ಆರಂಭದಲ್ಲಿ ಮಳೆ ಕೊರತೆ, ಕಟಾವಿನ ವೇಳೆ ಅತಿವೃಷ್ಟಿ; ಸಂಕಷ್ಟದಲ್ಲಿ ಹತ್ತಿ ಬೆಳೆಗಾರ

ಕಕ್ಕೇರಾ: ಬಿತ್ತನೆ ಸಂದರ್ಭದಲ್ಲಿ ಸಕಾಲದಲ್ಲಿ ಬಾರದ ಮಳೆ ಹಾಗೂ ಕಟಾವಿಗೆ ಬಂದಿರುವ ಸಮಯದಲ್ಲಿ ಸುರಿದ ವಿಪರೀತ ಮಳೆಯಿಂದ ಕಕ್ಕೇರಾ ಹೋಬಳಿ ವ್ಯಾಪ್ತಿಯಲ್ಲಿ ಹತ್ತಿ ಬೆಳೆಗಾರರು ಸಂಕಷ್ಟಕ್ಕೆ ಒಳಗಾಗಿದ್ದಾರೆ.

ಕಕ್ಕೇರಾ ವಲಯದ 19,133 ಎಕರೆ ಕೃಷಿ ಜಮೀನಿನ‍ ‍ಪೈಕಿ  15,909 ಎಕರೆ ಪ್ರದೇಶದಲ್ಲಿ ಭತ್ತ, ಹತ್ತಿ, ತೊಗರಿ, ಶೇಂಗಾ ಸೇರಿದಂತೆ ಇತರ ಬೆಳೆಗಳನ್ನು ಬೆಳೆಯಲಾಗಿದೆ. ಕಕ್ಕೇರಾ ಪಟ್ಟಣದ 23ನೇ ವಾರ್ಡ್‌ ಸೇರಿ ತಿಂಥಣಿ, ಆಲ್ದಾಳ, ದೇವಾಪುರ, ದೇವತ್ಕಲ್ ಪ್ರದೇಶದಲ್ಲಿ ಮಳೆ ಅಭಾವದಿಂದ ಹತ್ತಿ ಬೆಳೆದ ರೈತರು ತೊಂದರೆಗೀಡಾಗಿದ್ದಾರೆ.

‘2 ಎಕರೆಯಲ್ಲಿ ಹತ್ತಿ ಬೆಳೆದಿದ್ದು, ಸುಮಾರು ₹ 30 ಸಾವಿರಕ್ಕೂ ಹೆಚ್ಚು ಖರ್ಚು ಮಾಡಿದ್ದೇನೆ. ಸದ್ಯ ಹತ್ತಿಗೆ ತಾಮ್ರರೋಗ ತಗಲಿದೆ. ಸಂಪೂರ್ಣ ಬೆಳೆಯಿಂದ ಬರುವ  ಆದಾಯವು ಕೂಲಿಗಾರರಿಗೆ ಸಾಲದಾಗಿದೆ. ರಸಗೊಬ್ಬರ, ಹತ್ತಿಬೀಜ ಇತರ ಖರ್ಚು ಹೇಗೆ ಎಂಬ ಯೋಚನೆ ಹತ್ತಿ ಬೆಳೆಗಾರರದ್ದಾಗಿದೆ’ ಎಂದು ರೈತ ಮಲ್ಲಣ್ಣ ಗುರಿಕಾರ ಬೇಸರ ವ್ಯಕ್ತಪಡಿಸಿದರು.

‘3 ಎಕರೆಯಲ್ಲಿ ಬೆಳೆದಿದ್ದ ಹತ್ತಿ ಬೆಳೆಯ ಪೈಕಿ  1 ಎಕರೆ ಮಾತ್ರ ಚೆನ್ನಾಗಿ ಬೆಳೆ ಬಂದಿದೆ. ಅತಿಯಾದ ಮಳೆಯಿಂದ ಬೆಳೆಗೆ ಕೆಂಪು ರೋಗ ಬಂದು ಬೆಳೆ ಹಾಳಾಗಿದೆ. ಬೆಳೆಯಲು ₹ 40 ಸಾವಿರಕ್ಕೂ ಹೆಚ್ಚು ಹಣ ಖರ್ಚು ಮಾಡಿದ್ದು, ಖರ್ಚು ಮಾಡಿದ ಹಣ ಬಂದರೆ ಸಾಕು ಎಂಬಾತಾಗಿದೆ’ ಎಂದು ರೈತ ಗೊಜಗರ ರಾಯಪ್ಪ ಅಳಲು ತೋಡಿಕೊಂಡರು.

‘ತಿಂಥಣಿ ರಾಷ್ಟ್ರೀಯ ಹೆದ್ದಾರಿ ಪಕ್ಕದಲ್ಲಿ ಹಾದು ಹೋಗುವ ಕಾಲುವೆಯಲ್ಲಿ ಗಿಡಗಂಟೆಗಳನ್ನು ತೆರವು ಮಾಡದ ಪರಿಣಾಮ ಹಾಗೂ ಸರಿಯಾಗಿ ಕಾಮಗಾರಿ ನಿರ್ವಹಿಸದಿದ್ದರಿಂದ ನೀರು ಕಾಲುವೆಯಲ್ಲಿ ಹರಿಯುವ ಬದಲು ‌ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಹರಿದಿದೆ. ಇದರಿಂದ ತೊಗರಿ, ಸಜ್ಜಿ ,ಹತ್ತಿ, ಭತ್ತ ಬೆಳೆದ ರೈತರ ಜಮೀನುಗಳಿಗೆ ನೀರಿನ ಕೊರತೆಯಾಗಿದೆ.  ಅಧಿಕಾರಿಗಳು ಕಾಲುವೆ ನೀರು ಜಮೀನುಗಳಿಗೆ ತಲುಪವಂತೆ ಮಾಡಬೇಕು’ ಎಂದು ರತ್ನರಾಜ ಶಾಲಿಮನಿ ಮನವಿ ಮಾಡಿದ್ದಾರೆ.