ಆನ್‌ಲೈನ್ ಮೂಲಕ ಹಣ ಪಡೆದು ವಂಚನೆ

ಕಾರ್ಕಳ: ಆನ್‌ಲೈನ್ ಮೂಲಕ ಕಂಪನಿಯೊಂದರಲ್ಲಿ ಕೆಲಸಕ್ಕೆ ಸೇರಿದ್ದ ಮಹಿಳೆಗೆ ₹7 ಲಕ್ಷ ವಂಚಿಸಲಾಗಿದೆ.

ಆನ್‌ಲೈನ್‌ ಮಾದರಿಯ ಕೆಲಸಕ್ಕೆ ಸೇರಿದ ಮಹಿಳೆಯ ಸಂಬಳ 4800 ಡಾಲರ್ ಪಡೆಯಲು ಕಂಪನಿಯೇ ಕೊಟಕ್ ಬ್ಯಾಂಕ್ ಖಾತೆ ತೆರೆಸಿ ಸ್ಕ್ರೀನ್ ಶಾಟ್ ಕಳುಹಿಸಿ ನಂಬಿಸಿದೆ. ಖಾತೆಗೆ ₹2.50 ಲಕ್ಷವನ್ನೂ ಹಾಕಿತ್ತು. ಆ ಮೊತ್ತವನ್ನು ಖಾತೆಯಿಂದ ಪಡೆದುಕೊಳ್ಳಲು ಕಂಪನಿಯ ರಿಮೋಟ್ ಪರ್ಮಿಟ್ ಪಡೆದುಕೊಳ್ಳಬೇಕು. ರಿಮೋಟ್ ಪರ್ಮಿಟ್‌ಗೆ ಹಣ ನೀಡಬೇಕು ಎಂದು ನಂಬಿಸಿ ₹7ಲಕ್ಷವನ್ನು ಕಂಪನಿಯ ಬೇರೆ ಬೇರೆ ಖಾತೆಗಳಿಗೆ ವಿವಿಧ ಸಂದರ್ಭಗಳಲ್ಲಿ ಮಹಿಳೆಯಿಂದ ಹಾಕಿಸಿಕೊಳ್ಳಲಾಗಿತ್ತು.

ಬಳಿಕ ಸಂಬಳ ಹಾಗೂ ಮಹಿಳೆ ಆನ್‌‌ಲೈನ್ ಮೂಲಕ ಪಾವತಿಸಿದ ಹಣವನ್ನೂ ನೀಡದೆ ಮೋಸ ಮಾಡಲಾಗಿದೆ ಎಂದು ಪುಷ್ಪಾ ಎಂಬುವರು ಕಾರ್ಕಳ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.