ಕೆರೆಯ ಕೂಗು: ಶೆಟ್ಟಿಹಳ್ಳಿ ಕೆರೆ ನಿರ್ವಹಣೆಯೇ ಸವಾಲು

ತುಮಕೂರು: ನಗರ ಹೊರವಲಯದ ರಿಂಗ್‌ ರಸ್ತೆಗೆ ಹೊಂದಿಕೊಂಡಂತೆ ಇರುವ ಶೆಟ್ಟಿಹಳ್ಳಿ ಕೆರೆ ಸೂಕ್ತ ನಿರ್ವಹಣೆ ಇಲ್ಲದೆ ಸೊರಗುತ್ತಿದೆ. ರಸ್ತೆಯ ಕಡೆ ಇರುವ ಏರಿಗೆ ತಂತಿ ಬೇಲಿ ಅಳವಡಿಸಿದ್ದು ಬಿಟ್ಟರೆ ಬೇರೆ ಯಾವುದೇ ಅಭಿವೃದ್ಧಿ ಕಾರ್ಯ ನಡೆದಿಲ್ಲ.

13 ಎಕರೆ ಪ್ರದೇಶದ ಕೆರೆಯು 5.23 ಎಂಸಿಎಫ್‌ಟಿ ನೀರಿನ ಸಂಗ್ರಹ ಸಾಮರ್ಥ್ಯ ಹೊಂದಿದೆ. ಕೆರೆ ಭಾಗಶಃ ಒತ್ತುವರಿಯಾಗಿದ್ದು, ತೆರವುಗೊಳಿಸಲು ಮಹಾನಗರ ಪಾಲಿಕೆ ಯಾವುದೇ ಯೋಜನೆ ರೂಪಿಸಿಲ್ಲ. ಪ್ರಭಾವಿ ಮುಖಂಡರು, ಬಲಾಢ್ಯರು ಕೆರೆಯ ಜಾಗ ಒತ್ತುವರಿ ಮಾಡಿಕೊಂಡಿದ್ದು, ತೆರವಿಗೆ ಅಧಿಕಾರಿಗಳು ಹಿಂದೇಟು ಹಾಕುತ್ತಿದ್ದಾರೆ. ಈ ಹಿಂದೆ ನಡೆಸಿದ ಸರ್ವೆಯ ಆಧಾರದ ಮೇಲೆಯೇ ಯಾವುದೇ ಒತ್ತುವರಿಯಾಗಿಲ್ಲ ಎಂದು ಹೇಳುತ್ತಿದ್ದಾರೆ.

ಈ ಹಿಂದೆ ಪಾಲಿಕೆಯ ಅನುದಾನದಲ್ಲಿ ಕೆರೆಯ ಅಭಿವೃದ್ಧಿಗೆ ಚಾಲನೆ ನೀಡಲಾಗಿತ್ತು. ಈಗ ಎಲ್ಲ ಕೆಲಸಗಳು ಅರ್ಧಕ್ಕೆ ನಿಂತಿವೆ. ಹೂಳು ತೆಗೆಯುವ ಕಾರ್ಯವೂ ಮುಂದುವರಿದಿಲ್ಲ. ನಗರದ ಇತರೆ ಕೆರೆಗಳಂತೆ ಶೆಟ್ಟಿಹಳ್ಳಿ ಕೆರೆಯೂ ತ್ಯಾಜ್ಯ, ಪ್ಲಾಸ್ಟಿಕ್‌ನಿಂದ ಕಲುಷಿತಗೊಂಡಿದೆ. ಕೆರೆಯ ಮುಂಭಾಗದಲ್ಲಿಯೇ ಕಸ ವಿಲೇವಾರಿ ಘಟಕ ಇದ್ದು, ಅಲ್ಲಿನ ತ್ಯಾಜ್ಯವೂ ಕೆರೆ ಸೇರುತ್ತಿದೆ.

