Interview | ಸೊರಬದಲ್ಲಿ ಮೋದಿ ಮ್ಯಾಜಿಕ್ ನಡೆಯದು: ಮಧು ಬಂಗಾರಪ್ಪ

ಸೊರಬದ ಜನರು ಕಳೆದ ಬಾರಿ ನನ್ನ ವಿರುದ್ಧ ಮತ ಹಾಕಿರಲಿಲ್ಲ. ಬದಲಿಗೆ ಯಡಿಯೂರಪ್ಪ ಮುಖ್ಯಮಂತ್ರಿ ಆಗುತ್ತಾರೆ ಎಂದು ಬಿಜೆಪಿಗೆ ಮತ ಹಾಕಿದ್ದರು. ಈ ಬಾರಿ ಪರಿಸ್ಥಿತಿ ಸಂಪೂರ್ಣ ಭಿನ್ನವಾಗಿದೆ. ಎಲ್ಲ ಜಾತಿ, ಧರ್ಮದವರನ್ನು ಒಟ್ಟಿಗೆ ಕರೆದೊಯ್ಯುವ ಸಂಕಲ್ಪದಲ್ಲಿ ಚುನಾವಣೆಗೆ ಸಿದ್ಧತೆ ನಡೆಸಿರುವೆ. ಜನರು ವಿಶ್ವಾಸವಿಟ್ಟು ಬರುತ್ತಿದ್ದಾರೆ. ಕ್ಷೇತ್ರದ ಹಿರಿ–ಕಿರಿಯರನ್ನು ಒಟ್ಟಿಗೆ ಕರೆದೊಯ್ಯುತ್ತಿರುವೆ. ಕುಬಟೂರಿನಲ್ಲೇ ಚಿಕ್ಕ ವಾರ್‌ ರೂಂ ಮಾಡಿರುವೆ. ಮನೆ ಮನೆ ಸಂಪರ್ಕಿಸುತ್ತಿರುವೆ. ಪತ್ನಿ, ಮಗ, ಅಕ್ಕ–ತಂಗಿಯರು ಸಾಥ್ ನೀಡಿದ್ದಾರೆ.

ಬಡವರ ಮನೆಯಲ್ಲಿ ನರೇಂದ್ರ ಮೋದಿ ಈಗ ಏನು ವಿಶ್ವಾಸ ಉಳಿಸಿಕೊಂಡಿದ್ದಾರೆ? ಅಡುಗೆ ಅನಿಲ ಸಿಲಿಂಡರ್‌, ಪೆಟ್ರೋಲ್, ಡೀಸೆಲ್, ಅಡುಗೆ ಎಣ್ಣೆಯ ಜೊತೆಗೆ ದಿನ ಬಳಕೆಯ ವಸ್ತುಗಳ ಬೆಲೆ ಗಗನಕ್ಕೇರಿದೆ. ಬಡವರು ಬದುಕುವುದೇ ದುರ್ಲಭವಾಗಿದೆ. ಬಿಜೆಪಿಯವರು ಇಲ್ಲಿಯವರೆಗೆ ಮೋದಿ ಹೆಸರಲ್ಲಿ ವೋಟ್‌ ಕೇಳಿದ್ದಾರೆ. ಇನ್ನು ಕೇಳಲು ಆಗದು. ಸೊರಬದಲ್ಲಿ ಮಾತ್ರವಲ್ಲ ಕರ್ನಾಟಕದಲ್ಲಿ ಎಲ್ಲಿಯೂ ಮೋದಿ ಮ್ಯಾಜಿಕ್ ನಡೆಯದು.ಮೋದಿಯ ಅಬ್ಬರ ತಡೆಗೆ ಕಾಂಗ್ರೆಸ್‌ನ ಗ್ಯಾರಂಟಿ ಕಾರ್ಡ್ ಸಾಕು. ಜನರು ಉಸಿರಾಡಲು, ಉಸಿರು ಮುಂದುವರಿಸಲು ಹಸಿವು ನೀಗಿಸಬೇಕು. ಬಡವರ ಮನೆ ಸದಾ ಬೆಳಗಬೇಕು. ಅದಕ್ಕೆ ಉಚಿತ ಅಕ್ಕಿ ಹಾಗೂ ವಿದ್ಯುತ್‌ನ ಗ್ಯಾರಂಟಿ ನೀಡಿದ್ದೇವೆ.

ಮನುಷ್ಯನಿಗೆ ಅತ್ಯಗತ್ಯವಾಗಿ ಬೇಕಿರುವುದು ಸೂರು, ಅನ್ನ. ಇದು ಕಾಂಗ್ರೆಸ್‌ ಪಕ್ಷದ ಆಶಯ. ಅದಕ್ಕೆ ಪೂರಕವಾಗಿ 30 ವರ್ಷಗಳ ಹಿಂದೆಯೇ ಬಂಗಾರಪ್ಪ ಆಶ್ರಯ, ಅಕ್ಷಯ ಯೋಜನೆಗಳನ್ನು ಪರಿಚಯಿಸಿದ್ದರು. ಅವರ ನೈಜ ಹಿಂದುತ್ವ ದೃಷ್ಟಿಕೋನದ ಫಲವಾಗಿ ಆರಾಧನಾ ಯೋಜನೆ ಒಡಮೂಡಿತ್ತು. ಅದು ಹಿಂದೂ, ಮುಸ್ಲಿಂ, ಕ್ರೈಸ್ತರು, ಜೈನರು, ಬೌದ್ಧರು ಎಲ್ಲರನ್ನೂ ಬೆಸೆದಿತ್ತು. ರೈತರ ಪಂಪ್‌ಸೆಟ್‌ಗಳಿಗೆ ಉಚಿತ ವಿದ್ಯುತ್, ಗ್ರಾಮೀಣ ಕೃಪಾಂಕದ ಮೂಲಕ ಲಕ್ಷಾಂತರ ಬಡವರ ಮನೆಗಳ ದೀಪ ಬೆಳಗಿದ್ದರು. ಹೀಗಾಗಿ ಸೊರಬ ಮಾತ್ರವಲ್ಲ ಇಡೀ ಕರ್ನಾಟಕದಲ್ಲಿ ಸಾಹೇಬರ (ಬಂಗಾರಪ್ಪ) ಹೆಸರು ಈಗಲೂ ಪ್ರಸ್ತುತ.

