ವಿಜಯನಗರ: ಧ್ವನಿಬೆಳಕಿನ ಪ್ರಭೆಗೆ ನಿರ್ವಹಣೆಯ ಕತ್ತಲು

ಹೊಸಪೇಟೆ (ವಿಜಯನಗರ): ಹಂಪಿಯ ಪ್ರಮುಖ ಸ್ಮಾರಕಗಳ ಬಳಿ ಧ್ವನಿಬೆಳಕಿನ ವ್ಯವಸ್ಥೆಗೆ ಕಲಬುರಗಿಯಲ್ಲಿ ಮಂಗಳವಾರ ನಡೆದ ಸಚಿವ ಸಂಪುಟದಲ್ಲಿ ಒಪ್ಪಿಗೆ ದೊರೆತು ₹45 ಕೋಟಿ ಅನುದಾನ ಒದಗಿಸಲು ನಿರ್ಧರಿಸಿದ್ದಕ್ಕೆ ಒಂದಿಷ್ಟು ಖುಷಿ ಇದ್ದರೂ, ನಿರ್ವಹಣೆ ಸವಾಲನ್ನೂ ಎದುರಿಸುವಂತಹ ಯೋಜನೆಯೂ ಇರಬೇಕು ಎಂಬ ಸಲಹೆಯೂ ಕೇಳಿಬಂದಿದೆ.

ವಿರೂಪಾಕ್ಷ ದೇವಸ್ಥಾನ ಮುಂಭಾಗದ ಸಾಲುಮಂಟಪಗಳಲ್ಲಿ ಖಾಸಗಿಯವರಿಂದ ಧ್ವನಿಬೆಳಕು ವ್ಯವಸ್ಥೆ ಕಳೆದ ಪ್ರವಾಸಿ ಋತುವಿನಲ್ಲಿ ನಡೆಯುತ್ತಿತ್ತು. ಆದರೆ ₹70 ಲಕ್ಷದಷ್ಟು ವಿದ್ಯುತ್ ಬಿಲ್‌ ಪಾವತಿ ವಿಚಾರ ದೊಡ್ಡ ವಿವಾದವಾಯಿತು. ಹೊಸ ಯೋಜನೆಯಲ್ಲಿ ಅಂತಹ ತೊಡಕು ಇರದಂತೆ ನೋಡಿಕೊಳ್ಳಬೇಕು ಎಂಬ ಸಲಹೆ ಸ್ಥಳೀಯರು ಮತ್ತು ಪ್ರವಾಸಿಗರದು.

ಕಮಲಾಪುರದ ಮಯೂರ ಹೋಟೆಲ್‌ ಸಮೀಪ ₹15 ಕೋಟಿ ವೆಚ್ಚದಲ್ಲಿ ಡಾರ್ಮೆಟರಿ ನಿರ್ಮಿಸಲು ಸಹ ಒಪ್ಪಿಗೆ ಸೂಚಿಸಿದ್ದು, ಪ್ರವಾಸಿಗರ ದಟ್ಟಣೆ ಅವಧಿಯಲ್ಲಿ ವಸತಿ ವ್ಯವಸ್ಥೆ ಸಿಕ್ಕೀತು ಎಂಬ ಆಶಾಭಾವನೆ ಮೂಡಿದೆ.

ರೂಪುರೇಷೆ ಸಿದ್ಧ:

