ಕಾರಂತರಿಗೆ ಹುಟ್ಟೂರ ಕಾಳಜಿ ಅಪಾರ

ಬ್ರಹ್ಮಾವರ: ಕಾರಂತರಿಗೆ ಹುಟ್ಟೂರ ಬಗ್ಗೆ ಅಪಾರವಾದ ಕಾಳಜಿ ಕಲ್ಪನೆ ಇದ್ದವು. ಹೀಗಾಗಿ, ಕರಾವಳಿಯ ಕಡಲ ತಡಿಯಲ್ಲಿ ವಾಸಿಸುವವರ ಬಗ್ಗೆ ಕಡಲ್ಕೊರೆತದ ಬಗ್ಗೆ ಆಗಾಗ ಧ್ವನಿ ಎತ್ತುತ್ತಿದ್ದರು ಎಂದು ಕರ್ಣಾಟಕ ಬ್ಯಾಂಕ್‌ನ ನಿವೃತ್ತ ಪ್ರಬಂಧಕ ಕೋಡಿ ಚಂದ್ರಶೇಖರ ನಾವಡ ಹೇಳಿದರು.

ಸಾಲಿಗ್ರಾಮದ ಕಾರಂತ ರಂಗ ರಥದಲ್ಲಿ ಡಾ.ಕೋಟ ಶಿವರಾಮ ಕಾರಂತ ರಿಸರ್ಚ್ ಸ್ಟಡಿ ಸೆಂಟರ್ ಟ್ರಸ್ಟ್‌ ಮತ್ತು ಕಾರ್ಕಡ ಗೆಳೆಯರ ಬಳಗದ ಆಶ್ರಯದಲ್ಲಿ ನಡೆದ ಕಾರಂತರ 25ನೇ ಸ್ಮೃತಿ ದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಪರಿಸರ ಪ್ರೇಮಿಯಾಗಿ, ಸಮಾಜದ ಕುಂದು ಕೊರತೆಗಳ ಬಗ್ಗೆ ಸರ್ಕಾರದ ಕದ ತಟ್ಟುತ್ತಿದ್ದರು. ಆಂಗ್ಲ ಮಾಧ್ಯಮ ಶಿಕ್ಷಣದ ವಿರುದ್ಧವೂ ಧ್ವನಿ ಎತ್ತಿದ್ದರು ಎಂದು ಹೇಳಿದ ಅವರು, ಕಡಲ ಕಿನಾರೆಯ ಸ್ಥಳವನ್ನು ವಿಶ್ರಾಂತಿಗಾಗಿ ಆಯ್ಕೆ ಮಾಡಿಕೊಂಡು ಸಮಾಜದ ಪರಿಸ್ಥಿತಿಯ ಬಗ್ಗೆ ಹೆಚ್ಚಿನ ಒಲವು ತೋರಿದ್ದರು ಎಂದರು.

ಕನ್ನಡ ಸಾಹಿತ್ಯ ಪರಿಷತ್ತಿನ ಉಡುಪಿ ಜಿಲ್ಲಾ ಘಟಕದ ಅಧ್ಯಕ್ಷ ನೀಲಾವರ ಸುರೇಂದ್ರ ಅಡಿಗ ಮಾತನಾಡಿ, ಕಾರಂತರು ಒಬ್ಬ ವ್ಯಕ್ತಿಯಾಗಿರದೆ ಬಹುದೊಡ್ಡ ಶಕ್ತಿಯಾಗಿದ್ದರು ಎಂದು ಹೇಳಿದರು.

ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಜಿಲ್ಲಾ ಸಂಘ ಚಾಲಕ ನಾರಾಯಣ ಶೆಣೈ ಪುಷ್ಪ ನಮನ ಸಲ್ಲಿಸಿದರು.

ಗೆಳೆಯರ ಬಳಗದ ಅಧ್ಯಕ್ಷ ಕೆ.ತಾರಾನಾಥ ಹೊಳ್ಳ, ಕಾರಂತ ವಿಶ್ವಸ್ಥ ಮಂಡಳಿಯ ಸದಸ್ಯ ಗುಜ್ಜಾಡಿ ಪ್ರಭಾಕರ ನಾಯಕ್‌, ಸದಸ್ಯರಾದ ಪಂಜು ಪೂಜಾರಿ, ಸಂದೀಪ್‌ ಶೆಟ್ಟಿ, ವಿಶ್ವನಾಥ ಕಾಮತ್‌ ಇದ್ದರು.

ಕಾರಂತ ವಿಚಾರಧಾರೆಯ ಕುರಿತು ಕೋಡಿ ಸೋಮಬಂಗೇರ ಪ್ರೌಢಶಾಲೆಯ ವಿದ್ಯಾರ್ಥಿಗಳಿಗೆ ನಡೆಸಿದ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು.

ಕಾರಂತ ರಿಸರ್ಚ್ ಸ್ಟಡಿ ಸೆಂಟರ್ ಟ್ರಸ್ಟ್‌ನ ಅಧ್ಯಕ್ಷ ಗುರುರಾಜ್ ರಾವ್ ನಿರೂಪಿಸಿದರು.