ಮೈಲಾರ : ಸಿಡಿಲಿಗೆ ವ್ಯಕ್ತಿ ಬಲಿ

ಹೂವಿನಹಡಗಲಿ (ವಿಜಯನಗರ ಜಿಲ್ಲೆ) : ತಾಲ್ಲೂಕಿನ ಮೈಲಾರ ಗ್ರಾಮದಲ್ಲಿ ಶುಕ್ರವಾರ ಸಂಜೆ ಸಿಡಿಲು ಬಡಿದು ವ್ಯಕ್ತಿಯೊಬ್ಬರು ಮೃತಪಟ್ಟಿದ್ದಾರೆ.

ಗ್ರಾಮದ ಶಿವಪ್ಪ ಪುಟ್ಟಪ್ಪ ಚಂದಾಪುರ (58) ಮೃತರು. ಎಮ್ಮೆ ಮೇಯಿಸಲು ಇವರು ಅಡವಿಗೆ ಹೋಗಿದ್ದಾಗ ಸಿಡಿಲು ಎರಗಿದೆ. ಸಂಜೆ ಎಮ್ಮೆಗಳಷ್ಟೆ ಮನೆಗೆ ಹಿಂದಿರುಗಿದ್ದರಿಂದ ಕುಟುಂಬದ ಸದಸ್ಯರು ಆತಂಕಗೊಂಡು ಶೋಧ ನಡೆಸಿದಾಗ, ಹೊರ ವಲಯದಲ್ಲಿ ಸಿಡಿಲಿಗೆ ಶಿವಪ್ಪ ಮೃತಪಟ್ಟಿರುವುದು ಗೊತ್ತಾಗಿದೆ. ಸ್ಥಳಕ್ಕೆ ಕಂದಾಯ ಇಲಾಖೆ ಅಧಿಕಾರಿಗಳು, ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದರು