ಶಹಾಪುರ: ಮಾವಿನ ಕೆರೆಯ ಅಂಗಳ ಭೂಗಳ್ಳರ ಪಾಲು!

ಶಹಾಪುರ: ನಗರದ ಜನತೆಯ ನಾಡಿ ಮಿಡಿತವಾಗಿರುವ ಮಾವಿನ ಕೆರೆಯ ಅಂಗಳವನ್ನು ಒತ್ತುವರಿ ಮಾಡುವ ಕಾರ್ಯ ಸದ್ದಿಲ್ಲದೆ ನಡೆಯುತ್ತಿದೆ. ಟ್ರ್ಯಾಕ್ಟರ್ ಹಾಗೂ ಜೆಸಿಬಿ ಮೂಲಕ ಕೆರೆಯಲ್ಲಿ ಮಣ್ಣು ಹಾಕಿ ಸಮತಟ್ಟು ಮಾಡುವ ಕಾರ್ಯ ಭರದಿಂದ ಸಾಗಿದೆ. ಕಂದಾಯ ಹಾಗೂ ನಗರಸಭೆಯ ಅಧಿಕಾರಿಗಳ ಕೆರೆ ಒತ್ತುವರಿ ಕಣ್ಣು ಮುಂದೆ ನಡೆಯುತ್ತಿದ್ದರೂ ಜಾಣ ಕಿವುಡತನ ಪ್ರದರ್ಶಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ.

ಕೆರೆಯ ದಂಡೆಗೆ ಹೊಂದಿಕೊಂಡ ಕೆಲ ರೈತರು ತ್ಯಾಜ್ಯ ವಸ್ತುಗಳನ್ನು ಕೆರೆಯಲ್ಲಿ ಎಸೆಯುತ್ತಾರೆ. ಬೇಸಿಗೆ ಸಂದರ್ಭದಲ್ಲಿ ಫಲವತ್ತಾದ ಮಣ್ಣು ಇದೇ ಕೆರೆಯಂಗಳದ ಮಣ್ಣು ಪಡೆದುಕೊಂಡು ಇಟ್ಟಿಗೆ ಸಿದ್ಧಪಡಿಸುತ್ತಾರೆ. ಈಗಾಗಲೇ ಕೆಲ ದಿನದಿಂದ ಕೆರೆಯ ದಂಡೆಯ ಮಣ್ಣು ಜೆಸಿಬಿ ಮೂಲಕ ಅಗೆದು ಸಮತಟ್ಟು ಮಾಡುತ್ತಿದ್ದಾರೆ. ಇದನ್ನು ಪ್ರಶ್ನಿಸಿದರೆ ಇದರಲ್ಲಿ ನಮ್ಮ ಜಮೀನು ಇದೆ. ನೀವ್ಯಾರು ನಮ್ಮನ್ನು ಕೇಳವರು ಎಂದು ನಮಗೆ ಉಲ್ಟಾ ಗದರಿಸಿ ವಾಪಸ್‌ ಕಳುಹಿಸಿದ್ದಾರೆ ಎಂದು ಸಾಮಾಜಿಕ ಕಾರ್ಯಕರ್ತ ಬಸವರಾಜ ಅರುಣಿ ಆರೋಪಿಸುತ್ತಾರೆ.

