ಹೊರ್ತಿ: ಕಳೆ ನಾಶಕ್ಕೆ ಸೈಕಲ್ ಎಡೆಕುಂಟೆ ಬಳಕೆ

ಹೊರ್ತಿ: ಗ್ರಾಮೀಣ ಪ್ರದೇಶದ ಬಹುತೇಕ ಕೃಷಿ ಭೂಮಿಗಳಲ್ಲಿ ಮುಂಗಾರು ಮಳೆಯಿಂದ ಬೆಳೆಗಳ ನಡುವೆ ಚಿಗುರೊಡೆದ ಕಸ ತೆಗೆಯಲು ಹೊಡೆಯುವ ಎಡೆಕುಂಟೆ ಕಾರ್ಯ ಭರದಿಂದ ಸಾಗಿದೆ. ಏಕ ಚಕ್ರದ ಸೈಕಲ್‌ನಿಂದ ತಯಾರಿಸಿದ ಸಾಧನದಿಂದ ರೈತರು ಎಡೆಕುಂಟೆ ಹೊಡೆಯುತ್ತಿದ್ದಾರೆ.

ಕಳೆದ ತಿಂಗಳು ಅಲ್ಪಸ್ವಲ್ಪ ಸುರಿದ ಮುಂಗಾರು ಮಳೆಗೆ ಸಜ್ಜೆ, ಹೆಸರು, ಉದ್ದು, ತೊಗರಿ, ಸೊಯಾಬೀನ್, ಶೇಂಗಾ, ಗೋವಿನ ಜೋಳ ಸೇರಿದಂತೆ ಮೊದಲಾದ ಬೆಳೆಗಳನ್ನು ಬಿತ್ತನೆ ಮಾಡಲಾಗಿದೆ. ಈಗ ಬೆಳೆಗಳು ಈಗಷ್ಟೇ ಚನ್ನಾಗಿವೆ. ಅದರೂ ಮಳೆ ಕೊರತೆಯಲ್ಲಿ ಬಿತ್ತನೆ ಮಾಡಿದ 20 ದಿನದ ನಂತರ ರೈತರು ಎಡೆಕುಂಟೆ ಹೊಡೆಯುತ್ತಾರೆ.

‘ಈಚಿನ ವರ್ಷಗಳಲ್ಲಿ ಎತ್ತುಗಳ ಎಡೆಕುಂಟೆ ಹೊಡೆಸಲು ರೈತಾಪಿ ಜನ ಹಿಂದೇಟು ಹಾಕುತ್ತಿದ್ದಾರೆ. ಎಕರೆಗೆ ₹1,500 ರಿಂದ ₹2 ಸಾವಿರದ ವರೆಗೆ ಬಾಡಿಗೆ ಕೊಟ್ಟು ಎಡೆಕುಂಟೆ ಹೊಡೆಸಬೇಕಾಗಿದೆ. ಇಷ್ಟು ಹಣ ವ್ಯಯಿಸುವ ಬದಲು ಸೈಕಲ್‌ನಿಂದ ತಯಾರಿಸಿದ ಎಡೆಕುಂಟೆಯಿಂದ ದಿನಕ್ಕೆ ಸಂಜೆಯವರೆಗೆ ಒಂದು ಎಕರೆ ಭೂಮಿಯನ್ನು ಎಡೆ ಹೊಡೆಯುತ್ತೇವೆ. ಒಂದು ವೇಳೆ ಭೂಮಿಯ ನೆಲ ಬಿರುಸು ಆಗಿತ್ತು ಅಂದರೆ ಎರಡು ದಿನ ಎಡೆಕುಂಟೆ ಹೊಡೆಯಬೇಕಾಗುತ್ತದೆ. ಇದರಿಂದ ಬಾಡಿಗೆ ಮತ್ತು ಕೂಲಿ ಖರ್ಚು ಉಳಿತಾಯವಾಗುತ್ತದೆ’ ಎನ್ನುತ್ತಾರೆ ಕನಕನಾಳ ಗ್ರಾಮದ ರೈತ ಸಿದ್ಧರಾಯ ಖಿಲಾರಿ.

