ಯಾದಗಿರಿ ನಗರಸಭೆ | ವರ್ಷವಾದರೂ ಕಾಯಂ ಪೌರಾಯುಕ್ತರಿಲ್ಲ: ನೇಮಕಕ್ಕೆ ಹೆಚ್ಚಿದ ಒತ್ತಡ
Published 22 ಆಗಸ್ಟ್ 2024, 5:28 IST Last Updated 22 ಆಗಸ್ಟ್ 2024, 5:28 IST 
ಯಾದಗಿರಿಯ ಐಡಿಎಸ್‌ಎಂಟಿ ಲೇಔಟ್‌ನಲ್ಲಿರುವ ನಗರಸಭೆ ಕಾರ್ಯಾಲಯ
ಯಾದಗಿರಿ: ನಗರಸಭೆಯಲ್ಲಿ ಖೊಟ್ಟಿ ದಾಖಲೆ ಸೃಷ್ಟಿಸಿ 1,310 ಅಕ್ರಮ ಖಾತಾ ನಕಲು, ₹ 4 ಕೋಟಿ ಮೌಲ್ಯದ ಸರ್ಕಾರಿ ಜಮೀನು ಪರಭಾರೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಗರಸಭೆ ಪೌರಾಯುಕ್ತರು ಬದಲಾಗಿ ಇದೇ ಆಗಸ್ಟ್ 22ಕ್ಕೆ ಒಂದು ವರ್ಷ ಕಳೆದಿದ್ದು, ಇಲ್ಲಿಯವರೆಗೆ ಕಾಯಂ ಪೌರಾಯುಕ್ತರು ನೇಮಕವಾಗಿಲ್ಲ.
2023ರ ಆಗಸ್ಟ್ 22ರಿಂದ ಪೌರಾಯುಕ್ತರ ಹುದ್ದೆ ಖಾಲಿ ಉಳಿದಿದ್ದು, ಪ್ರಭಾರ ಆಡಳಿತದಲ್ಲಿ ನಡೆಯುತ್ತಿದೆ.
ಹಿಂದಿನ ನಗರಸಭೆ ಪೌರಾಯುಕ್ತರಾಗಿದ್ದ ಸಂಗಮೇಶ ಉಪಾಸೆಯವರು ಅಕ್ರಮ ಖಾತಾ ನಕಲು, ಸರ್ಕಾರಿ ಜಮೀನು ಪರಭಾರೆ ಪ್ರಕರಣಗಳನ್ನು ಪತ್ತೆ ಹತ್ತಿ ತನಿಖೆ ಕೈಗೊಳ್ಳುವಂತೆ ಕಲಬುರಗಿ ಪ್ರಾದೇಶಿಕ ಆಯುಕ್ತರು ಸೇರಿ ಜಿಲ್ಲಾಧಿಕಾರಿ, ಸರ್ಕಾರಕ್ಕೆ ಪತ್ರ ಬರೆದಿದ್ದರು. ಇದಾದ ನಂತರ ಪೌರಾಯುಕ್ತರನ್ನು ಬಿಡುಗಡೆ ಮಾಡಲಾಗಿತ್ತು. ಅವರಿಂದ ತೆರವಾದ ಸ್ಥಾನಕ್ಕೆ ಇಲ್ಲಿಯವರೆಗೆ ನೇಮಕವಾಗಿಲ್ಲ.
ಆಗ ತಾನೆ ಅಧಿಕಾರಕ್ಕೆ ಬಂದ ಕಾಂಗ್ರೆಸ್‌ ಸರ್ಕಾರಕ್ಕೆ ಈ ಪ್ರಕರಣದಿಂದ ಮುಜುಗರವಾಗಿತ್ತು. ಆದರೂ ಅದು ಹಿಂದಿನ ಅವಧಿಯಲ್ಲಿ ನಡೆದ ಪ್ರಕರಣ ಎಂದು ಕೈತೊಳೆದುಕೊಂಡು ಪೌರಾಯುಕ್ತರ ನೇಮಕಕ್ಕೆ ಮೀನಮೇಷ ಎಣಿಸಿತ್ತು ಎಂಬುದು ಸಾರ್ವಜನಿಕರ ಆರೋಪವಾಗಿದೆ.
