ಗುಬ್ಬಿ | ಉರುಳಿದ ಮರ: ಕುಸಿದ ಗೋಡೆ

ಗುಬ್ಬಿ: ತಾಲ್ಲೂಕಿನಲ್ಲಿ ಶುಕ್ರವಾರ ರಾತ್ರಿ ಸುರಿದ ಮಳೆಗೆ ಹಲವೆಡೆ ಮನೆಗಳ ಗೋಡೆ ಕುಸಿದಿದೆ. ಮರಗಳು ಧರೆಗೆ ಉರುಳಿದರೆ, ಪಟ್ಟಣದಲ್ಲಿ ಚರಂಡಿಗಳು ಕಟ್ಟಿ ರಸ್ತೆಯ ಮೇಲೆ ನೀರು ಹರಿದಿದೆ. ಹಲವು ಬಡಾವಣೆಗಳ ತಗ್ಗಿನ ಮನೆ ಹಾಗೂ ಮಳಿಗೆಗಳಿಗೆ ನೀರು ನುಗ್ಗಿತ್ತು.

ಗುಬ್ಬಿ-ಚೇಳೂರು ರಸ್ತೆಯಲ್ಲಿ ರೈಲ್ವೆ ಕೆಳಸೇತುವೆ ಸಂಪೂರ್ಣ ಜಲಾವೃತಗೊಂಡು ಸಾರ್ವಜನಿಕರು ತಿರುಗಾಡಲು ಸಾಧ್ಯವಾಗದಂತಾಗಿತ್ತು.

ಪಟ್ಟಣದ ಮಾರನಕಟ್ಟೆ ದಿಣ್ಣೆಯಿಂದ ಬಂದ ನೀರು ರಸ್ತೆಯಲ್ಲಿ ಹರಿದು ವಾಹನ ಸಂಚಾರಕ್ಕೆ ಅಡ್ಡಿಯಾಗಿತ್ತು.

ಎರಡು ದಿನಗಳಲ್ಲಿ ತಾಲ್ಲೂಕಿನಲ್ಲಿ ಸುರಿದ ಮಳೆಯಿಂದಾಗಿ ಒಟ್ಟು ಏಳು ಮನೆಗಳು ಕುಸಿದು ಬಿದ್ದಿವೆ. ಕಸಬ ಹೋಬಳಿಯಲ್ಲಿ 4, ಕಡಬ ನಿಟ್ಟೂರು ಹಾಗೂ ಹಾಗಲವಾಡಿಗಳಲ್ಲಿ ತಲಾ ಒಂದು ಮನೆಗಳ ಗೋಡೆ ಕುಸಿದಿದೆ. ಹಲವೆಡೆ ತೆಂಗು ಮತ್ತು ಅಡಿಕೆ ಮರಗಳು ಮುರಿದು ಬಿದ್ದಿವೆ. ಕಸಬಾ ಹೋಬಳಿ ಕಿಟ್ಟದ್ದಕುಪ್ಪೆ- ತೊರೆಹಳ್ಳಿ ಸಂಪರ್ಕಿಸುವ ಸೇತುವೆ ಮೇಲೆ ನೀರು ಹರಿಯಲು ಪ್ರಾರಂಭಿಸಿದೆ.

ತಾಲ್ಲೂಕಿನಲ್ಲಿ ಉತ್ತಮವಾಗಿ ಮಳೆ ಆಗುತ್ತಿದ್ದು ತಾಲ್ಲೂಕು ಆಡಳಿತ ಪರಿಸ್ಥಿತಿ ಎದುರಿಸಲು ಸಕಲ ಸಿದ್ಧತೆ ನಡೆಸಿದೆ. ಮನೆಗಳು ಕುಸಿದು ಬಿದ್ದಿರುವ ಸಂತ್ರಸ್ತರಿಗೆ ಈಗಾಗಲೇ ಪರಿಹಾರ ಒದಗಿಸಲಾಗಿದೆ.

-ಆರತಿ ಬಿ. ತಹಶೀಲ್ದಾರ್