ಹುಣಸಗಿ: ಸಂಗೀತದ ಎಲೆಮರೆಕಾಯಿ ಆಮಯ್ಯ ಮಠ

ಹುಣಸಗಿ: ತಾಲ್ಲೂಕಿನ ರಾಜನಕೋಳೂರು ಗ್ರಾಮದಲ್ಲಿರುವ ಸಂಗೀತ ಕಲಾವಿದರೊಬ್ಬರು ಎಲೆಮರೆಯ ಕಾಯಿಯಂತೆ ಕಾರ್ಯನಿರ್ವಹಿಸುತ್ತಾ ಈ ಭಾಗದ ಮಕ್ಕಳಿಗೆ ಉಚಿತ ಸಂಗೀತ ಅಭ್ಯಾಸ ಮಾಡುತ್ತಾ ಜನರ ಪ್ರಶಂಸೆಗೆ ಪಾತ್ರರಾಗಿದ್ದಾರೆ.

ರಾಜನಕೋಳೂರು ಗ್ರಾಮದ ಆಮಯ್ಯ ಲಿಂಗಯ್ಯ ಹಿರೇಮಠ 73 ವರ್ಷದ ವಯಸ್ಸಿನಲ್ಲಿಯೂ ಉತ್ಸಾಹದ ಚಿಲುಮೆಯಂತೆ ಮಕ್ಕಳಿಗೆ ಉಚಿತವಾಗಿ ಹಾರ್ಮೋನಿಯಂ, ತಬಲಾ ಹಾಗೂ ಸಂಗೀತ ಶಿಕ್ಷಣ ನೀಡುವ ಮೂಲಕ ಸಂಗೀತ ಸೇವೆಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ.

ಸಂಗೀತ ಎಂಬುದು ನಿರಂತರದ ಸಾಧನೆಯ ಪ್ರತೀಕವಾಗಿದ್ದು, ಅದನ್ನು ಆರಾಧಿಸಿ ಆಸ್ವಾಧಿಸಿದಂತೆಲ್ಲ ನಮ್ಮಲ್ಲಿಯೂ ಹೆಚ್ಚಾಗುತ್ತದೆ. ಅದಕ್ಕಾಗಿ ಮಕ್ಕಳ ಜೊತೆಗೆ ನಾವು ಕೂಡಾ ಅಭ್ಯಾಸ ಮಾಡುವುದು ಅಗತ್ಯ ಎಂದು ಹೇಳುತ್ತಾರೆ ಆಮಯ್ಯ ಮಠ.

ಕಳೆದ ಸುಮಾರು 4 ದಶಕಗಳಿಂದಲೂ ಈ ಭಾಗದಲ್ಲಿ ಯುವಕರಿಗೆ ನಾಟಕಗಳನ್ನು ಕಲಿಸುವ ಜೊತೆಯಲ್ಲಿ ನಿರ್ದೇಶಿಸಿ ಪೇಟಿ (ಹಾರ್ಮೋನಿಯಂ) ಮಾಸ್ತರ್‌ ಎಂದೇ ಆಮಯ್ಯ ಮಠ ಅವರು ಚಿರಪರಿಚಿತರಾಗಿದ್ದಾರೆ.

ಅಮರಲಿಂಗೇಶ್ವರ ಸಂಗೀತ ಪಾಠ ಶಾಲೆಯನ್ನು ನಡೆಸಿಕೊಂಡು ಬಂದಿದ್ದಾರೆ. ಇವರ ಶಾಲೆಯಲ್ಲಿ ಸಂಗೀತ ಕಲಿತ ಸುಮಾರು 50ಕ್ಕೂ ಹೆಚ್ಚು ಮಕ್ಕಳು ಜೂನಿಯರ್ ಹಾಗೂ 20ಕ್ಕೂ ಹೆಚ್ಚು ಜನ ಸೀನಿಯರ್ ಹಾಗೂ 5 ಜನ ವಿದ್ವತ್ ಪರೀಕ್ಷೆ ಪಾಸು ಮಾಡಿದ್ದಾಗಿ ತಿಳಿಸಿದರು.

ಆಕಾಶವಾಣಿಯ ಬಿ ಗ್ರೇಡ್ ಕಲಾವಿದರಾಗಿರುವ ಆಮಯ್ಯ ಮಠ ಅವರು ಹಲವಾರು ವರ್ಷಗಳಿಂದ ಜಿಲ್ಲೆ ಸೇರಿದಂತೆ ರಾಯಚೂರು, ವಿಜಯಪುರ, ಕಲಬುರಗಿ, ಬಾಗಲಕೋಟೆ ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ 500ಕ್ಕೂ ಹೆಚ್ಚು ಕಾರ್ಯಕ್ರಮಗಳನ್ನು ನೀಡಿದ್ದಾರೆ.

ಅಲ್ಲದೇ 1979 ಹಾಗೂ 1982ರಿಂದ 86ರವರೆಗೆ ನಡೆದ ಎಲ್ಲ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಪಾಲ್ಗೊಂಡು ಕಾರ್ಯಕ್ರಮ ನೀಡಿದ್ದು, ಇವರ ಹೆಗ್ಗಳಿಕೆಯಾಗಿದೆ ಎಂದು ಗ್ರಾಮದ ಪ್ರಭುಗೌಡ ಪಾಟೀಲ, ವೆಂಕನಗೌಡ ಮಾಲಿಪಾಟೀಲ ಹೇಳುತ್ತಾರೆ.

ಪ್ರಶಸ್ತಿಗಳು: ಆಮಯ್ಯ ಮಠ ಅವರ ಸೇವೆಯನ್ನು ಗುರುತಿಸಿ 2018ರಲ್ಲಿ ರಾಜ್ಯ ಸರ್ಕಾರದ ಸಂಗೀತ ಮತ್ತು ನೃತ್ಯ ಕಲಾ ಅಕಾಡೆಮಿಯಿಂದ ಕಲಾಶ್ರೀ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ. ಅಲ್ಲದೇ ಜಿಲ್ಲಾ ರಾಜ್ಯೋತ್ಸವ, ಸಗರನಾಡು ಪ್ರತಿಷ್ಠಾನ ಸೇರಿದಂತೆ ಸುಮಾರು 50ಕ್ಕೂ ಹೆಚ್ಚು ಪ್ರಶಸ್ತಿಗಳು ಇವರನ್ನು ಅರಸಿ ಬಂದಿವೆ.