ಹೆಬ್ರಿ | ಕೊಚ್ಚಿಹೋದ ಕಾಲುಸಂಕ: ಸಂಪರ್ಕ ಕಡಿತ

ಹೆಬ್ರಿ: ಭಾನುವಾರ ಸುರಿದ ಭಾರಿ ಮಳೆಗೆ ಮುದ್ರಾಡಿ ಗ್ರಾಮದ ಕಬ್ಬಿನಾಲೆಯ ಮತ್ತಾವಿಗೆ ಹೋಗಲು ಹಾಕಿರುವ ಮರದ ಕಾಲು ಸಂಕ (ಪಾಪು) ನೀರಿನಲ್ಲಿ ಕೊಚ್ಚಿಹೋಗಿ ಮತ್ತಾವು ಸಂಪರ್ಕ ಕಡಿತಗೊಂಡಿದೆ.

ಇಲ್ಲಿನ ಸಮಸ್ಯೆಯ ಬಗ್ಗೆ ಮೂಲಸೌಕರ್ಯ, ಗ್ರಾಮದ ಅಭಿವೃದ್ಧಿಗೆ ಒತ್ತಾಯಿಸಿ 2005ರ ಜುಲೈ 28ರಂದು ಮತ್ತಾವು ಬಳಿ ಗ್ರೆನೇಡ್‌ ನೆಲಬಾಂಬ್ ಸ್ಫೋಟಿಸಿ ನಕ್ಸಲರು ರಾಜ್ಯದ ಗಮನ ಸೆಳೆದಿದ್ದರು. ಕಬ್ಬಿನಾಲೆ ನಕ್ಸಲ್ ಬಾಂಬ್ ದಾಳಿಗೆ 19 ವರ್ಷಗಳು ಕಳೆದಿವೆ. ಆದರೆ ಮತ್ತಾವಿನ ಸೇತುವೆ ಕನಸು ಮಾತ್ರ ಇನ್ನೂ ಕನಸಾಗಿಯೇ ಉಳಿದಿದೆ.

ಈ ಭಾಗದಲ್ಲಿ 11 ಮಲೆಕುಡಿಯ ಕುಟುಂಬಗಳು ವಾಸಿಸುತ್ತಿವೆ. ಈ‌ ಕುಟುಂಬಗಳು ಕಬ್ಬಿನಾಲೆ ಹೆಬ್ರಿ ಮುನಿಯಾಲು ಸಂಪರ್ಕಿಸಬೇಕಾದರೆ ಈ ಮರದ ಕಾಲುಸಂಕ ಮೂಲಕವೇ ನಿತ್ಯ ದಾಟಬೇಕು. 3 ವರ್ಷಗಳಲ್ಲಿ ಮಳೆಗಾಲದಲ್ಲಿ 4 ಬಾರಿ ಮರದ ಕಾಲುಸಂಕಗಳು ಕಬ್ಬಿನಾಲೆ ನದಿ ಹರಿವಿಗೆ ಕೊಚ್ಚಿಕೊಂಡು ಹೋಗಿವೆ.

ಸಂಪರ್ಕವಿಲ್ಲ: ಕಬ್ಬಿನಾಲೆ ನದಿ ಸೆಳೆತಕ್ಕೆ ಮರದ ಸೇತುವೆ ಕೊಚ್ಚಿಕೊಂಡು ಹೋದರೆ 3 ತಿಂಗಳು ಪೇಟೆಯ ಸಂಪರ್ಕವಿಲ್ಲ. ಪಶ್ಚಿಮ ಘಟ್ಟಗಳ ಸಾಲಿನಲ್ಲಿ ಹರಿದು ಬರುವ ಕಬ್ಬಿನಾಲೆ ನದಿಯಲ್ಲಿ ಅಪಾರ ಪ್ರಮಾಣದಲ್ಲಿ ನೀರು ಹರಿಯುತ್ತದೆ.‌ ಮರದ ಕಾಲು ಸಂಕದ ಮೇಲೆ ಸಾಗಲು ಕಬ್ಬಿಣದ ಸರಿಗೆ ಹಿಡಿದು ಸಾಗಬೇಕು. ಸೇತುವೆ ಗಟ್ಟಿಯಾಗಿಸಲು ಕಬ್ಬಿಣದ ಸರಿಗೆಯಿಂದ ಮರಕ್ಕೆ ಬಿಗಿಯಲಾಗಿದೆ. ಗರ್ಭಿಣಿ ಮಹಿಳೆಯರು, ಅನಾರೋಗ್ಯ ಸಮಸ್ಯೆ ಉಂಟಾದರೆ ಹೋಗುವುದೇ ಸವಾಲಾಗಿದೆ.

ಪ್ರಯತ್ನಗಳು ನಡೆಯುತ್ತಿವೆ: ಮತ್ತಾವು ಮರದ ಕಾಲುಸಂಕ ಕೊಚ್ಚಿ ಹೋಗಿರುವ ಬಗ್ಗೆ ಮಾಹಿತಿ ಬಂದಿದೆ. ಇಲ್ಲಿ ಸೇತುವೆ ನಿರ್ಮಾಣದ ಬಗ್ಗೆ ಬಹಳ ಸಮಯದಿಂದ ಪ್ರಯತ್ನಗಳು ನಡೆಯುತ್ತಿವೆ. ಕೆಆರ್‌ಡಿಎಲ್ ಮೂಲಕ ತಗಲುವ ವೆಚ್ಚದ ಬಗ್ಗೆ ಅಂದಾಜು ಪಟ್ಟಿ ತಯಾರಿಸಿದ್ದಾರೆ. ಅಂದಾಜು ಪಟ್ಟಿ ಸಿಕ್ಕಿದ ಬಳಿಕ ಬೆಂಗಳೂರಿನ ಕೇಂದ್ರ ಕಚೇರಿಗೆ ಜಿಲ್ಲಾಧಿಕಾರಿ ಮೂಲಕ ಪ್ರಸ್ತಾವನೆ ಸಲ್ಲಿಸುತ್ತೇವೆ. ಶೀಘ್ರದಲ್ಲೇ ಕ್ರಮ ಜರುಗುವ ಬಗ್ಗೆ ವಿಶ್ವಾಸವಿದೆ ಎಂದು ಐಟಿಡಿಪಿ ಉಡುಪಿ ಯೋಜನಾ ಸಮನ್ವಯಾಧಿಕಾರಿ ನಾರಾಯಣ ಸ್ವಾಮಿ ತಿಳಿಸಿದರು.