ಪಾವಗಡ | 800 ಗ್ರಾಂ ಗಾಂಜಾ ವಶ: ಆರೋಪಿಗಳ ಬಂಧನ

ಪಾವಗಡ: ಪಟ್ಟಣದ ಹುಲಿಬೆಟ್ಟ ತಾಂಡ ಮಾರ್ಗದ ಬಳಿ ಗಾಂಜಾ ಸಾಗಿಸುತ್ತಿದ್ದ ಇಬ್ಬರು ಆರೋಪಿಗಳನ್ನು ಪಟ್ಟಣ ಠಾಣೆ ಪೊಲೀಸರು ಮಂಗಳವಾರ ರಾತ್ರಿ ಬಂಧಿಸಿದ್ದಾರೆ.

ಆಂಧ್ರದ ಚೆರ್ಲಪಲ್ಲಿ ಗ್ರಾಮದ ಗೌಸಿಮುದ್ದೀನ್(28), ಪಿ. ರೊಪ್ಪ ಗ್ರಾಮದ ಕುಮಾರ್ ಬಂಧಿತರು.

ಪಟ್ಟಣದ ಹೊರವಲಯದ ಹುಲಿಬೆಟ್ಟ ತಾಂಡದ ಬಳಿಯ ರಸ್ತೆಯಲ್ಲಿ ಆಟೊದಲ್ಲಿ ಗಾಂಜಾ ಸಾಗಿಸುತ್ತಿರುವ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ಪಟ್ಟಣದ ಠಾಣೆ ಪೊಲೀಸರು ದಾಳಿ ನಡೆಸಿದ್ದಾರೆ. ಆಟೊದಲ್ಲಿದ್ದ 800 ಗ್ರಾಂ ಗಾಂಜಾ, ಆಟೊವನ್ನು ವಶಪಡಿಸಿಕೊಂಡು ಆರೋಪಿಗಳನ್ನು ಬಂಧಿಸಿದ್ದಾರೆ.

ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.