ಹತ್ತು ವರ್ಷದ ಹಿಂದೆ ಕೆರೆ ಅಭಿವೃದ್ಧಿಗಾಗಿ ಅನುದಾನ ಬಂದಾಗ ಕೆರೆಗೆ ಹೊಂದಿಕೊಂಡಂತೆ ಪಾದಚಾರಿಗಳು ವಾಯು ವಿಹಾರಕ್ಕೆ ತಿರುಗಾಡಲು ಸಿ.ಸಿ ರಸ್ತೆ, ವೀಕ್ಷಣಾ ಗೋಪುರ, ಕೆರೆಗೆ ಹೊಂದಿಕೊಂಡಂತೆ ಸಸಿಗಳನ್ನು ನೆಡಲಾಗಿತ್ತು. ಸರಿಯಾದ ನಿರ್ವಹಣೆ ಇಲ್ಲದೆ ಹಾಳು ಬಿದ್ದಿತ್ತು. ಅಲ್ಲದೆ ನಾಲ್ಕು ವರ್ಷದ ಹಿಂದೆ ಜೈನ ಸಮುದಾಯದವರು ಮಾವಿನ ಕೆರೆಯಲ್ಲಿನ ಹೂಳೆತ್ತುವ ಕಾರ್ಯವನ್ನು ಕೈಗೆತ್ತಿಕೊಂಡಿದ್ದರು. ಆದರೆ ಅರೆ ಬರೆ ಕೆಲಸ ನಿರ್ವಹಿಸಿ ಬಿಟ್ಟು ಹೋಗಿದ್ದಾರೆ. ಅಲ್ಲದೆ ಕೆರೆಗೆ ಹೊಂದಿಕೊಂಡ ಜಮೀನುಗಳ ರೈತರು ಕೃತಕ ರಸ್ತೆ ನಿರ್ಮಿಸಿಕೊಂಡು ಕೃಷಿ ಜಮೀನುಗಳನ್ನು ಪರಿವರ್ತನೆ ಮಾಡಿ ನಿವೇಶನಗಳನ್ನು ಸಿದ್ಧಪಡಿಸಿ ಮಾರಾಟಕ್ಕೆ ಮುಂದಾಗಿರುವುದು ಕೆರೆ ಒತ್ತುವರಿಗೂ ತಳಕು ಹಾಕಿಕೊಂಡಿದೆ ಎನ್ನುತ್ತಾರೆ ಪರಿಸರ ಪ್ರೇಮಿ ಸಂತೋಷ ಸತ್ಯಂಪೇಟೆ

ಪ್ರಸಕ್ತ ಬಾರಿ ಉತ್ತಮ ಮಳೆಯಾಗಿದ್ದರಿಂದ ಕೆರೆಯಲ್ಲಿ ಹೆಚ್ಚು ನೀರು ಸಂಗ್ರಹವಾಗಿದೆ. ಬೇಸಿಗೆಯ ಸಮಯದಲ್ಲಿ ಕೆರೆಯಲ್ಲಿ ನೀರಿನ ಸಂಗ್ರಹವಿದ್ದರೆ ಅಂತರ್ಜಲಮಟ್ಟ ಕುಸಿಯುವುದಿಲ್ಲ. ಕೆರೆಯ ಕೆಳಗಡೆಯ ಬಡಾವಣೆಯ ಪ್ರದೇಶದ ಕೊಳವೆ ಬಾಯಿ ಬತ್ತುವುದಿಲ್ಲ. ಆದರೆ ಕೆಲ ದುಷ್ಟಶಕ್ತಿಗಳು ಬೇಸಿಗೆ ಸಂದರ್ಭದಲ್ಲಿ ಕೆರೆಯ ಕೋಡಿ ಒಡೆದು ನೀರು ಹರಿಬಿಟ್ಟು ಅಲ್ಲಿ ಇಟ್ಟಗೆ ಕೆಲಸ ನಿರ್ವಹಿಸುತ್ತಿದ್ದಾರೆ. ಮೂಲ ದಾಖಲೆಯ ಪ್ರಕಾರ ಮಾವಿನ ಕೆರೆಯ ವಿಸ್ತೀರ್ಣವನ್ನು ಅಳತೆ ಮಾಡಿ ಗಡಿ ಗುರುತು ಹಾಕಿ ಒತ್ತುವರಿ ತಡೆಯದಂತೆ ನೋಡಿಕೊಳ್ಳಬೇಕು ಎನ್ನುತ್ತಾರೆ ನಗರದ ಜನತೆ ಜಿಲ್ಲಾಧಿಕಾರಿಗೆ ಒತ್ತಾಯಿಸಿದ್ದಾರೆ.