ಸುರಪುರ: ಸಂಭ್ರಮದಿಂದ ನಾಗಪಂಚಮಿ ಆಚರಣೆ

ಸುರಪುರ: ಅಣ್ಣ ತಂಗಿಯರ ಹಬ್ಬವೆಂದು ಕರೆಯಲ್ಪಡುವ ನಾಗರ ಪಂಚಮಿಯನ್ನು ನಗರದಾದ್ಯಂತ ಶುಕ್ರವಾರ ಸಡಗರ ಸಂಭ್ರಮದಿಂದ ಆಚರಿಸಲಾಯಿತು.

ಗುರುವಾರ ಬೆಲ್ಲದ ಹಾಲನ್ನು ನಾಗಮೂರ್ತಿಗೆ ಎರೆದು ಭಕ್ತಿ ಸಮರ್ಪಿಸಿದರು. ಗುರುವಾರ ಮಹಿಳೆಯರು ನಾಗರ ಕಟ್ಟೆಗಳಿಗೆ ತೆರಳಿ ಬಿಳಿ ಹಾಲು ಎರೆದರು.

ಮನೆಯಿಂದ ತಂದಿದ್ದ ಕಡಲೆ ಕಾಳು, ತಂಬಿಟ್ಟು, ನೈವೇದ್ಯ ಮಾಡಿ, ಕೊಬ್ಬರಿ ಬಟ್ಟಲಿನಿಂದ ಕಲ್ಲು ನಾಗಪ್ಪನಿಗೆ ಹಾಲೆರೆಯುವ ದೃಶ್ಯ ಎಲ್ಲೆಡೆ ಕಂಡು ಬಂತು. ಕೆಲವರು ಮನೆಯಲ್ಲಿ ಇನ್ನೂ ಕೆಲವರು ದೇವಸ್ಥಾನಗಳಿಗೆ ತೆರಳಿ ದೇವರಿಗೆ ಹಾಲೆರೆದರು.

ಸಹೋದರಿಯರನ್ನು ತವರಿಗೆ ಕರೆದು ತಂದು ಸಹೋದರರು ಸೀರೆ, ಆಭರಣ ಕಾಣಿಕೆ ನೀಡಿದರು. ಮಹಿಳೆಯರು ಜೋಕಾಲಿ ಆಡಿ ಸಂಭ್ರಮಿಸಿದರು. ಹಾಡು ಹಾಡಿ ನಲಿದರು. ಚಿಕ್ಕ ಮಕ್ಕಳು ಕೊಬ್ಬರಿ ಬಟ್ಟಲಿನಿಂದ ಬಗರಿ ತಯಾರಿಸಿ ಆಡುವುದು ರಂಜನೆ ನೀಡಿತು.

ಮನೆಗಳಲ್ಲಿ ಪೂಜೆ ಸಲ್ಲಿಸಿ ಹಬ್ಬದ ಊಟ ಸವಿದರು. ನೆರೆ ಹೊರೆಯವರಿಗೆ, ಬಂಧು ಬಳಗದವರಿಗೆ ಉಂಡಿ, ಚಕ್ಕಲಿ, ಕುಪ್ಪಸ ನೀಡಿ ಹಬ್ಬದ ಶುಭಾಶಯ ವಿನಿಮಯ ಮಾಡಿಕೊಂಡರು.