ವಿಜಯಪುರ: ಬೈಕ್, ಮೊಬೈಲ್ ಕಳ್ಳರ ಬಂಧನ

ವಿಜಯಪುರ: ವಿಜಯಪುರ, ಮುಧೋಳ ಮತ್ತು ಜಮಖಂಡಿ ನಗರದಲ್ಲಿ ಬಹಳ ದಿನಗಳಿಂದ ಬೈಕ್‌, ಮೊಬೈಲ್‌ ಕಳವು ಮಾಡುತ್ತಿದ್ದ ಮೂವರು ಆರೋಪಿಗಳನ್ನು ವಿಜಯಪುರ ನಗರ ಪೊಲೀಸರು ಬಂಧಿಸಿರುವುದಾಗಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಋಷಿಕೇಶ ಸೋನಾವಣೆ ತಿಳಿಸಿದರು.

ನಗರದಲ್ಲಿ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಅವರು, ಮುಧೋಳ ತಾಲ್ಲೂಕಿನ ಚಿಂಚಗಂಡಿಯ ಸುನೀಲ ಗಡ್ಡಿ(31), ವಿಜಯಪುರ ನಗರದ ಜೆ.ಎಂ.ರಸ್ತೆಯ ಕೆ.ಎಚ್‌.ಬಿ ಕಾಲೊನಿಯ ಮೊಶಿನ್‌ ಕಲಾದಗಿ(24)ಮತ್ತು ಸದ್ಧಾಂ ಮುತವಲ್ಲಿ(20) ಬಂಧಿತ ಆರೋಪಿಗಳಾಗಿದ್ದಾರೆ ಎಂದರು.

ಆರೋಪಿಗಳ ಬಳಿಯಿಂದ ಅಂದಾಜು ₹15.60 ಲಕ್ಷ ಮೌಲ್ಯದ 26 ಬೈಕ್‌ಗಳನ್ನು ಹಾಗೂ ಅಂದಾಜು ₹2.90 ಲಕ್ಷ ಮೌಲ್ಯದ 29 ಮೊಬೈಲ್‌ ಸೆಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಅವರು ತಿಳಿಸಿದರು.