ಯಾದಗಿರಿ | ಬೇವಿನ ಮರದಲ್ಲಿ ನೊರೆ

ಹನುಮಸಾಗರ: ಸಮೀಪದ ಹೂಲಗೇರಿ ಹತ್ತಿರದ ಪುರತಗೇರಿ ಗ್ರಾಮದಲ್ಲಿನ ಬೇವಿನ ಮರವೊಂದರಲ್ಲಿ ಶನಿವಾರ ಬೆಳಿಗ್ಗೆಯಿಂದ ಹಾಲಿನಂತಹ ನೊರೆ ಸುರಿಯುತ್ತಿರುವುದನ್ನು ಸಾರ್ವಜನಿಕರು ತಂಡವಾಗಿ ಬಂದು ನೋಡುತ್ತಿರುವುದು ಕಂಡು ಬಂತು.

ಬೆಳಗಿನ ಜಾವದಿಂದ ಒಂದೇ ಸಮನೆ ಮರದಲ್ಲಿ ಹಾಲು ಬರುತ್ತಿದ್ದು, ನಮಗೆ ವಿಸ್ಮಯ ಮೂಡಿಸಿದೆ. ಇದು ಮರದಲ್ಲಿ ನಡೆಯುವ ಒಂದು ಚಟುವಟಿಕೆ ಎಂದು ತಿಳಿದರೂ ಕುತೂಹಲಕ್ಕಾಗಿ ಜನ ಬರುತ್ತಿದ್ದಾರೆ ಎಂದು ಹೂಲಗೇರಿ ಗ್ರಾಮದ ಶಿವು ಹೊರಪೇಟಿ ತಿಳಿಸಿದರು.

ಎಲ್ಲ ಮರಗಳಲ್ಲಿನ ಬೇರುಗಳು ನೀರನ್ನು ಕೆಳಗಿನಿಂದ ಮೇಲಕ್ಕೆ ತೆಗೆದುಕೊಂಡು ಹೋಗಲು ಸಹಾಯ ಮಾಡುತ್ತವೆ. ಇದರಲ್ಲಿ ಇರುವ ಕೋಶಗಳು ಮರದ ಎಲ್ಲ ರಂಬೆ ಕೊಂಬೆಗಳಿಗೆ ನೀರನ್ನು ರವಾನಿಸುತ್ತವೆ. ಹೀಗೆ ನೀರು ಪೂರೈಸುವ ಕೋಶಗಳು ಅಪರೂಪಕ್ಕೆ ಎಂಬಂತೆ ನಾಶವಾದಾಗ, ಇಂಥ ಘಟನೆಗಳು ನಡೆಯುತ್ತವೆ. ಹೀಗೆ ಕೋಶಗಳು ತನ್ನ ಕ್ರಿಯೆಯನ್ನು ಕಡಿಮೆ ಮಾಡಿದಾಗ ಮರದ ಒಳಗಿರುವ ನೀರಿನ ಅಂಶ ಹೊರಗೆ ಬರುತ್ತದೆ. ಸಹಜವಾಗಿ ಮರದಲ್ಲಿ ಬುರುಗು ಇರುವುದರಿಂದ, ಬುರುಗು ಮಿಶ್ರಿತ ನೀರು ಹಾಲಾಗಿ ಕಾಣುತ್ತದೆ ಎಂದು ಜೀವವಿಜ್ಞಾನ ಶಿಕ್ಷಕ ಶಂಕ್ರಪ್ಪ ತಳವಾರ ತಿಳಿಸಿದರು.