ಕೋಡಿಹಳ್ಳಿ ಚಂದ್ರಶೇಖರ್ ಧೋರಣೆಗೆ ಬೇಸರ: ರೈತ ಸಂಘದ ಪ್ರಧಾನ ಕಾರ್ಯದರ್ಶಿ ರಾಜೀನಾಮೆ

ಹೊಸಪೇಟೆ (ವಿಜಯನಗರ): ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ಸಂಘಟನೆ ರಾಜ್ಯ ಘಟಕದ ಪ್ರಧಾನ ಕಾರ್ಯದರ್ಶಿ ಸ್ಥಾನಕ್ಕೆ ಜೆ.ಕಾರ್ತಿಕ್ ಅವರು ಸೋಮವಾರ ರಾಜೀನಾಮೆ ನೀಡಿದ್ದಾರೆ.

‘ಸಂಘದ ರಾಜ್ಯ ಘಟಕದ ಅಧ್ಯಕ್ಷ ಕೋಡಿಹಳ್ಳಿ ಚಂದ್ರಶೇಖರ್ ಅವರ ಇಬ್ಬಗೆ ಮತ್ತು ಸರ್ವಾಧಿಕಾರಿ ನೀತಿಯಿಂದ ಬೇಸತ್ತು ರಾಜೀನಾಮೆ ನೀಡಿರುವೆ. 16 ವರ್ಷ ರೈತ ಸಂಘದಲ್ಲಿದ್ದು, ರೈತರಿಗಾಗಿ ಶ್ರಮಿಸಿದ ತೃಪ್ತಿ ಇದೆ’ ಎಂದು ಅವರು ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

‘ಕೋಡಿಹಳ್ಳಿ ವಿರುದ್ಧ ಈ ಹಿಂದೆ ಆರೋಪ ಕೇಳಿ ಬಂದಾಗ, ಅವರ ಬೆನ್ನಿಗೆ ನಿಂತಿದ್ದೆ. ಆದರೆ, ಈಗ ಅವರೇ ನನ್ನನ್ನು ಕಡೆಗಣಿಸಿದ್ದು ಬೇಸರ ಮೂಡಿಸಿದೆ’ ಎಂದರು.