ಸಮರ್ಪಕ ಅನುಷ್ಠಾನವಾಗದ ಉದ್ಯೋಗ ಖಾತ್ರಿ: ಹೋರಾಟದ ನಂತರ ಕಾರ್ಮಿಕರಿಗೆ ಕೆಲಸ!

ಸುರಪುರ: ಹಲಗೆ, ಬ್ಯಾಂಡ್ ಶಬ್ದ. ಸಲಕೆ, ಇತರ ಸಲಕರಣೆಗಳೊಂದಿಗೆ ಮೆರವಣಿಗೆ ನಡೆಸಿದ ಕಾರ್ಮಿಕರು.  ಇದೇನು ಎಂದು ಆಶ್ಚರ್ಯ ಎಂಬುದು ಗ್ರಾಮಸ್ಥರು. ಇದು ದೇವಿಕೇರಾ ಗ್ರಾಮದಲ್ಲಿ ಸೋಮವಾರ ಕಂಡು ಬಂದ ದೃಶ್ಯ.

ಗ್ರಾಮದ ಹತ್ತಿರದ ಬೆಟ್ಟ ಪ್ರದೇಶದಲ್ಲಿರುವ ದಾವಲ ಮಲಿಕ್ ದರ್ಗಾದ ಹತ್ತಿರ ನರೇಗಾ ಯೋಜನೆಯಲ್ಲಿ ಕೂಲಿ ಕಾರ್ಮಿಕರು ಉತ್ಸಾಹದಿಂದ ಕೆಲಸ ಮಾಡಿ ಗ್ರಾಮ ಪಂಚಾಯಿತಿ ತಮಗೆ ವಹಿಸಿದ ಇಂಗು ಗುಂಡಿಗಳನ್ನು ನಿರ್ಮಾಣ ಮಾಡಿದರು.

ಇಲ್ಲಿ ನರೇಗಾ ಯೋಜನೆ ಆರಂಭವಾದಾಗಿನಿಂದ ಗ್ರಾಮದ ಕಾರ್ಮಿಕರಿಗೆ ಸಮರ್ಪಕ ಕೆಲಸ ದೊರೆತಿರಲಿಲ್ಲ. ಹೀಗಾಗಿ ಬಹುತೇಕ ಕಾರ್ಮಿಕರು ದೂರದ ಮಹಾನಗರಗಳಿಗೆ ಗುಳೆ ಹೋಗುವುದು ಸಾಮಾನ್ಯವಾಗಿತ್ತು. ಜಾಂಬವ ಯುವ ಸೇನೆಯ ಮುಖಂಡರು ಹಾಗೂ ಅಧಿಕಾರಿಗಳ ಜಾಗೃತಿಯಿಂದ ಸಮಸ್ಯೆ ತಾರ್ಕಿಕ ಅಂತ್ಯ ಕಂಡಿದೆ.

ನರೇಗಾ ಬಗ್ಗೆ ಅಧಿಕಾರಿಗಳು ಗ್ರಾಮದಲ್ಲಿ ಡಂಗೂರ ಸಾರಿ ಜಾಗ್ರತೆ ಮೂಡಿಸಿದ್ದರು. ಕಾರ್ಮಿಕರ ಮನೆ ಮನೆಗೆ ತೆರಳಿ ಫಾರ್ಮ್‌ ನಂಬರ್‌ 6 ತುಂಬಿಸಿಕೊಂಡಿದ್ದರು. ಈಗ 100ಕ್ಕೂ ಹೆಚ್ಚು ಕಾರ್ಮಿಕರು ನೋಂದಣಿ ಮಾಡಿಸಿಕೊಂಡಿದ್ದಾರೆ.

‘ಗ್ರಾಮದಲ್ಲಿ ನಡೆಯುವ ಟೆಂಡರ್ ಕಾಮಗಾರಿಗಳಿಗೆ ಗ್ರಾಮದ ಕಾರ್ಮಿಕರು ಬರುತ್ತಿದ್ದರು. ಆದರೆ ನರೇಗಾ ಯೋಜನೆಯಲ್ಲಿ ಕೆಲಸ ಮಾಡಲು ಯಾರೂ ಅಭಿರುಚಿ ತೋರಿಸುತ್ತಿರಲಿಲ್ಲ. ನರೇಗಾ ನಿಯಮದಂತೆ ಫಾರ್ಮ್ 6 ತುಂಬಿಕೊಡಲು ಯಾರೂ ಮುಂದೆ ಬರುತ್ತಿರಲಿಲ್ಲ’ ಎಂದು ನರೇಗಾದ ಸಹಾಯಕ ನಿರ್ದೇಶಕ ರವಿಚಂದ್ರರೆಡ್ಡಿ ಹೇಳುತ್ತಾರೆ.

‘ರಾಜಕೀಯ ಮುಖಂಡರು, ಬಲಾಢ್ಯರು ಯಂತ್ರೋಪಕರಣಗಳಿಂದ ನರೇಗಾ ಕಾಮಗಾರಿ ನಿರ್ವಹಿಸಿ ಕಾರ್ಮಿಕರಿಗೆ ₹500 ನೀಡಿ ಹೆಬ್ಬಟ್ಟು ಒತ್ತಿಸಿಕೊಂಡು ಅವರ ಖಾತೆಯಿಂದ ಹಣ ಪಡೆಯುತ್ತಿದ್ದರು’ ಎಂಬುದು ಜಾಂಬವ ಯುವ ಸೇನೆಯ ಜಿಲ್ಲಾ ಘಟಕದ ಉಪಾಧ್ಯಕ್ಷ ಹೈಯಾಳಪ್ಪ ಬಿಲ್ಲವ್ ಅವರ ಆರೋಪ.