ತುಮಕೂರು | ಬಾಲಕಿ ಮೇಲೆ ದೌರ್ಜನ್ಯ: 20 ವರ್ಷ ಸಜೆ

ತುಮಕೂರು: 15 ವರ್ಷದ ಬಾಲಕಿಯನ್ನು ಪುಸಲಾಯಿಸಿ, ಮದುವೆಯಾಗಿ ನಿರಂತರವಾಗಿ ಲೈಂಗಿಕ ದೌರ್ಜನ್ಯ ವೆಸಗಿದ ಕರೆಚಿತ್ತಪ್ಪ ಎಂಬಾತನಿಗೆ ಪೋಕ್ಸೊ ನ್ಯಾಯಾಲಯ 20 ವರ್ಷ ಜೈಲು ಶಿಕ್ಷೆ, ₹1.50 ಲಕ್ಷ ದಂಡ ವಿಧಿಸಿದೆ.

ಕರೆಚಿತ್ತಪ್ಪಗೆ ಮದುವೆಯಾಗಿ ಇಬ್ಬರು ಮಕ್ಕಳಿದ್ದರೂ ಬಾಲಕಿಯನ್ನು ಪುಸಲಾಯಿಸಿ 2021ರ ಸೆ. 18ರಂದು ಮದುವೆಯಾಗಿದ್ದ. ಬಾಲಕಿ ಮೇಲೆ ಲೈಂಗಿಕ ದೌರ್ಜನ್ಯ ವೆಸಗಿದ್ದ. ಅಮೃತೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಕುಣಿಗಲ್‌ ಇನ್‌ಸ್ಪೆಕ್ಟರ್‌ ವಿ.ಎಂ.ಗುರುಪ್ರಸಾದ್‌ ತನಿಖೆ ನಡೆಸಿ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಿದ್ದರು.

ಪೋಕ್ಸೊ ನ್ಯಾಯಾಲಯದ ನ್ಯಾಯಾಧೀಶರು ಮಂಗಳವಾರ ವಿಚಾರಣೆ ನಡೆಸಿದರು. ಕರೆಚಿತ್ತಪ್ಪ ವಿರುದ್ಧ ಆರೋಪ ಸಾಬೀತಾದ ಕಾರಣ ಶಿಕ್ಷೆ ವಿಧಿಸಿ ಆದೇಶಿಸಿದರು. ಬಾಲಕಿ ಪರವಾಗಿ ಕೆ.ಎಸ್‌.ಆಶಾ ವಾದ ಮಂಡಿಸಿದ್ದರು.