ಉಡುಪಿ | ಮತ್ಸ್ಯ ಕ್ಷಾಮ: ನಾಡ ದೋಣಿ ಮೀನುಗಾರರಿಗಿಲ್ಲ ಲಾಭ

ಉಡುಪಿ: ಮಳೆಗಾಲದಲ್ಲಿ ಟ್ರಾಲಿಂಗ್ ನಿಷೇಧ ಜಾರಿಗೆ ಬರುತ್ತಿದ್ದಂತೆ ನಾಡದೋಣಿಗಳ ಮೀನುಗಾರಿಕೆ ಗರಿಗೆದರುತ್ತದೆ. ಆದರೆ ಈ ಬಾರಿ ಗಾಳಿ, ಬಿರುಸಿನ ಮಳೆ ಜೊತೆಗೆ ಮತ್ಸ್ಯ ಕ್ಷಾಮದಿಂದ ನಾಡದೋಣಿ ಮೀನುಗಾರರು ಕಂಗೆಟ್ಟಿದ್ದಾರೆ.

ಎರಡು ತಿಂಗಳು ದೊಡ್ಡ ಬೋಟ್‌ಗಳು ಕಡಲಿಗಿಳಿಯದ ಕಾರಣ ನಾಡದೋಣಿ ಮೀನುಗಾರರಿಗೆ ಅದು ಸುಗ್ಗಿ ಕಾಲ. ಈ ಅವಧಿಯಲ್ಲಿ ಮೀನುಗಳ ಪೂರೈಕೆ ಕೊರತೆ ಇರುವುದರಿಂದ ಅವರು ಹಿಡಿದು ತರುವ ಮೀನಿಗೆ ಎಲ್ಲಿಲ್ಲದ ಬೇಡಿಕೆ ಇರುತ್ತದೆ.

ಈ ಬಾರಿ ಟ್ರಾಲಿಂಗ್ ನಿಷೇಧ ತೆರವಾಗಲು ಇನ್ನು ಕೆಲ ದಿನಗಳಷ್ಟೇ ಬಾಕಿ ಉಳಿದಿವೆ. ಆದರೆ ಮೀನುಗಾರಿಕೆಗೆ ತೆರಳಿದರೂ ಮೀನು ಸಿಗದೆ ಬರಿಗೈಯಲ್ಲಿ ವಾಪಾಸಾಗುವ ಸ್ಥಿತಿ ಇದೆ. ನಾಡದೋಣಿಗೆ ಸಮುದ್ರದಲ್ಲಿ ಹೆಚ್ಚು ದೂರ ಹೋಗಿ ಮೀನುಗಾರಿಕೆ ನಡೆಸಲು ಸಾಧ್ಯವಿಲ್ಲ. ದಡದ ಸಮೀಪದಲ್ಲಿ ಮೀನುಗಳೇ ಸಿಗುತ್ತಿಲ್ಲ. ಮೀನು ಸಿಗದೆ ದೋಣಿಯ ಎಂಜಿನ್‌ಗೆ ಹಾಕಿದ ಸೀಮೆಎಣ್ಣೆ ವೆಚ್ಚವೂ ನಷ್ಟವಾಗುತ್ತದೆ ಎಂದು ಮೀನುಗಾರರು ಅಳಲು ತೋಡಿಕೊಳ್ಳುತ್ತಾರೆ.

ಕಂತಲೆ, ಪಟ್ಟಬಲೆ, ಟ್ರಾಲ್, ಕೈರಂಪಣಿ ವಿಧಾನಗಳ ಮೂಲಕ ನಾಡದೋಣಿಯಲ್ಲಿ ಮೀನುಗಾರಿಕೆ ನಡೆಸಲಾಗುತ್ತದೆ. ಮೀನು ಯಥೇಚ್ಛವಾಗಿ ದೊರಕಿದರೆ ಅದನ್ನು ದೋಣಿಯಲ್ಲಿ ಹೋದವರು ಸಮಾನವಾಗಿ ಹಂಚಿಕೊಳ್ಳುತ್ತಾರೆ. ನಾಡದೋಣಿಗಳನ್ನು ಹೊಂದಿರುವ ಹೆಚ್ಚಿನವರು ಅವರೇ ಮೀನುಗಾರಿಕೆಗೆ ತೆರಳುತ್ತಾರೆ.

ಮೀನು ಸಿಗದಿದ್ದರೂ ದೋಣಿಯಲ್ಲಿ ತೆರಳಿದ ಮೀನುಗಾರರಿಗೆ ₹200ರಿಂದ ₹300 ಬೋನಸ್‌ ಕೊಡಬೇಕಾಗುತ್ತದೆ. ಸೀಮೆ ಎಣ್ಣೆ, ಬೋನಸ್‌  ಸೇರಿ ಕೈಯಿಂದ ಹಣ ಖರ್ಚಾಗುತ್ತದೆ. ಸೀಮೆಎಣ್ಣೆ ದರ ಲೀಟರ್‌ಗೆ ₹70 ಗಡಿ ದಾಟಿದೆ. ಇದರಿಂದ ಮೀನುಗಾರಿಕೆ ದುಬಾರಿಯಾಗಿದೆ ಎನ್ನುತ್ತಾರೆ ಮಲ್ಪೆಯ ನಾಡದೋಣಿ ಮಾಲೀಕ ನವೀನ್ ಜತ್ತನ್‌.

ಸಿಗಡಿ, ಬಂಗುಡೆ ಮೊದಲಾದ ಮೀನುಗಳು ಸಿಕ್ಕಿದರೆ ಹೆಚ್ಚು ಲಾಭ. ಆದರೆ ಈ ಸಲ ಸಮುದ್ರಕ್ಕೆ ತೆರಳಿದರೂ ಅಂತಹ ಮೀನುಗಳೇ ಸಿಗುತ್ತಿಲ್ಲ ಎನ್ನುತ್ತಾರೆ ಅವರು.

ಮಲ್ಪೆಯಲ್ಲಿ ಅಂದಾಜು 1,200 ನಾಡ ದೋಣಿಗಳಿವೆ. ಆದರೆ ಈ ಬಾರಿ ಎಲ್ಲರಿಗೂ ನಷ್ಟ ಉಂಟಾಗಿದೆ. ಮೀನುಗಾರರು ಬೆಳಿಗ್ಗೆ ತೆರಳಿ ಸಂಜೆ ವಾಪಸ್‌ ಬರುತ್ತಾರೆ. ಈ ಬಾರಿ ಸಮುದ್ರಕ್ಕೆ ತೆರಳಿ ಮೀನುಗಾರಿಕೆ ನಡೆಸಿದರೂ ಬಂಗುಡೆ, ಬೂತಾಯಿಯಂತಹ ಮೀನುಗಳ ಕ್ಷಾಮ ಎದುರಾಗಿದೆ ಎನ್ನುತ್ತಾರೆ ಸಾಂಪ್ರದಾಯಿಕ ನಾಡ ದೋಣಿ ಮೀನುಗಾರರ ಸಂಘದ ಅಧ್ಯಕ್ಷ‌‌ ಸುಂದರ್‌ ಸಾಲ್ಯಾನ್‌.

ಸಮುದ್ರದ ಅಲೆಗಳ ಅಬ್ಬರಕ್ಕೆ ಅಂಜಿ ಮೀನುಗಾರಿಕೆಗೆ ತೆರಳಿದ್ದ ನಾಡದೋಣಿ ಮೀನುಗಾರರು ಹಲವು ಸಲ ವಾಪಸ್‌ ಬಂದಿದ್ದಾರೆ ಎಂದು ಅವರು ತಿಳಿಸಿದರು.