ಹಗರಿಬೊಮ್ಮನಹಳ್ಳಿ: ಡ್ರ್ಯಾಗನ್ ಫ್ರೂಟ್ ತೋಟಕ್ಕೆ ವಿದ್ಯಾರ್ಥಿಗಳ ಭೇಟಿ

ಹಗರಿಬೊಮ್ಮನಹಳ್ಳಿ: ತಾಲ್ಲೂಕಿನ ಅಂಕಸಮುದ್ರ ಗ್ರಾಮದ ಸರ್ಕಾರಿ ಪ್ರೌಢಶಾಲೆಯ 8 ಮತ್ತು 9ನೇ ತರಗತಿಯ 60ವಿದ್ಯಾರ್ಥಿಗಳು ಹಸಿರು ಮನೆ-ಇಕೋಕ್ಲಬ್ ಅಡಿಯಲ್ಲಿ ಶನಿವಾರ ಗ್ರಾಮದ ರೈತರೊಬ್ಬರ ಡ್ರ್ಯಾಗನ್ ಫ್ರೂಟ್ ತೋಟಕ್ಕೆ ಭೇಟಿ ನೀಡಿ, ಕೃಷಿ ಚಟುವಟಿಕೆಗಳನ್ನು ವೀಕ್ಷಿಸಿದರು.

ವಿಜ್ಞಾನ ವಿಷಯ ಶಿಕ್ಷಕಿ ಎಸ್.ಬಿ.ಲಕ್ಷ್ಮೀ ಮಾತನಾಡಿ, ‘ಡ್ರ್ಯಾಗನ್ ಫ್ರೂಟ್‍ನಲ್ಲಿ ಎಲ್ಲ ತರಹದ ಪೌಷ್ಟಿಕಾಂಶಗಳು, ಖನಿಜಾಂಶಗಳು, ವಿಟಮಿನ್‍ಗಳು ದೊರೆಯುತ್ತವೆ. ಮೂಳೆ ಮತ್ತು ಹಲ್ಲುಗಳ ಆರೋಗ್ಯಕ್ಕೆ ಈ ಹಣ್ಣು ಸಹಕಾರಿಯಾಗಿದೆ. ವಿಶೇಷವಾಗಿ ಮೂಳೆಗಳ ಸವಕಲು ತಡೆಯುತ್ತದೆ’ ಎಂದು ತಿಳಿಸಿದರು.

‘ತೋಟದ ಕೊಳವೆಬಾವಿಯಲ್ಲಿ ಕೇವಲ 2 ಇಂಚು ನೀರಿದ್ದು, 4 ಎಕರೆ ಫ್ರೂಟ್ ಬೆಳೆಯಲಾಗಿದೆ. ಈ ತೋಟಗಾರಿಕೆ ಕೃಷಿಗೆ ಕಡಿಮೆ ನೀರು ಸಾಕು. ಉತ್ತಮ ಲಾಭದಾಯಕವಾದ ಮಾರುಕಟ್ಟೆ ಇದೆ’ ಎಂದು ತಿಳಿಸಿದರು.

ಹಣ್ಣು ಜಾಮ್, ಸೋಪು ತಯಾರಿಕೆಗೆ ಹಣ್ಣು ಉಪಯೋಗಿಸಲಾಗುತ್ತದೆ ಎಂದು ರೈತ ಪೆದ್ದರಾಜು ಮಾಹಿತಿ ನೀಡಿದರು. ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಿದರು. ಅತಿಥಿ ಶಿಕ್ಷಕ ರಾಘವೇಂದ್ರ ಇದ್ದರು.