ಜಿಲ್ಲಾ ಕೇಂದ್ರ ನಿರ್ಲಕ್ಷ್ಯ:
ನಗರಸಭೆಯ ಸರ್ಕಾರಿ ಸರ್ವೆ ನಂ.391/1,2 ರಲ್ಲಿ ಮನೆ ಸಂಖ್ಯೆ 5-1- 408/23 ಎ ಹಾಗೂ 24 ಎ, 25ಎ, 26 ಎ, 27ಎ ಮತ್ತು 5-1-408/28ಎ ಎಂದು ಖಾಸಗಿ ವ್ಯಕ್ತಿಗಳಿಗೆ ಕಾನೂನು ಬಾಹಿರವಾಗಿ ಖಾತಾ ನಕಲು ನೀಡಿರುವ ಪ್ರಕರಣ ಜಿಲ್ಲಾ ಮಟ್ಟದಲ್ಲಿ ಸದ್ದು ಮಾಡಿತು.
‘ಜಿಲ್ಲಾ ಕೇಂದ್ರ ಯಾದಗಿರಿಯಲ್ಲಿ ಕಳೆದ ಒಂದು ವರ್ಷದಿಂದ ಕಾಯಂ ಪೌರಾಯುಕ್ತರಿಲ್ಲದಿರುವುದು ಜಿಲ್ಲೆಯ ಬಗೆಗಿರುವ ನಿರ್ಲಕ್ಷ್ಯವನ್ನು ತೋರಿಸುತ್ತದೆ’ ಎನ್ನುತ್ತಾರೆ ಹಿರಿಯ ವಕೀಲ ಭಾಸ್ಕರರಾವ ಮುಡಬೂಳ.
‘ಇಷ್ಟೆಲ್ಲ ಹಗರಣಗಳು ನಡೆದಿದ್ದರಿಂದ ಕಾಯಂ ಪೌರಾಯುಕ್ತರಾಗಲು ಯಾವೊಬ್ಬ ಅಧಿಕಾರಿಯೂ ಮುಂದೆ ಬರುತ್ತಿಲ್ಲ. ಇದರಿಂದ ನಗರದ ಅಭಿವೃದ್ಧಿ ಜೊತೆಗೆ ಕಡತಗಳು ಮುಂದೆ ಸಾಗುತ್ತಿಲ್ಲ. ಕೂಡಲೇ ಸಂಬಂಧಿಸಿದವರು ಎಚ್ಚೆತ್ತುಕೊಂಡು ಜಿಲ್ಲಾ ಕೇಂದ್ರಕ್ಕೆ ಅಗಿರುವ ಅನ್ಯಾಯ ಸರಿಪಡಿಸಲು ಮುಂದಾಗಬೇಕು‘ ಎನ್ನುತ್ತಾರೆ ಅವರು.
ಅವಿನಾಶ ಜಗನ್ನಾಥ ರಾಜ್ಯ ಕಾರ್ಯದರ್ಶಿ ಕರ್ನಾಟಕ ಯುವ ಕಾಂಗ್ರೆಸ್‌
ಶೀಘ್ರದಲ್ಲೇ ಯಾದಗಿರಿ ನಗರಸಭೆಗೆ ನೂತನ ಕಾಯಂ ಪೌರಾಯುಕ್ತರು ಬರಲಿದ್ದಾರೆ. ಈಗಾಗಲೇ ಸಂಬಂಧಿಸಿದವರು ಕ್ರಮ ವಹಿಸಲಿದ್ದಾರೆ
ಶರಣಬಸಪ್ಪ ದರ್ಶನಾಪುರ ಜಿಲ್ಲಾ ಉಸ್ತುವಾರಿ ಸಚಿವಯಾದಗಿರಿ ನಗರಸಭೆಯಲ್ಲಿ ಕಾಯಂ ಪೌರಾಯುಕ್ತರಿಲ್ಲದಿರುವುದು ಸರ್ಕಾರದ ಗಮನಕ್ಕಿದ್ದು ಶೀಘ್ರದಲ್ಲೇ ಸಚಿವರು ಶಾಸಕರನ್ನು ಭೇಟಿ ಮಾಡಿ ಈ ಕುರಿತು ಮನವಿ ಸಲ್ಲಿಸಲಾಗುವುದು
ಅವಿನಾಶ ಜಗನ್ನಾಥ ರಾಜ್ಯ ಕಾರ್ಯದರ್ಶಿ ಕರ್ನಾಟಕ ಯುವ ಕಾಂಗ್ರೆಸ್ಏನಿದು ಪ್ರಕರಣ?
