ಮೂಲೆ ಗುಂಪಾದ ಮೂಡಲಪಾಯ: ಕೊನೇಹಳ್ಳಿ ಯಕ್ಷಗಾನ ಕೇಂದ್ರಕ್ಕೆ ಬೇಕಿದೆ ಮರುಜೀವ

ತಿಪಟೂರು: ಸಂಗೀತ, ಕುಣಿತ, ಅಲಂಕಾರ, ನೃತ್ಯ, ಸಾಹಿತ್ಯ, ಸಂಭಾಷಣೆ, ಅಭಿನಯ ವೇಷಭೂಷಣಗಳ ಸಮ್ಮಿಳಿತವಾಗಿರುವ ಮೂಡಲಪಾಯ ಯಕ್ಷಗಾನ ಅವಸಾನದ ಅಂಚು ತಲುಪಿದೆ. ಈ ಕಲಾಪ್ರಕಾರ ಇಂದು ಪ್ರೋತ್ಸಾಹವಿಲ್ಲದೆ ಸೊರಗುತ್ತಿದೆ.

ಕಲಾ ಪೋಷಕರಾದ ಬಿ.ನಂಜುಡಪ್ಪ, ಭಾಗವತರಾಗಿದ್ದ ಪಟೇಲ್ ನರಸಪ್ಪ ಹಾಗೂ ಜನಪದ ತಜ್ಞ ಜಿ.ಶಂ.ಪರಮಶಿವಯ್ಯ ಮೊದಲಾದವರು ಸೇರಿ ಕೊನೇಹಳ್ಳಿಯಲ್ಲಿ ಮೂಡಲಪಾಯ ಯಕ್ಷಗಾನ ಪುನಃಶ್ಚೇತನಕ್ಕೆ 1969ರಲ್ಲಿ ಬಿದಿರೆಯಮ್ಮ ಯಕ್ಷಗಾನ ಮಂಡಳಿ ಸ್ಥಾಪಿಸಿದರು. ಕೊನೇಹಳ್ಳಿಗೆ ‘ಮೂಡಲಪಾಯ ಯಕ್ಷಗಾನ ಕಲಾಕಾಶಿ’ ಎಂಬ ಬಿರುದು ಬಂತು. ಈ ಕಲೆಯ ಪುನರುತ್ಥಾನಕ್ಕಾಗಿ ಇದೇ ಮಂಡಳಿಯಿಂದ 1982ರಲ್ಲಿ ಮೂಡಲಪಾಯ ಯಕ್ಷಗಾನ ಟ್ರಸ್ಟ್ ಕೂಡ ಸ್ಥಾಪಿಸಲಾಯಿತು. 1983ರಲ್ಲಿ ಕೊನೇಹಳ್ಳಿಯಲ್ಲಿ ಯಕ್ಷಗಾನ ಬಯಲು ರಂಗಮಂದಿರ ನಿರ್ಮಾಣವಾಯಿತು.

ಸತತ ಪರಿಶ್ರಮದಿಂದ ರೂಪಿಸಿದ ಮೂಡಲಪಾಯ ತಂಡವು ಕರ್ನಾಟಕ, ದೆಹಲಿ, ಮುಂಬೈ, ಚೆನ್ನೈ, ಕೋಲ್ಕತ್ತ, ನಾಗಪುರ, ಒಡಿಶಾ, ಹೈದರಾಬಾದ್‌ ಸೇರಿದಂತೆ ವಿವಿಧೆಡೆ ನಡೆದ ಉತ್ಸವಗಳಲ್ಲಿ ಭಾಗಿಯಾಯಿತು. ರಾಷ್ಟ್ರೀಯ ಯಕ್ಷಗಾನ ಮೇಳಗಳಲ್ಲಿ ಪ್ರದರ್ಶನ ನೀಡಿತು. ಆಕಾಶವಾಣಿಯಲ್ಲಿ ಹಲವು ಪ್ರಸಂಗಗಳು ಪ್ರಸಾರಗೊಂಡಿತು.

