ಜಾನಪದ ಕಲೆಗೆ ಹೆಸರಾದ ಶಿರಾ: ಬಿ.ಕೆ.ಮಂಜುನಾಥ್

ಶಿರಾ: ಜುಂಜಪ್ಪನ ಪದಗಳ ಮೂಲಕ ಶಿರಾ ತಾಲ್ಲೂಕು ಜಾನಪದ ಕಲೆ ಮತ್ತು ಸಂಸ್ಕೃತಿಗೆ ಹೆಸರು ವಾಸಿಯಾಗಿರುವುದು ಸಂತಸದ ವಿಷಯವಾಗಿದೆ ಎಂದು ರಾಜ್ಯ ತೆಂಗು ಅಭಿವೃದ್ಧಿ ನಿಗಮದ ಮಾಜಿ ಅಧ್ಯಕ್ಷ ಬಿ.ಕೆ.ಮಂಜುನಾಥ್ ಹೇಳಿದರು.

ತಾಲ್ಲೂಕಿನ ಬೇವಿನಹಳ್ಳಿ ಜುಂಜಪ್ಪ ಸಾಂಸ್ಕೃತಿಕ ಸೇವಾ ಕಲಾ ಟ್ರಸ್ಟ್‌ ಮತ್ತು ಕನ್ನಡ ಮತ್ತು ಸಾಂಸ್ಕೃತಿಕ ಇಲಾಖೆ ಸಹಯೊಗದೊಂದಿಗೆ ಹಮ್ಮಿಕೊಂಡಿದ್ದ ಮೂಲ ಜಾನಪದ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ತಾಲ್ಲೂಕು ತನ್ನದೇ ಆದ ಜನಪದ ಇತಿಹಾಸ ಹೊಂದಿದೆ. ಜನಪದ ಕಲೆ ಮತ್ತು ಕಲಾವಿದರು ಗ್ರಾಮೀಣ ಭಾರತದ ತಾಯಿ ಬೇರುಗಳಿದ್ದಂತೆ. ಜನಜೀವನ ಮತ್ತು ಉನ್ನತ ಸಾಂಸ್ಕೃತಿಕ ಪರಂಪರೆ ಬಿಂಬಿಸುವ ಜನಪದ ಕಲೆ ಗ್ರಾಮೀಣ ಭಾರತದ ಜೀವಾಳವಾಗಿದೆ ಎಂದರು.

ಮಲೆ ಮಹದೇಶ್ವರ ಸಾಂಸ್ಕೃತಿಕ ಸೇವಾ ಟ್ರಸ್ಟ್ ತಂಡದ ಸಂಸ್ಥಾಪಕ ಏಕತಾರಿ ರಾಮಯ್ಯ ತಂಡ ಮತ್ತು ಜಾನಪದ ಕಲಾವಿದ ಮೋಹನ್‌ ಕುಮಾರ್ ಜಾನಪದ ಗಾಯನದಲ್ಲಿ ಕಾಡುಗೊಲ್ಲ ಬುಡಕಟ್ಟಿನ ವಿವಿದ ಸೊಲ್ಲು ಜತೆ ಗಣೆ ವಾದನ ತಂಬೂರಿ ಮುಂತಾದ ಸಂಗೀತ ವಾದ್ಯಗಳೊಂದಿಗೆ ಜುಂಜಪ್ಪನ ಪದಗಳ ಹಾಡುತ್ತ ಕಾರ್ಯಕ್ರಮಕ್ಕೆ ಮೆರುಗು ನೀಡಿದರು.

ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಶಾರದಮ್ಮ, ಸದಸ್ಯರಾದ ಮಮತಾ, ಕವಿತಾ, ಪಟೇಲ್ ಕೃಷ್ಣಗೌಡ, ಬೇವಿನಹಳ್ಳಿ ಸುದರ್ಶನ್, ಗಣೆ ರಾಮಣ್ಣ ಇದ್ದರು.