ನಗರಸಭೆ ವ್ಯಾಪ್ತಿಯಲ್ಲಿ ಹಿಂದಿನ ನಾಲ್ವರು ಪೌರಾಯುಕ್ತರು ಕಂದಾಯ ನಿರೀಕ್ಷಕರು ಎಫ್‌ಡಿಎ ಸೇರಿದಂತೆ ನಗರಸಭೆ ಸಿಬ್ಬಂದಿ ಕೃಷಿ ಜಮೀನಿನಲ್ಲಿ ಖೊಟ್ಟಿ ದಾಖಲು ಸೃಷ್ಟಿಸಿ 1310 ಅನಧಿಕೃತ ಖಾತಾಗಳು ನೀಡಿದ್ದಾರೆ ಎಂದು ತನಿಖೆಗೆ ಆಗ್ರಹಿಸಲಾಗಿತ್ತು. ಅಲ್ಲದೇ ಸತ್ತವರ ಹೆಸರಿನಲ್ಲಿ ದಾಖಲೆಗಳನ್ನು ನೀಡಿರುವ ಕುರಿತು ದೂರು ದಾಖಲಾಗಿತ್ತು. ಅಲ್ಲದೇ ಆಹಾರ ನಿಗಮದ ವ್ಯಾಪ್ತಿಯ ಗೋದಾಮಿನ ಜಾಗವನ್ನು 6 ಜನರಿಗೆ ನಗರಸಭೆ ಸಿಬ್ಬಂದಿ ಪರಭಾರೆ ಮಾಡಿದ್ದರು. ಈ ಕುರಿತು ತನಿಖೆ ಮಾಡಲು ಜಂಟಿ ತನಿಖೆ ಕೈಗೊಂಡು ವರದಿ ನೀಡುವಂತೆ ಜಿಲ್ಲಾ ಹೆಚ್ಚುವರಿ ಜಿಲ್ಲಾಧಿಕಾರಿ ಶರಣಬಸಪ್ಪ ಕೋಟಪ್ಪಗೋಳ ಅವರು 2023ರ ಆಗಸ್ಟ್ 17ರಂದು ಆದೇಶಿಸಿದ್ದರು. ಸುರಪುರ ಶಹಾಪುರ ನಗರಸಭೆ ಪೌರಾಯುಕ್ತ ಕಂದಾಯ ಅಧಿಕಾರಿಗಳು ಉಪವಿಭಾಗಾಧಿಕಾರಿ ಒಳಗೊಂಡ ತಂಡ ರಚನೆ ಮಾಡಲಾಗಿತ್ತು. 2019ರ ಫೆಬ್ರುವರಿ 25ರಿಂದ 2023ರ ಮಾರ್ಚ್‌ 18ರವರೆಗೆ ಈ ಹಿಂದೆ ಕಾರ್ಯನಿರ್ವಹಿಸಿದ ಪೌರಾಯುಕ್ತರು ಕಂದಾಯ ಅಧಿಕಾರಿಗಳು ಕಂದಾಯ ನಿರೀಕ್ಷಕರು ಕಿರಿಯ ಎಂಜಿನಿಯರ್‌ ಕರ ವಸೂಲಿಗಾರರು ಹಾಗೂ ಇತರೆ ಸಿಬ್ಬಂದಿ ಈ ಅಕ್ರಮಗಳಿಗೆ ಕಾರಣರಾಗಿದ್ದಾರೆ ಎಂದು ದೂರು ಸಲ್ಲಿಕೆಯಾಗಿತ್ತು.