‘ಮಳೆಗೆ ಕೃಷಿ ಭೂಮಿಯಲ್ಲಿ ಬೆಳೆದ ಬೆಳೆ ಬಿಗಿದುಕೊಂಡಿರುತ್ತದೆ. ಒಳ್ಳೆಯ ಬೆಳವಣಿಗೆಗಾಗಿ ಮಣ್ಣನ್ನು ಸಡಿಲುಗೊಳಿಸಲು ಮತ್ತು ಬೆಳೆಯ ನಡುವೆ ಚಿಗುರೊಡೆದ ಕಳೆಯನ್ನು ನಾಶಪಡಿಸಲು ಎಡೆಕುಂಟೆ ಹೊಡೆಯಲಾಗುತ್ತದೆ. ಹೀಗೆ ಮಾಡುವುದರಿಂದ ಮಣ್ಣು ಬೆಳೆಗಳ ಬುಡಕ್ಕೆ ಹೋಗಿ ಬೀಳುತ್ತದೆ. ಇದರಿಂದ ಬೆಳೆಗಳ ಬೇರುಗಳು ಸಡಿಲುಗೊಂಡು ಸದೃಢವಾಗಿ, ನೇರವಾಗಿ ಬೆಳೆಯುತ್ತವೆ’ ಎನ್ನುತ್ತಾರೆ ರೈತರು.

‘ಭೂಮಿ ಬಿರುಸು ಆಗಿದ್ದರೆ ಎಡೆಕುಂಟೆಯನ್ನು ಸತತವಾಗಿ ಭಾರ ಹಾಕಿ ಮುನ್ನೂಕಬೇಕಾಗುತ್ತದೆ ಇದರಿಂದ ಕೈಯ ರಟ್ಟೆ ಎರಡು ದಿನ ನೋವಾಗುತ್ತವೆ’ ಎನ್ನುತ್ತಾರೆ ಜಿಗಜೇವಣಿಯ ರೈತ ರೇವಪ್ಪ ಮುತ್ತಪ್ಪ ಬಜಂತ್ರಿ

ಎತ್ತುಗಳ ಬೆಲೆ ಹೆಚ್ಚಿದೆ. ಅವುಗಳನ್ನು ಖರೀದಿಸಿ ತಂದು ಮೇವು ಹಾಕಿ ಜೋಪಾನ ಮಾಡಬೇಕು. ದನಗಳ ಚಾಕರಿಗಾಗಿ ಒಬ್ಬ ಆಳು ನಿತ್ಯ ದುಡಿಯುತ್ತಾನೆ. ಎಡೆಕುಂಟೆ ಉಪಕರಣಗಳ ಸಿದ್ಧಪಡಿಸುವ ಖರ್ಚು ಇವೆಲ್ಲವನ್ನೂ ಸರಿದೂಗಿಸಲು ಎಕರೆಗೆ ಆಳು ಸಹಿತ ₹2 ಸಾವಿರ, ಇಲ್ಲವೇ ದಿನದ ಬಾಡಿಗೆಯಂತೆ ಎಡೆಕುಂಟೆ ಹೊಡೆಯಲಾಗುತ್ತದೆ ಎನ್ನುತ್ತಾರೆ ಕನಕನಾಳದ ರೈತರಾದ ಲಕ್ಷ್ಮಣ ಖೈರಾವಕರ, ಅಣ್ಣಪ್ಪ ಖಿಲಾರಿ.

4 ಎಕರೆ ಹೊಲದಲ್ಲಿನ ಹೆಸರು ಶೆಂಗಾ ಮತ್ತು ಸಜ್ಜೆ ಬೆಳೆಯಲ್ಲಿನ ಕಳೆ ತೆಗೆಯಲು 4 ದಿನ ಬೆಳಿಗ್ಗೆಯಿಂದ ಸಂಜೆಯ ತನಕ ಎಡೆಬಿಡದೇ ಕಷ್ಟಪಟ್ಟು ಸೈಕಲ್ ಎಡೆಕುಂಟೆ ಬಳಸಿ ತೆಗೆದಿದ್ದೇನೆ. ಇದರಿಂದ ₹4 ಸಾವಿರ ಉಳಿತಾಯವಾಗಿದೆ

–ರೇವಪ್ಪ ಬಜಂತ್ರಿ. ರೈತ ಜಿಗಜೀವಣಿ