ಭೀಮಾ ನದಿ | ಜಮೀನುಗಳಿಗೆ ನುಗ್ಗಿದ ನೀರು: ಆರೋಪ

ಶಹಾಪುರ: ತಾಲ್ಲೂಕಿನ ಹುರಸಗುಂಡಗಿ ಗ್ರಾಮದ ಹತ್ತಿ ನಿರ್ಮಿಸಿರುವ ಸನ್ನತಿ ಬ್ರೀಜ್ ಕಂ ಬ್ಯಾರೇಜ್ ಗೇಟು ತ್ವರಿತವಾಗಿ ಎತ್ತರಿಸದ ಕಾರಣ ಭೀಮಾ ನದಿ ಪಾತ್ರದಲ್ಲಿರುವ ಜಮೀನುಗಳಿಗೆ ನೀರು ನುಗ್ಗಿ ಬೆಳೆ ಹಾನಿಯಾಗಿದೆ ಎಂದು ಭೀಮಾ ನದಿ ಪಾತ್ರದ ರೈತರು ಆರೋಪಿಸಿದ್ದಾರೆ.

ತಾಲ್ಲೂಕಿನ ಭೀಮಾ ನದಿ ಪಾತ್ರದಲ್ಲಿ ಶಿರವಾಳ, ಅಣಬಿ, ರೋಜಾ, ಹುರಸಗುಂಡಗಿ ಗ್ರಾಮಮ ಬರುತ್ತವೆ. ಭೀಮಾ ನದಿಗೆ ಏಕಾಏಕಿ ನೀರಿನ ಹರಿವು ಹೆಚ್ಚಾದಾಗ ಸನ್ನತಿ ಬಳಿಯ ಬ್ಯಾರೇಜ್ ಗೇಟ್ ತಡವಾಗಿ ಎತ್ತರಿಸಿದರು. ಇದರಿಂದ ಹಿನ್ನೀರು ಹೆಚ್ಚು ಸಂಗ್ರಹವಾಗಿ ಜಮೀನುಗಳಿಗೆ ನುಗ್ಗಿವೆ. ಬೆಳೆದು ನಿಂತರ ಭತ್ತ ಹಾಗೂ ಹತ್ತಿ ಬೆಳೆ ಹಾನಿಯಾಗಿದೆ ಎಂದು ರೈತ ಮುಖಂಡ ಮರೆಪ್ಪ ಪ್ಯಾಟಿ ಶಿರವಾಳ ದೂರಿದ್ದಾರೆ.

ಹೆಚ್ಚಿನ ನೀರು ಭೀಮಾ ನದಿಗೆ ಹರಿದು ಬರುವ ಮಾಹಿತಿ ಅರಿತುಕೊಂಡು ಬ್ಯಾರೇಜ್ ಮೂಲಕ ನದಿಗೆ ನೀರು ಹರಿಸಿದ್ದರೆ ಸಮಸ್ಯೆ ಉಂಟಾಗುತ್ತಿರಲಿಲ್ಲ. ತಡವಾಗಿ ಗೇಟ್ ಎತ್ತರಿಸಿದ್ದಾರೆ ಅಧಿಕಾರಿಗಳು ಇಲ್ಲದ ಸಬೂಬು ಹೇಳುತ್ತಿದ್ದಾರೆ. ಖುದ್ದಾಗಿ ಸ್ಥಳ ಪರಿಶೀಲನೆ ಮಾಡಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.