‘ಹಂಪಿಯಲ್ಲಿ ಹತ್ತಾರು ಸ್ಮಾರಕಗಳಿದ್ದು, ಯಾವುದಕ್ಕೆಲ್ಲ ಧ್ವನಿ, ಬೆಳಕಿನ ವ್ಯವಸ್ಥೆ ಕಲ್ಪಿಸಬೇಕು ಎಂಬ ಬಗ್ಗೆ ಇದೀಗ ರೂಪುರೇಷೆ ಸಿದ್ಧಪಡಿಸಲಾಗುತ್ತಿದೆ’ ಎಂದು ಪ್ರವಾಸೋದ್ಯಮ ಇಲಾಖೆಯ ಜಂಟಿ ಆಯುಕ್ತ ಶ್ರೀನಿವಾಸ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಕಮಲಾಪುರದಲ್ಲಿ ಡಾರ್ಮೆಟರಿ ನಿರ್ಮಿಸಿ, ಅಲ್ಲಿ ಏಕಕಾಲದಲ್ಲಿ 200 ಮಂದಿ ತಂಗಬಹುದಾದ ವ್ಯವಸ್ಥೆ ಕಲ್ಪಿಸಲಾಗುವುದು. ಕೆಲವು ದಿನಗಳಲ್ಲಿ ಸ್ಪಷ್ಟ ಚಿತ್ರಣ ಲಭಿಸಲಿದೆ’ ಎಂದು ಅವರು ಹೇಳಿದರು.

ನಿರ್ವಹಣೆಯೇ ಸವಾಲು:

‘ಹಂಪಿ ಬಯಲು ವಸ್ತುಸಂಗ್ರಹಾಲಯ ಎಂದೇ ಪ್ರಸಿದ್ಧಿ ಪಡೆದಿದೆ. ಇಲ್ಲಿನ ಬಂಡೆಗಲ್ಲುಗಳು, ಸ್ಮಾರಕಗಳಿಗೆ ಬೆಳಕಿನ ಚಿತ್ತಾರವೂ ಸೇರಿದರೆ ಅದರ ಸೌಂದರ್ಯಕ್ಕೆ ಮಿತಿ ಇಲ್ಲ. ಈ ಹಿಂದೆ ವಿರೂಪಾಕ್ಷದಿಂದ ವಿಜಯವಿಠ್ಠಲ, ರಾಯರ ತುಲಾಭಾರ ತನಕ ಧ್ವನಿ ಬೆಳಕಿನ ವ್ಯವಸ್ಥೆ ಕಲ್ಪಿಸಲಾಗಿತ್ತು. ದುಬಾರಿ ಪ್ರವೇಶ ಶುಲ್ಕ, ನಿರ್ವಹಣೆ ಕೊರತೆಗಳಿಂದಾಗಿ ಯೋಜನೆ ಮೂಲೆಗುಂಪಾಯಿತು. ಇಂತಹ ತೊಡಕುಗಳನ್ನು ನಿವಾರಿಸಿಕೊಂಡು ಹೊಸ ಪರಿಕಲ್ಪನೆಯೊಂದಿಗೆ ನಿರ್ವಹಣೆ ಮಾಡುವ ಚಿಂತನೆಯೊಂದಿಗೆ ಯೋಜನೆ ರೂಪಿಸುವ ಅಗತ್ಯ ಇದೆ’ ಎಂದು ಹಲವು ವರ್ಷಗಳಿಂದ ಕೆಲಸ ಮಾಡುತ್ತಿರುವ ಪ್ರವಾಸಿ ಮಾರ್ಗದರ್ಶಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.

ಉಳಿದಂತೆ ಕೊಟ್ಟೂರಿಗೆ ಪ್ರಜಾಸೌಧ ನಿರ್ಮಾಣಕ್ಕೆ ಒಪ್ಪಿಗೆ ಸಿಕ್ಕಿದ್ದು ಬಿಟ್ಟರೆ ವಿಜಯನಗರ ಜಿಲ್ಲೆಗೆ ಹೇಳಿಕೊಳ್ಳುವಂತಹ ಯಾವುದೇ ಕೊಡುಗೆಯೂ ಸಿಕ್ಕಿಲ್ಲ. ಹೀಗಾಗಿ ಬಹಳ ನಿರೀಕ್ಷೆ ಇಟ್ಟುಕೊಂಡಿದ್ದ ಕಲಬುರಗಿ ಸಂಪುಟ ಸಭೆ ಹಂಪಿಗೆ ಒಂದಿಷ್ಟು ಖುಷಿ ತರಿಸಿದ್ದರೆ, ಜಿಲ್ಲೆಯ ಇತರ ಭಾಗಗಳಿಗೆ ನಿರಾಸೆಯನ್ನೇ ತಂದಿದೆ.