ಸಂಚಲನ ಸೃಷ್ಟಿಸಿದ್ದ ವರದಿಗಳು
ನಗರ ವ್ಯಾಪ್ತಿಯ ಕೃಷಿ (ಗ್ರೀನ್ ಬೆಲ್ಟ್ ಮತ್ತು ಎಲ್ಲೋ ಬೆಲ್ಟ್) ಜಮೀನಿನಲ್ಲಿ ಎನ್‌ಎ ಆಗದೆ ಯೋಜನಾ ಪ್ರಾಧಿಕಾರದ ಅನುಮೋದನೆ ಇಲ್ಲದೆ ಯೋಜನಾ ಪ್ರಾಧಿಕಾರದಿಂದ ನಿವೇಶನಗಳು ಬಿಡುಗಡೆಯಾಗದ ಹಾಗೂ ಯಾವುದೇ ಅಭಿವೃದ್ಧಿ ಪಡಿಸದ ನಿವೇಶನಗಳಿಗೆ ಖೊಟ್ಟಿ ದಾಖಲೆ ಸೃಷ್ಟಿಸಿರುವ ಕುರಿತು ಹಾಗೂ ಸರ್ಕಾರಿ ಆಸ್ತಿ ಪರಭಾರೆ ಪ್ರಕರಣದಿಂದ ಸರ್ಕಾರದ ಬೊಕ್ಕಸಕ್ಕೆ ₹18 ಕೋಟಿ ನಷ್ಟವಾಗಿರುವ ನಗರಸಭೆ ಅಕ್ರಮಗಳ ಕುರಿತು ‘ಪ್ರಜಾವಾಣಿ’ ಸರಣಿ ವರದಿ ಮಾಡಿತ್ತು. ಈ ವರದಿಗಳು ನಗರ ಸೇರಿದಂತೆ ಜಿಲ್ಲೆಯಲ್ಲಿ ಸಂಚಲನ ಸೃಷ್ಟಿಸಿತ್ತು. ಹಲವರು ವರದಿಗಳನ್ನು ಪ್ರಸ್ತಾಪಿಸಿ ಸರ್ಕಾರಕ್ಕೆ ಒತ್ತಡಕ್ಕೆ ಹಾಕಿದ್ದರು. ಅಲ್ಲದೇ ಜಿಲ್ಲಾಡಳಿತವೂ ಎರಡು ತನಿಖಾ ತಂಡಗಳನ್ನು ರಚಿಸಿ ಶೀಘ್ರ ವರದಿ ಸಲ್ಲಿಸಲು ಸೂಚನೆ ನೀಡಿತ್ತು. ಈ ಮೂಲಕ ಕೆಲವೇ ತಿಂಗಳಲ್ಲಿ ಅಧಿಕಾರಿಗಳು ಗಂಟುಮೂಟೆ ಕಟ್ಟಿಕೊಂಡು ಅಮಾನತಾಗಿರುವುದನ್ನು ಸ್ಮರಿಸಬಹುದು.
12 ಜನರ ತಲೆದಂಡ ಪಡೆದಿತ್ತು
ಹಗರಣ ನಗರಸಭೆಯಲ್ಲಿ ಕಳೆದ ನಾಲ್ಕೈದು ವರ್ಷಗಳಲ್ಲಿ ನಡೆದಿದ್ದ 1310 ಅಕ್ರಮ ಖಾತಾ ನಕಲು ಸರ್ಕಾರಿ ಆಸ್ತಿ ಪರಭಾರೆ ಪ್ರಕರಣಕ್ಕೆ ಸಂಬಂಧಿಸಿದಂತೆ 12 ಜನ ಅಧಿಕಾರಿ ಸಿಬ್ಬಂದಿ ತಲೆದಂಡವಾಗಿತ್ತು. ಇವರನ್ನು ಅಮಾನತು ಮಾಡುವ ಜತೆಗೆ ರಾಯಚೂರು ಕಲಬುರಗಿ ಬೀದರ್‌ ಕೊಪ್ಪಳ ಬಳ್ಳಾರಿ ಜಿಲ್ಲೆಗಳಿಗೆ ವರ್ಗಾವಣೆ ಮಾಡಲಾಗಿತ್ತು. ಒಬ್ಬ ಪೌರಾಯುಕ್ತ ಪ್ರಥಮ ದರ್ಜೆ ಸಹಾಯಕ ದ್ವಿತೀಯ ದರ್ಜೆ ಸಹಾಯಕ ವಿಷಯ ನಿರ್ವಾಹಕ ಕಿರಿಯ ಎಂಜಿನಿಯರ್‌ ಕಂದಾಯ ನಿರೀಕ್ಷಕ ಕಂದಾಯ ಅಧಿಕಾರಿ ಕರ ವಸೂಲಿಗಾರ ಕಂಪ್ಯೂಟರ್‌ ಆಪರೇಟರ್‌ಗಳು ಅಮಾನತಾಗಿದ್ದರು. ಇದಾದ ನಂತರ ಬೇರೆಡೆ ನಿಯೋಜನೆಗೊಂಡ ಕೆಲವರು ಲೋಕಾಯುಕ್ತ ದಾಳಿಗೆ ಒಳಗಾಗಿ ಅಮಾನತಾಗಿದ್ದರು.
