ಮೂಡಲ್ ಕುಣಿಗಲ್ ಕೆರೆ ನೋಡಲು ಜನರ ದಂಡು

ಕುಣಿಗಲ್: ಇತಿಹಾಸ ಪ್ರಸಿದ್ಧ ಮೂಡಲ್ ಕುಣಿಗಲ್ ದೊಡ್ಡ ಕೆರೆ ತುಂಬಿ ಕೋಡಿ ಹರಿಯುತ್ತಿದ್ದು, ಭಾನುವಾರ ಸಾವಿರಾರು ಜನರು ಕೋಡಿ ಪ್ರದೇಶಕ್ಕೆ ಭೇಟಿ ನೀಡಿ ನೀರಿನಲ್ಲಿ ಮಿಂದು ಸಂಭ್ರಮಿಸಿದರು.

ಮಳೆ ನೀರಿನ ಜತೆಗೆ ಹೇಮಾವತಿ ನೀರು ಸೇರಿರುವುದರಿಂದ ದೊಡ್ಡಕೆರೆ ಮಂಗಳವಾರ ಕೋಡಿಯಾಗಿದ್ದರೂ, ಶುಕ್ರವಾರದಿಂದ ನೀರಿನ ಹರಿವು ಹೆಚ್ಚಾಗಿದೆ. ನೀರಿನ ರಭಸ ಹೆಚ್ಚಾಗಿದ್ದು, ಜಲಪಾತದ ಮಾದರಿಯಲ್ಲಿ ಧುಮ್ಮಕುತ್ತಿರುವುದು ಜನರ ಗಮನ ಸೆಳೆಯುತ್ತಿದೆ.

ಕೋಡಿ ಪ್ರದೇಶಕ್ಕೆ ಸಾವಿರಾರು ಜನರು ವಾಹನಗಳಲ್ಲಿ ಬಂದು ಅಡ್ಡಾದಿಡ್ಡಿ ವಾಹನ ನಿಲ್ಲಿಸಿ ಭೇಟಿ ನೀಡುತ್ತಿರುವುದರಿಂದ ತುಮಕೂರು- ಕುಣಿಗಲ್ ರಸ್ತೆ ಸಂಚಾರ ವ್ಯತ್ಯಯವಾಗಿತ್ತು. ಸಂಬಂಧಪಟ್ಟ ಅಧಿಕಾರಿಗಳು ಮತ್ತು ಪೊಲೀಸರು ಗಮನಹರಿಸಬೇಕು ಎಂದು ಸ್ಥಳೀಯರು ಮನವಿ ಮಾಡಿದ್ದಾರೆ.