಪಿಸಬೇಕಾದ ಇಲಾಖೆಯ ಅಧಿಕಾರಿಗಳು ಹಾಸ್ಟೆಲ್‌ ದಾರಿ ಮರೆತಿದ್ದಾರೆ. ಹಿಂದುಳಿದ, ತಳ ಸಮುದಾಯದ ‘ಕಲ್ಯಾಣ’ಕ್ಕಾಗಿ ಇರುವ ಇಲಾಖೆಗಳ ಜಾಣ ಮೌನ, ನಿರ್ಲಕ್ಷ್ಯದಿಂದ ಮಕ್ಕಳು ಬಳಲುತ್ತಿದ್ದಾರೆ.

‘ಜಿಲ್ಲಾಧಿಕಾರಿ, ಹಿರಿಯ ಅಧಿಕಾರಿಗಳು ಭೇಟಿ ನೀಡುವ ಮುನ್ನ ಹಾಸ್ಟೆಲ್‌ ಸ್ವಚ್ಛಗೊಳಿಸುತ್ತಾರೆ. ಅವರ ಜತೆ ಬಂದು ವೀಕ್ಷಿಸಿ ‘ಎಲ್ಲ ಚೆನ್ನಾಗಿದೆ’ ಎಂದು ಅವರನ್ನೂ ಹಾದಿ ತಪ್ಪಿಸುತ್ತಾರೆ. ಒಮ್ಮೊಮ್ಮೆ ಕುಡಿಯಲು ನೀರು ಸಹ ಇರುವುದಿಲ್ಲ. ಕನಿಷ್ಠ ಚಳಿಗಾಲದಲ್ಲಾದರೂ ಬಿಸಿ ನೀರಿನ ವ್ಯವಸ್ಥೆ ಮಾಡಲಿ’ ಎಂದು ರಾಧಾಕೃಷ್ಣ ರಸ್ತೆಯ ಪದವಿ ಪೂರ್ವ ಕಾಲೇಜು ವಿದ್ಯಾರ್ಥಿಗಳ ಹಾಸ್ಟೆಲ್‌ನ ಮಕ್ಕಳು ಮನವಿ ಮಾಡಿದರು.

ನಗರದ ಬಟವಾಡಿಯ ಸಮಾಜ ಕಲ್ಯಾಣ ಇಲಾಖೆಯ ಸರ್ಕಾರಿ ಮೆಟ್ರಿಕ್‌ ನಂತರದ ಬಾಲಕಿಯರ ಹಾಸ್ಟೆಲ್‌ನಲ್ಲಿ 12 ಜನ ಇರಬೇಕಾದ ಕೊಠಡಿಗೆ 20 ವಿದ್ಯಾರ್ಥಿನಿಯರನ್ನು ತುಂಬಿಸಿದ್ದಾರೆ. ಇದರಿಂದ ಕೊಠಡಿಯಲ್ಲಿ ಕೂತು ಓದುವುದು ಕಷ್ಟವಾಗುತ್ತಿದೆ. ಕುರಿ ಮಂದೆಯಂತೆ ಎಲ್ಲರನ್ನು ಒಂದೇ ಕಡೆ ಹಾಕಿದ್ದಾರೆ.