ಶೆಟ್ಟಿಹಳ್ಳಿ ಸುತ್ತಮುತ್ತಲಿನ ಜನರು ಮನೆ, ಮಾಂಸದಂಗಡಿ ತ್ಯಾಜ್ಯ ತಂದು ಕೆರೆಗೆ ಸುರಿದಿದ್ದಾರೆ. ಏರಿಯ ಪಕ್ಕದಲ್ಲಿಯೇ ಗುಡಿಸಲು ಹಾಕಿಕೊಂಡು ವಾಸಿಸುತ್ತಿರುವ ವಲಸೆ ಕಾರ್ಮಿಕರು ಇದರಿಂದ ಹೈರಾಣಾಗಿದ್ದಾರೆ. ಕಲುಷಿತ ನೀರು ಗಬ್ಬು ವಾಸನೆ ಬೀರುತ್ತಿದ್ದು, ಮೂಗು ಮುಚ್ಚಿಕೊಂಡು ಓಡಾಡುವಂತಾಗಿದೆ.

‘ನಗರದ ಕಲುಷಿತ ನೀರನ್ನು ಚರಂಡಿ, ರಾಜಕಾಲುವೆ ಮುಖಾಂತರ ಕೆರೆಗೆ ಹರಿಸುವುದೇ ಪಾಲಿಕೆಯ ಅಧಿಕಾರಿಗಳ ಕೆಲಸವಾಗಿದೆ. ಕೆರೆಗಳ ಉಳಿವಿಗೆ ಯಾರೊಬ್ಬರೂ ಮುಂದಾಗುತ್ತಿಲ್ಲ. ನೀರಿನ ಸಂಗ್ರಹಕ್ಕೆ ಕೆರೆ–ಕಟ್ಟೆ ಬಿಟ್ಟರೆ ಬೇರೆ ಜಾಗ ಏನಿದೆ? ಈ ಬಗ್ಗೆ ಕನಿಷ್ಠ ಪ್ರಜ್ಞೆ ಇಲ್ಲ?’ ಎಂದು ಶೆಟ್ಟಿಹಳ್ಳಿ ನಿವಾಸಿ ರಾಮಾಂಜಿನಿ ಪ್ರಶ್ನಿಸಿದರು.

‘ನಗರದ ಎಲ್ಲ ಕೆರೆಗಳ ನೀರಿನ ಮೂಲ ರಾಜಕಾಲುವೆಗಳು. ಮಳೆ ಸುರಿದಾಗ ಕಾಲುವೆ ಮುಖಾಂತರವೇ ನೀರು ಕೆರೆ ಸೇರುತ್ತದೆ. ಆದರೆ ರಾಜಕಾಲುವೆಗೆ ಕಲುಷಿತ ನೀರು ಹರಿಯುವುದನ್ನು ತಪ್ಪಿಸಿಲ್ಲ. ಚರಂಡಿಯಿಂದ ಕೆರೆಗೆ ನೀರು ಹರಿಯುವುದನ್ನೂ ತಡೆದಿಲ್ಲ. ಅಧಿಕಾರಿಗಳು ಯಾವುದಕ್ಕೂ ಇಚ್ಛಾಶಕ್ತಿ ತೋರದೆ ಹಲವು ಕೆರೆ–ಕಟ್ಟೆಗಳು ಅವನತಿಯತ್ತ ಸಾಗಿವೆ’ ಎಂದು ಬೇಸರಿಸಿದರು.

‘ಕೆರೆ ರಕ್ಷಣೆ, ನಿರ್ವಹಣೆಗೆ ಒಂದು ಸಮಗ್ರ ಯೋಜನೆ ರೂಪಿಸಬೇಕು. ಅಗತ್ಯ ಅನುದಾನ ನೀಡಿ ಅಭಿವೃದ್ಧಿ ಕಾರ್ಯ ಕೈಗೊಳ್ಳಬೇಕು. ಆಗ ಮಾತ್ರ ಕೆರೆಗಳ ಉಳಿವು ಸಾಧ್ಯ’ ಎಂದು ನಗರದ ಶ್ರೀನಿವಾಸ್‌ ಅಭಿಪ್ರಾಯಪಟ್ಟರು.