ಹೆಬ್ರಿ: ಹಡಿಲು ಕೃಷಿ ಭೂಮಿಯಲ್ಲಿ ಭತ್ತನಾಟಿ

ಹೆಬ್ರಿ: ತುಂಡುಭೂಮಿ, ನೆರೆ, ಕಾಡು ಪ್ರಾಣಿಗಳ ಹಾವಳಿ, ದನ ಕರುಗಳ ಕಾಟ, ಆದಾಯಕ್ಕಿಂತ ಖರ್ಚು ಜಾಸ್ತಿ, ನೀರಿನ ಸಮಸ್ಯೆ ಹೀಗೆ ಹಲವು ಸಮಸ್ಯೆಯಿಂದಾಗಿ ಕುಡಿಬೈಲು ಪರಿಸರದಲ್ಲಿ ಹಡಿಲು ಬಿಟ್ಟಿದ್ದ ಹತ್ತಾರು ರೈತರ ಭೂಮಿಯನ್ನು ಕೃಷಿ ಉಳಿಸುವ ಉದ್ದೇಶದಿಂದ ಕುಚ್ಚೂರು ಕುಡಿಬೈಲು ಶಾಂತಿನಿಕೇತನ ಯುವವೃಂದದ ಸದಸ್ಯರು ಕೃಷಿ ಮಾಡಲು ಮುಂದಾಗಿದ್ದಾರೆ.

ಸಂಘದ ಎಲ್ಲಾ ಯುವ ಸದಸ್ಯರು ಸೇರಿಕೊಂಡು ಈ ಯೋಜನೆಗೆ ಕೈ ಹಾಕಿದ್ದಾರೆ. ಲಾಕ್‌ಡೌನ್ ಸಮಯದಲ್ಲಿ ಹಡಿಲು ಭೂಮಿ ಕೃಷಿ ಮಾಡಿದಾಗ ಬಹಳ ನಷ್ಟ ಉಂಟಾಗಿತ್ತು. ಸದಸ್ಯರೆಲ್ಲರೂ ಸೇರಿ ನಷ್ಟ ಭರಿಸಿದ್ದರು. ಆದರೂ ಕೆಲವು ರೈತರು ವಿವಿಧ ಸಮಸ್ಯೆಯಿಂದ ಹಡಿಲು ಬಿಟ್ಟಾಗ ಕೃಷಿ ಉಳಿಸಿ ಬೆಳೆಸುವ ಉದ್ದೇಶದಿಂದ ಹಡಿಲು ಭೂಮಿ ಕೃಷಿಗೆ ಮತ್ತೆ ಕೈ ಹಾಕಿದ್ದಾರೆ.

ಸಂಘದ ಸದಸ್ಯರ ಸಹಕಾರ: ಈ ವರ್ಷ ಬೃಹತ್ ಪ್ರಮಾಣದಲ್ಲಿ ಕೃಷಿ ಮಾಡುತ್ತಿರುವುದರಿಂದ ಸಂಘದ ಸದಸ್ಯರು ಎಲ್ಲ ಕೆಲಸಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುತ್ತಿದ್ದಾರೆ. ಕೃಷಿ ಕೂಲಿ ಆಳುಗಳಿಂದ ಕೆಲಸ ಮಾಡಿಸಿದರೆ ಮತ್ತಷ್ಟು ಖರ್ಚು ಬರುವುದರಿಂದ, ಸದಸ್ಯರೇ ಎಲ್ಲ ಕೆಲಸಗಳನ್ನು ಉಚಿತವಾಗಿ ಮಾಡುತ್ತಾರೆ. ಗದ್ದೆಯಲ್ಲಿ ಉಳುಮೆಯಿಂದ ಕೊಯ್ಲು ತನಕ ಸಂಪೂರ್ಣ ಸಾವಯವ ಕೃಷಿ ಪ್ರಕ್ರಿಯೆಗಳು ನಡೆಯುತ್ತವೆ. ರಾಸಾಯನಿಕ ಗೊಬ್ಬರ ಬಳಸದೆ, ಸ್ಥಳೀಯ ಸಂಘ ಸದಸ್ಯರು, ರೈತರ ಮನೆಯ ದನದ ಗೊಬ್ಬರ ಬಳಸಲಾಗುತ್ತದೆ.

