ಸರ್ವೇಯರ್ ಹುದ್ದೆ ನೇಮಕಾತಿ ಶೀಘ್ರ: ಸಚಿವ ಕೃಷ್ಣ ಬೈರೆಗೌಡ

ಕಾರವಾರ: ‘ಉತ್ತರ ಕನ್ನಡವೂ ಸೇರಿದಂತೆ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ಖಾಲಿ ಇರುವ ಭೂ ದಾಖಲೆಗಳ ಸಹಾಯಕ ನಿರ್ದೇಶಕ, ಸರ್ವೇಯರ್ ಹುದ್ದೆಗಳ ಭರ್ತಿಗೆ ಹಣಕಾಸು ಇಲಾಖೆ ಸಮ್ಮತಿಸಿದೆ. ಶೀಘ್ರವೇ ನೇಮಕಾತಿ ಪ್ರಕ್ರಿಯೆ ನಡೆಯಲಿದ್ದು ಖಾಲಿ ಹುದ್ದೆ ಭರ್ತಿ ಮಾಡುತ್ತೇವೆ’ ಎಂದು ಕಂದಾಯ ಇಲಾಖೆ ಸಚಿವ ಕೃಷ್ಣ ಬೈರೆಗೌಡ ತಿಳಿಸಿದರು.

‘ತಹಶೀಲ್ದಾರ್, ಉಪವಿಭಾಗಾಧಿಕಾರಿ ನ್ಯಾಯಾಲಯದಲ್ಲಿ ಬಾಕಿ ಇರುವ ಪ್ರಕರಣಗಳನ್ನು ಆರು ತಿಂಗಳ ಒಳಗೆ ಇತ್ಯರ್ಥಪಡಿಸಲು ಸೂಚಿಸಲಾಗಿದೆ. ರಾಜ್ಯದ 48 ಲಕ್ಷ ಜಮೀನುಗಳ ಮಾಲೀಕರು ಮೃತಪಟ್ಟರೂ ಜಾಗ ಅವರ ಹೆಸರಿನಲ್ಲೇ ಇನ್ನೂ ಇದೆ. ಅದನ್ನು ವಾರಸುದಾರ ಹೆಸರಿಗೆ ಹಸ್ತಾಂತರಿಸಲು ಪೌತಿ ಖಾತೆ ಆಂದೋಲನವನ್ನು ಶೀಘ್ರ ಆರಂಭಿಸಲಾಗುತ್ತದೆ’ ಎಂದು ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದರು.

‘ಸಾಗುವಳಿಗೆ ಸರ್ಕಾರಿ ಭೂಮಿ ಮಂಜೂರಾದರೂ ದುರಸ್ತಿ ಪೋಡಿ ಆಗದ ಜಮೀನುಗಳ ಪೋಡಿ ಮಾಡಿಸಲು ಕ್ರಮವಾಗುತ್ತಿದೆ. ಆರು ತಿಂಗಳೊಳಗೆ ಪ್ರಕ್ರಿಯೆ ಪೂರ್ಣಗೊಳಿಸಲು ಆದೇಶಿಸಲಾಗಿದೆ. ಇ-ಸ್ವತ್ತು ಸರಳೀಕರಣಗೊಳಿಸಲು ಸರ್ಕಾರವೂ ಚಿಂತನೆ ನಡೆಸಿದೆ. ಗ್ರಾಮೀಣಾಭಿವೃದ್ಧಿ, ಪೌರಾಡಳಿತ ಇಲಾಖೆ ಈ ದಿಶೆಯಲ್ಲಿ ಪ್ರಯತ್ನ ನಡೆಸಿವೆ’ ಎಂದರು.