ಯರಗೋಳ: ರೈತನ ಬದುಕರಳಿಸಿದ ಗುಲಾಬಿ

ಯರಗೋಳ: ಕೋವಿಡ್ ವೇಳೆ ಚಾಲಕ ವೃತ್ತಿಯನ್ನು ಬಿಟ್ಟು ಗ್ರಾಮಕ್ಕೆ ಮರಳಿ ತುಂಡು ಭೂಮಿಯಲ್ಲಿ ಗುಲಾಬಿ ಕೃಷಿ ಮಾಡಿ ಎಲ್ಲರಿಗೂ ಮಾದರಿಯಾಗಿದ್ದಾರೆ ಎಸ್.ಹೊಸಳ್ಳಿ ಗ್ರಾಮದ ರೈತ ಮುಕ್ತಾರ್ ಪಟೇಲ್.

ಹನಿ ನೀರಾವರಿ ಮೂಲಕ ತೋಟಗಾರಿಕೆ ಇಲಾಖೆ ಅಧಿಕಾರಿಗಳ ಮಾರ್ಗದರ್ಶನ ಹಾಗೂ ನರೇಗಾ ಯೋಜನೆಯ ನೆರವಿನಿಂದ ರೈತ ಮುಕ್ತಾರ್ ಪಟೇಲ್ ‘ಬುಲೆಟ್’ ತಳಿಯ ಗುಲಾಬಿ ಕೃಷಿ ಮಾಡಿ ಯಶಸ್ವಿಯಾಗಿದ್ದಾರೆ.

2022ರ ಅಕ್ಟೋಬರ್‌ನಲ್ಲಿ ₹16ಕ್ಕೆ ಒಂದರಂತೆ 1000 ಗುಲಾಬಿ ಸಸಿಗಳನ್ನು ತಂದು ಅರ್ಧ ಎಕರೆ ಹೊಲದಲ್ಲಿ 2-3 ಅಡಿಗಳ ಅಂತರದಲ್ಲಿ ನಾಟಿ ಮಾಡಿದ್ದರು. ಎರಡು ದಿನಗಳಿಗೊಮ್ಮೆ ನೀರುಣಿಸಿದ್ದಾರೆ. ನಾಲ್ಕು ತಿಂಗಳುಗಳ ನಂತರ ಗುಲಾಬಿ ಹೂವು ಬಿಡಲು ಆರಂಭಿಸಿದೆ. ಪ್ರತಿನಿತ್ಯ ಬೆಳಗಿನ ಸಮಯ ಕಟಾವು ಮಾಡಿ ಯಾದಗಿರಿ ನಗರದ ಮಾರುಕಟ್ಟೆಯಲ್ಲಿ ₹100ಕ್ಕೆ ಕೆಜಿ ಮಾರಾಟ ಮಾಡುತ್ತಾರೆ.

ಪ್ರತಿನಿತ್ಯ 10–15 ಕೆ.ಜಿ ಗುಲಾಬಿ ಹೂ ಕಟಾವು ಮಾಡಲಾಗುತ್ತಿದೆ. ತೋಟಗಾರಿಕೆ ಇಲಾಖೆ ಅಧಿಕಾರಿಗಳ ಮಾರ್ಗದರ್ಶನದ ಮೇರೆಗೆ 2 ತಿಂಗಳಿಗೊಮ್ಮೆ ಗೊಬ್ಬರ ಹಾಗೂ ವಾರಕ್ಕೆ ಎರಡು ಸಲ ಕೀಟನಾಶಕ ಸಿಂಪಡಣೆ ಮಾಡಲಾಗಿದೆ. ಕೀಟಗಳ ಹಾವಳಿಯಿಂದ ತಪ್ಪಿಸಿಕೊಳ್ಳಲು ಬಲೆ ಅಳವಡಿಸಲಾಗಿದೆ ಎನ್ನುತ್ತಾರೆ ರೈತ ಮುಕ್ತಾರ್ ಪಟೇಲ್.

ಗುಲಾಬಿ ಕೃಷಿಯ ಜೊತೆ ನುಗ್ಗೆಕಾಯಿ, ರೇಷ್ಮೆ ವ್ಯವಸಾಯ ಮಾಡಲು ಆರಂಭಿಸಿದ್ದೇನೆ. ಇದರಲ್ಲಿಯೂ ಲಾಭಗಳಿಸುತ್ತೇನೆ ಎಂದು ಆತ್ಮವಿಶ್ವಾಸದಿಂದ ನುಡಿಯುತ್ತಾರೆ ರೈತ ಮುಕ್ತಾರ್ ಪಟೇಲ್.