ಗುರುಮಠಕಲ್‌ | ಮಕ್ಕಳಷ್ಟೇ ಅಲ್ಲ, ಮೇಷ್ಟ್ರಿಗೂ ಬಯಲೇ ಗತಿ

ಗುರುಮಠಕಲ್‌: ಶೌಚಾಲಯಗಳಿಗೆ ಬಾಗಿಲುಗಳ ಸಮಸ್ಯೆ, ನೀರಿನ ಸಮಸ್ಯೆಯ ಕಾರಣ ಪ್ರಕೃತಿ ಕರೆಗೆ ಮಕ್ಕಳು ಮತ್ತು ಮೇಷ್ಟ್ರುಗಳಿಗೆ ಬಯಲೇ ಗತಿ, ಮಧ್ಯಾಹ್ನ 12ಕ್ಕೆ ಶಾಲೆಯಿಂದ ಮಕ್ಕಳು ಪಕ್ಕದ ಗುಡ್ಡಕ್ಕೆ ಹೋಗುವುದು ಸಾಮಾನ್ಯವಾದರೆ, ಶಿಕ್ಷಕರು ಬೈಕ್‌ನಲ್ಲಿ ಹೋಗುವುದು ಅನಿವಾರ್ಯ...

ಇದು ತಾಲ್ಲೂಕಿನ ಅರಕೇರಾ (ಕೆ) ಗ್ರಾಮದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಶೌಚಾಲಯ ಸಮಸ್ಯೆ ಕುರಿತು ಗ್ರಾಮಸ್ಥರಾಡಿದ ಮಾತು.

ಶಾಲೆಯಲ್ಲಿ 7 ಜನ ಕಾಯಂ ಶಿಕ್ಷಕರು, 9 ಜನ ಅತಿಥಿ ಶಿಕ್ಷಕರು ಸೇರಿ 16 ಶಿಕ್ಷಕರಿದ್ದಾರೆ. 1 ರಿಂದ 8 ನೇ ತರಗತಿವರೆಗೆ ಕನ್ನಡ ಮತ್ತು 1 ರಿಂದ 5 ನೇ ತರಗತಿವರೆಗೆ ಇಂಗ್ಲೀಷ್‌ ಮಾಧ್ಯಮದ ಒಟ್ಟು 505 ವಿದ್ಯಾರ್ಥಿಗಳಿದ್ದು, ಶೌಚಾಲಯದ ಸಮಸ್ಯೆಯ ಭಯ ಮತ್ತು ಪದೇ ಪದೆ ಬಯಲಿಗೆ ಹೋಗಬೇಕಾಗುತ್ತದೆಂಬ ಮುಜುಗರದಿಂದ ಬಾಲಕಿಯರು ನೀರನ್ನು ಕುಡಿಯಲು ಹಿಂದೇಟು ಹಾಕುವ ಅಸಹಾಯಕತೆಯಲ್ಲಿ ಸಿಲುಕಿದ್ದಾರೆ.

ಶಾಲೆಯ ಗೇಟ್ ಪಕ್ಕದಲ್ಲೇ ಇರುವ ಶೌಚಾಲಯ ಕಟ್ಟಡದ ನಾಲ್ಕು ಶೌಚ ಕೋಣೆಗಳು ಬಳಕೆಗೆ ಯೋಗ್ಯವಿಲ್ಲ. ನೀರಿನ ಸಮಸ್ಯೆಯಿದೆ ಮತ್ತು ಬಾಗಿಲುಗಳು ಮುರಿದಿವೆ. ನೂತನ ಶೌಚಾಲಯ ಸಂಕೀರ್ಣಕ್ಕೆ ಮಾತ್ರ ಬಾಗಿಲಿದ್ದು, ಸಂಕೀರ್ಣದಲ್ಲಿರುವ ಮೂರು ಪ್ರತ್ಯೇಕ ಶೌಚ ಕೋಣೆಗಳಿಗೆ ಬಾಗಿಲುಗಳಿಲ್ಲ. ನೂತನ ಶೌಚಾಲಯ ಸಂಕೀರ್ಣವನ್ನು ಸದ್ಯ ಶಿಕ್ಷಕಿಯರು ಬಳಕೆ ಮಾಡುತ್ತಿದ್ದಾರೆ. ಆದರೆ, ಶಿಕ್ಷಕರು ಬೈಕ್‌ನಲ್ಲಿ ಬಯಲಿಗೆ ತೆರಳುತ್ತಾರೆ.

ಸ್ಥಳಾವಕಾಶದ ಕೊರತೆ: ಶಾಲೆಯಲ್ಲಿ 12 ಕೋಣೆಗಳಿದ್ದು, ಒಂದೂ ಕೋಣೆಯೂ ಬಳಕೆಗೆ ಯೋಗ್ಯವಿಲ್ಲ. 6 ನೇ ತರಗತಿಯಲ್ಲಿ 104, 7ನೇ ತರಗತಿಯಲ್ಲಿ 76 ಹಾಗೂ 8ನೇ ತರಗತಿಯಲ್ಲಿ 119 ವಿದ್ಯಾರ್ಥಿಗಳಿದ್ದಾರೆ. ದೊಡ್ಡ ಕೋಣೆಗಳಲ್ಲಿ ಗರಿಷ್ಠ 60 ವಿದ್ಯಾರ್ಥಿಗಳು ಕೂಡಬಹುದು. ಹೆಚ್ಚಿನ ವಿಭಾಗಗಳಾಗಿ ವಿಂಗಡಿಸಲು ಕೋಣೆಗಳ ಕೊರತೆಯಿದೆ. ಕಚೇರಿ ಕೋಣೆಯಲ್ಲೇ ರೇಷನ್ ದಾಸ್ತಾನು ಮಾಡಲಾಗುತ್ತಿದೆ. ಹೊಸ ಕೋಣೆಗಳನ್ನು ನಿರ್ಮಿಸಲೂ ಶಾಲೆಗೆ ಜಾಗವಿಲ್ಲ ಎಂದು ಶಿಕ್ಷಕರೊಬ್ಬರು ತಿಳಿಸಿದರು.

ಅರಕೇರಾ (ಕೆ), ಅರಕೇರಾ (ಕೆ) ತಾಂಡಾ, ಗೋಟಗಿ ತಾಂಡಾ, ಪಸಪುಲ ತಾಂಡಾ, ತಾತಾಳಗೇರ, ಮಗದಂಪುರ, ಮಗದಂಪುರ ತಾಂಡಾದಿಂದ ಮಕ್ಕಳು ಇಲ್ಲಿಗೆ ಬರುತ್ತಾರೆ. ಮಕ್ಕಳ ಸಂಖ್ಯೆಗನುಗುಣ ಕೋಣೆಗಳು, ಪೀಠೋಪಕರಣ, ಶಿಕ್ಷಕರನ್ನು ನಿಯೋಜಿಸಬೇಕು ಎನ್ನುವುದು ಪೋಷಕರ ಮನವಿ.