ಇಲ್ಲಿನ ಮೂಡಲಪಾಯ ಯಕ್ಷಗಾನ ಟ್ರಸ್ಟ್ ಸಹಯೋಗದಲ್ಲಿ ಎಲ್.ಆರ್.ಹೆಗ್ಗಡೆ, ಎಂ.ಎಸ್.ಸುಂಕಾಪುರ, ಎಚ್.ಎಲ್.ನಾಗೇಗೌಡ ಅವರು ಭಾಗವತರು, ಹಿರಿಯ ಯಕ್ಷಗಾನ ಕಲಾವಿದರು, ವಿದ್ವಾಂಸರು ಸೇರಿದಂತೆ 30 ಯಕ್ಷಗಾನ ತಂಡಗಳನ್ನು ಆಹ್ವಾನಿಸಿ 10 ದಿನ ಮೂಡಲಪಾಯ ಕಮ್ಮಟ ಆಯೋಜಿಸಿದ್ದರು. ಈ ಕೇಂದ್ರದ ಮಕ್ಕಳು ದೆಹಲಿಯ ರಾಷ್ಟ್ರೀಯ ನಾಟಕ ಶಾಲೆಯ ಬಾಲಸಂಗಮ್ ಉತ್ಸವದಲ್ಲಿ ಯಕ್ಷಗಾನ ಪ್ರದರ್ಶನಗಳನ್ನು ನೀಡಿದ್ದರು. ಈ ಎಲ್ಲ ಕಾರಣದಿಂದಾಗಿ ಮೂಡಲಪಾಯ ಯಕ್ಷಗಾನವು ತನ್ನ ಅಂತಸತ್ವವನ್ನು ಸ್ವಲ್ಪಮಟ್ಟಿಗೆ ಜೀವಂತವಾಗಿಡುವಲ್ಲಿ ಸಹಕಾರಿಯಾಗಿದೆ.

ಯಾವುದೇ ರಾಜಾಶ್ರಯವಿಲ್ಲದೆ ಬೆಳೆದ ಈ ಕಲೆ ಇಂದಿಗೂ ಉಳಿಯಲು ನೂರಾರು ಭಾಗವತರು, ಹಿಮ್ಮೇಳದವರು, ತಬಲ, ಮೃದಂಗ, ಮುಖವೀಣೆ ಮುಂತಾದ ವಾದ್ಯಗಾರರು, ಸಾವಿರಾರು ಸಂಖ್ಯೆಯ ಕಲಾವಿದರು, ವಸ್ತ್ರವಿನ್ಯಾಸಕರು ಹಾಗೂ ಅಲಂಕಾರಿಕ ಒಡವೆಗಳ ತಯಾರಕರ 
ಶ್ರಮ ಮುಖ್ಯವಾಗಿದೆ.

ಸೊರಗುತ್ತಿರುವ ಮೂಡಲಪಾಯ ಯಕ್ಷಗಾನ ಕಲೆಯನ್ನು ಪ್ರೋತ್ಸಾಹಿಸಿ ಉಳಿಸಲು ಅನೇಕರು ಶ್ರಮಿಸುತ್ತಿದ್ದಾರೆ. ಸರ್ಕಾರ ಮತ್ತು ಸಂಘ ಸಂಸ್ಥೆಗಳು ಜಾನಪದ ಲೋಕದೊಂದಿಗೆ ಕೈಜೋಡಿಸಿದರೆ ಸಾಂಸ್ಕೃತಿಕ ಲೋಕದ ಅಸ್ಮಿತೆ, ಗತಕಾಲದ ವೈಭವ ಮರುಕಳಿಸಲು ಸಾಧ್ಯ ಎನ್ನುತ್ತಾರೆ ಸ್ಥಳೀಯರು.