ಮಂಡ್ಯ: ಜೆಡಿಎಸ್‌ ಪರ ಪ್ರಚಾರಕ್ಕೆ ತಲೆಗೆ ₹ 500; ಶಿವರಾಮೇಗೌಡರ ಆಡಿಯೊ ವೈರಲ್‌
ಮಂಡ್ಯ: ಜೆಡಿಎಸ್‌ ಅಭ್ಯರ್ಥಿ ಪರ ಪ್ರಚಾರ ಮಾಡಲು ಬೆಂಗಳೂರಿನಿಂದ ಹುಡುಗರನ್ನು ಕರೆತರುವಂತೆ ಸಂಸದ ಎಲ್‌.ಆರ್‌.ಶಿವರಾಮೇಗೌಡ ಜೆಡಿಎಸ್‌ ಕಾರ್ಯಕರ್ತ ಡಾನ್‌ ರಮೇಶ್‌ಗೆ ಸೂಚನೆ ನೀಡುವ ಆಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ಬೆಂಗಳೂರಿನಿಂದ ಬರುವ ಹುಡುಗರಿಗೆ ತಲೆಗೆ ₹ 500 ನೀಡಲಾಗುವುದು. ವಾಹನ ಮಾಡಿಕೊಂಡು ಕರೆದುಕೊಂಡು ಬರಲು ತಿಳಿಸುವ 43 ಸೆಕೆಂಡ್‌ಗಳ ಸಂಭಾಷಣೆ ಆಡಿಯೊದಲ್ಲಿದೆ. ಈ ಕುರಿತು ಪ್ರತಿಕ್ರಿಯೆ ನೀಡಿದ ಎಲ್‌.ಆರ್‌.ಶಿವರಾಮೇಗೌಡ ‘ಆಡಿಯೊ ನನ್ನದೇ. ನಾಲ್ಕೈದು ಕುಟುಂಬಗಳ ಸದಸ್ಯರು ಬೆಂಗಳೂರಿಂದ ಬರುತ್ತಿದ್ದರು. ಅವರು ಕಾರ್‌ ಮಾಡಿಕೊಂಡು ಬಂದರೆ ತಲೆಗೆ ₹ 500 ನೀಡುವುದಾಗಿ ತಿಳಿಸಿದೆ’ ಎಂದರು.
ಸಂಭಾಷಣೆ ಏನಿದೆ?
ಡಾನ್‌ ರಮೇಶ್: ಅಣ್ಣ ನಾವು ಕ್ಯಾನ್ವಾಸ್‌ಗೆ ಯಾವಾಗ ಬರಬೇಕಣ್ಣಾ?
ಎಲ್‌.ಆರ್‌.ಶಿವರಾಮೇಗೌಡ: ಯಾರು ಮಾತನಾಡುತ್ತಿರುವುದು?
ಡಾನ್‌ ರಮೇಶ್: ನಾನು ರಮೇಶ್
ಎಲ್‌.ಆರ್‌.ಶಿವರಾಮೇಗೌಡ: ಓ ಡಾನ್‌, ಬನ್ನಿ, ನಾಳೆಯಿಂದಲೇ ಬನ್ನಿ
ಡಾನ್‌ ರಮೇಶ್: ಬೆಂಗಳೂರಿನ ಎಲ್ಲರನ್ನೂ ಕರೆದುಕೊಂಡು ಬರಬೇಕು
ಎಲ್‌.ಆರ್‌.ಶಿವರಾಮೇಗೌಡ: ತಲೆಗೆ ₹ 500 ಕೊಡುತ್ತೇವೆ, ಎಲ್ಲರನ್ನೂ ಕರೆದುಕೊಂಡು ಬಾ
ಡಾನ್‌ ರಮೇಶ್: ತುಂಬಾ ಜನರ ಬರುತ್ತಾರೆ, ಬಸ್‌ ವ್ಯವಸ್ಥೆ ನಾವೇ ಮಾಡಿಕೊಳ್ಳಿಬೇಕಾ?
ಎಲ್‌.ಆರ್‌.ಶಿವರಾಮೇಗೌಡ: ನೀವೆ ಮಾಡಿಕೊಂಡು ಬನ್ನಿ, ತಲೆಗೆ ₹ 500, ಅಪ್ಪಾಜಿಗೌಡ (ವಿಧಾನ ಪರಿಷತ್ ಸದಸ್ಯ) ಅವರಿಗೆ ಜವಾಬ್ದಾರಿ ಕೊಟ್ಟಿದ್ದೇವೆ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.