ನೆರೆ, ಕಾಡುಪ್ರಾಣಿಗಳ ಭೀತಿ: ಸದ್ಯಕ್ಕೆ 300 ಮೀಟರ್ ಬೇಲಿ ಹಾಕಲಾಗಿದೆ. ಜೋರಾಗಿ ಮಳೆ ಬರುವುದರಿಂದ ನೆರೆ ಭೀತಿ ಇದೆ. ಬೀಡಾಡಿ ದನಗಳು ನಿರಂತರವಾಗಿ ಗದ್ದೆಗಳಿಗೆ ಬಂದು ಲೂಟಿ ಮಾಡುತ್ತವೆ. ನವಿಲು, ಜಿಂಕೆ, ಹಂದಿಗಳ ಹಾವಳಿ ತಪ್ಪಿಸಿ ಕೃಷಿ ಮಾಡಿದರೆ ಒಂದಷ್ಟು ಮಟ್ಟಿಗೆ ಬೆಳೆ ಕೈಗೆ ಸಿಗಬಹುದು. ಬಯಲು ಗದ್ದೆ ಆಗಿರುವುದರಿಂದ ಹುಲ್ಲು ಸಿಗುವುದು ಕಷ್ಟ. ನೀರಾವರಿ ಸಮಸ್ಯೆ ಕಾಡಬಹುದು. ಶ್ರೀಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯ ತಾಲ್ಲೂಕು ಯೋಜನಾಧಿಕಾರಿ ಲೀಲಾವತಿ, ಕೃಷಿ ಅಧಿಕಾರಿ ಉಮೇಶ್, ಯಂತ್ರಶ್ರೀ ಯೋಧ ಕೃಷ್ಣ ನಾಯ್ಕ್ ಬೆಳ್ವೆ ಅವರ ಸಹಕಾರದೊಂದಿಗೆ ಕೆಲಸ ನಡೆಯಲಿದೆ. ಸಂಘಕ್ಕೆ ವಿಶೇಷ ದರದಲ್ಲಿ ಮ್ಯಾಟ್ ನೇಜಿ ದೊರಕಲಿದೆ ಎಂದು ನರೇಂದ್ರ ಎಸ್‌. ಮರಸಣಿಗೆ ಮಾಹಿತಿ ನೀಡಿದರು.

ಕಜೆ ಬ್ರ್ಯಾಂಡ್‌ಗೆ ಡಿಮಾಂಡ್: ಲಾಕ್‌ಡೌನ್‌ ಸಮಯದಲ್ಲಿ ಕೆಲಸ ಇಲ್ಲದಿದ್ದಾಗ ಯುವಕರೆಲ್ಲ ಹಡಿಲು ಭೂಮಿ ಕೃಷಿ ಮಾಡುವ ಯೋಜನೆಗೆ ಕೈ ಹಾಕಿದ್ದರು. ನಷ್ಟವಾದರೂ ಒಂದೆರಡು ವರ್ಷ ಮಾಡಿದ್ದರು. ಸಂಪೂರ್ಣ ಸಾವಯುವ ಕೃಷಿ ಆದ್ದರಿಂದ ಶಾಂತಿನಿಕೇತನ ಕಜೆ ಬ್ರಾಂಡಿಗೆ ಹೆಬ್ರಿಯಲ್ಲೆಲ್ಲ ಬಹಳಷ್ಟು ಬೇಡಿಕೆ ಇತ್ತು. ಪ್ರತಿ ವರ್ಷ ಬಳಕೆದಾರರು ಕಜೆ ಅಕ್ಕಿ ನೀಡಿ ಎಂದು ಕೇಳುತ್ತಿದ್ದಾರೆ ಎಂದು ಶಾಂತಿನಿಕೇತನ ಯುವವೃಂದದ ಅಧ್ಯಕ್ಷ ದೀಕ್ಷಿತ್ ನಾಯಕ್ ‍ತಿಳಿಸಿದರು.