ಆಲಮಟ್ಟಿ: ಕೃಷ್ಣಾ ನದಿಯಲ್ಲಿ ಅಲಾಯಿ ದೇವರುಗಳ ಸ್ನಾನ

ಆಲಮಟ್ಟಿ: ಆಲಮಟ್ಟಿ ಸುತ್ತಮುತ್ತಲಿನ ನಾನಾ ಗ್ರಾಮಗಳಲ್ಲಿ ಐದು ದಿನಗಳ ಕಾಲ ಮೋಹರಂ ಹಬ್ಬದ ಪ್ರಯುಕ್ತ ಕೂಡುವ ನೂರಾರು ಅಲಾಯಿ ದೇವರುಗಳು, ಪಂಜಾಗಳ ಸ್ನಾನ ಶುಕ್ರವಾರ ಆಲಮಟ್ಟಿಯ ಕೃಷ್ಣೆಯ ಹಿನ್ನೀರಿನಲ್ಲಿ ನಡೆಯಿತು.

ಒಂದೊಂದು ಗ್ರಾಮದ ಅಲಾಯಿ ದೇವರುಗಳನ್ನು ಆ ಗ್ರಾಮದ ನೂರಾರು ಯುವಕರು ಹಲಗೆ ವಾದನದ ಮೂಲಕ ಕೃಷ್ಣಾ ನದಿಗೆ ತಂದು ಶೃದ್ಧಾ ಭಕ್ತಿಯಿಂದ ಸ್ನಾನ ಮಾಡಿಸಿ, ನಂತರ ನದಿ ದಂಡೆಯಲ್ಲಿ ಕಂಬಳಿ ಹಾಸಿ, ದೇವರುಗಳಿಗೆ ಹೂವಿನ ಅಲಂಕಾರ ಮಾಡಿ ಪೂಜೆ ಸಲ್ಲಿಸುತ್ತಿದ್ದ ದೃಶ್ಯ ಕಂಡು ಬಂತು.

ನಂತರ ಅಲಾಯಿ ದೇವರುಗಳನ್ನು ತಮ್ಮ ತಮ್ಮ ಗ್ರಾಮಗಳಿಗೆ ವಾಹನಗಳ ಮೂಲಕ ನಾನಾ ವಾದ್ಯಗಳ ಮಧ್ಯೆ ತೆಗೆದುಕೊಂಡು ಹೋಗುತ್ತಿದ್ದ ದೃಶ್ಯ ಕಂಡು ಬಂತು. ಐದು ದಿನಗಳ ಕಾಲ ಮೋಹರಂ ಆಚರಣೆ ಪ್ರತಿ ಗ್ರಾಮದಲ್ಲಿಯೂ ಶೃದ್ಧೆಯಿಂದ ಜರುಗಲಿದೆ.