ನಗರದ ಎಸ್‌ಎಸ್‌ಐಟಿ ಕಾಲೇಜಿನ ಬಳಿಯ ಅಲ್ಪಸಂಖ್ಯಾತರ ಕಲ್ಯಾಣ ಇಲಾಖೆಯ ವಿದ್ಯಾರ್ಥಿನಿಯರ ಹಾಸ್ಟೆಲ್‌ನಲ್ಲಿ ಒಂದೊಂದು ಸಲ ಇಡೀ ದಿನ ನೀರು ಬರುವುದಿಲ್ಲ. ಕುಡಿಯಲು ಸಹ ನೀರು ಇಲ್ಲದಂತಹ ಪರಿಸ್ಥಿತಿ ನಿರ್ಮಾಣವಾಗುತ್ತದೆ. ನೀರು ಕಾಯಿಸಲು ಉಪಯೋಗಿಸುವ ಗೀಸರ್‌ ಕೆಟ್ಟು ಮೂಲೆ ಸೇರಿವೆ. ಮೂರು ಗೀಸರ್‌ನಲ್ಲಿ ಒಂದು ಮಾತ್ರ ಸರಿಯಾಗಿದೆ. ಫ್ಯಾನ್‌ಗಳು ಸಹ ಹಾಳಾಗಿದ್ದು, ಕನಿಷ್ಠ ರಿಪೇರಿ ಸಹ ಮಾಡಿಸಿಲ್ಲ.

ನಗರ ಸೇರಿದಂತೆ ಜಿಲ್ಲೆಯ ವಿವಿಧೆಡೆ ಇರುವ ಹಾಸ್ಟೆಲ್‌ಗಳನ್ನು ಸರಿಯಾದ ರೀತಿಯಲ್ಲಿ ನಿರ್ವಹಣೆ ಮಾಡುತ್ತಿಲ್ಲ. ತುಂಬಾ ಕಡೆ ಸಿಬ್ಬಂದಿ, ವಾರ್ಡನ್‌ಗಳ ಕೊರತೆ ಇದೆ. ಅಡುಗೆ ಮಾಡುವವರೇ ಶೌಚಾಲಯ ಸ್ವಚ್ಛಗೊಳಿಸಬೇಕಾದ ಪರಿಸ್ಥಿತಿ ಇದೆ. ಸೆಕ್ಯೂರಿಟಿ ಕೊರತೆ ತುಂಬಾ ಕಾಡುತ್ತಿದೆ. ಯಾರು, ಯಾವಾಗ ಬೇಕಾದರೂ ಹಾಸ್ಟೆಲ್‌ಗೆ ಪ್ರವೇಶ ಪಡೆಯಬಹುದಾಗಿದೆ. ಹೊಸಬರು ಬಂದರೂ ಅವರನ್ನು ವಿಚಾರಿಸಲು ಯಾರೊಬ್ಬರೂ ಇರುವುದಿಲ್ಲ. ಕೆಲವು ಹಾಸ್ಟೆಲ್‌ಗಳು ಅಕ್ರಮ ಚಟುವಟಿಕೆಗಳ ತಾಣಗಳಾಗಿ ಬದಲಾಗಿವೆ.

‘ಹಾಸ್ಟೆಲ್‌ನ ಬಹುತೇಕ ವಿದ್ಯಾರ್ಥಿಗಳು ರಾತ್ರಿ ಸಮಯದಲ್ಲಿ ಹೊರಗಡೆ ಇರುತ್ತಾರೆ. ತಮಗೆ ತಿಳಿದಾಗ ಹಾಸ್ಟೆಲ್‌ ಸೇರಿಕೊಳ್ಳುತ್ತಾರೆ. ಇದಕ್ಕೆ ಕಡಿವಾಣ ಬೀಳುತ್ತಿಲ್ಲ. ಇದರಿಂದ ಚೆನ್ನಾಗಿ ಓದಬೇಕು, ಉತ್ತಮ ಅಂಕ ಪಡೆದು ಒಳ್ಳೆಯ ಉದ್ಯೋಗ ಗಳಿಸಬೇಕು ಎಂಬ ಕನಸು ಹೊತ್ತು ಹಾಸ್ಟೆಲ್‌ ಸೇರಿದ ವಿದ್ಯಾರ್ಥಿಗಳೂ ಹಾಳಾಗುತ್ತಿದ್ದಾರೆ’ ಎಂದು ಹೆಸರೇಳಲು ಬಯಸದ ಸಿಬ್ಬಂದಿಯೊಬ್ಬರು ಬೇಸರ ವ್ಯಕ್ತಪಡಿಸಿದರು.