ಮುಳುಗಡೆ ಸಂತ್ರಸ್ತರು, ಬಗರ್‌ಹುಕುಂ ಸಾಗುವಳಿದಾರರ ಹಿತ, ಅಡಿಕೆಗೆ ಎಲೆಚುಕ್ಕಿ ರೋಗ ಬಾಧೆ ಸೇರಿದಂತೆ ಮಲೆನಾಡಿನ ಸಮಸ್ಯೆಗಳ ಬಗ್ಗೆ ಪಕ್ಷದ ಮುಖಂಡ ರಮೇಶ್‌ ಹೆಗಡೆ ನೇತೃತ್ವದ ತಂಡ ಅಧ್ಯಯನ ವರದಿ ಸಲ್ಲಿಸಿದೆ. ಅದನ್ನೆಲ್ಲ ಪ್ರಣಾಳಿಕೆಯಲ್ಲಿ ಸೇರಿಸಿದ್ದೇವೆ. ಶಿವಮೊಗ್ಗದಲ್ಲಿ ಮಲೆನಾಡಿನ ಜನಾಕ್ರೋಶ ಸಮಾವೇಶ ನಡೆಸಿ ಸಿದ್ದರಾಮಯ್ಯ, ಡಿ.ಕೆ. ಶಿವಕುಮಾರ್ ಅವರನ್ನು ಕರೆತಂದು ಸಮಸ್ಯೆ ಪರಿಹಾರದ ವಾಗ್ದಾನ ನೀಡಿದ್ದೇವೆ. ಶೇ 40ರಷ್ಟು ಕಮಿಷನ್ ಪರಿಣಾಮ ಬಿಜೆಪಿ ಹುಟ್ಟುಹಾಕಿರುವ ಹೊಸ ಬ್ರ್ಯಾಂಡ್‌ನ ಕಳಪೆ ಕಾಮಗಾರಿ, ಅದಕ್ಕೆ ಪೂರಕವಾದ ಹಪ್ಪಳದಂತಹ ಟಾರ್‌ ರಸ್ತೆಗಳ ಬಗ್ಗೆಯೂ ಜನರ ಗಮನ ಸೆಳೆಯುವೆ. ಮಹಿಳಾ ಸಬಲೀಕರಣ, ಯುವಜನರಿಗೆ ಉದ್ಯೋಗಾವಕಾಶಗಳ ವಿಚಾರದಲ್ಲಿ ಕಾಂಗ್ರೆಸ್‌ನ ಪ್ರಣಾಳಿಕೆಯಲ್ಲಿ ಕೊಟ್ಟಿರುವ ಭರವಸೆಗಳ ಬಗ್ಗೆಯೂ ಜನರಿಗೆ ಹೇಳುವೆ.

ಸರ್ಕಾರದಿಂದ ಹಣ ತಂದು ಕಟ್ಟುವುದಾಗಿದ್ದರೆ ಯಾವತ್ತೋ ಕೆಲಸ ಮುಗಿಯುತ್ತಿತ್ತು. ಅದು ಬರೀ ಸಮಾಧಿ ರೀತಿ ಇರಬಾರದು. ಅಲ್ಲಿ ಅವರ ಚಿಂತನೆಗಳು ಜೀವಂತವಾಗಿರಬೇಕು. ಹೀಗಾಗಿ ಅವರ ಮಗನಾಗಿ ಕೊಟ್ಯಂತರ ರೂಪಾಯಿ ಸ್ವಂತ ಹಣ ಖರ್ಚು ಮಾಡಿ ‘ಬಂಗಾರ ಧಾಮ’ದ ಹೆಸರಲ್ಲಿ ಸಮಾಧಿ ಕಟ್ಟಿಸುತ್ತಿದ್ದೇನೆ. ಹಿಂದಿನ ಸರ್ಕಾರದಲ್ಲಿ ಡಿ.ಕೆ. ಶಿವಕುಮಾರ್ ಅವರು ₹ 2 ಕೋಟಿ ಅನುದಾನ ಕೊಡುವುದಾಗಿ ಹೇಳಿದ್ದರೂ ಅದನ್ನು ನಿರಾಕರಿಸಿರುವೆ. ನಾನು ಸತ್ತ ಮೇಲೂ ಸಮಾಧಿ ಸ್ಥಳದ ನಿರ್ವಹಣೆಗೆ ಅನುಕೂಲವಾಗಲಿ ಎಂದು ಸುತ್ತಲೂ ವಾಣಿಜ್ಯ ಮಳಿಗೆಗಳ ನಿರ್ಮಾಣ ಮಾಡುತ್ತಿದ್ದೇನೆ. ಹೀಗಾಗಿ ತಡವಾಗಿದೆ. ಶೀಘ್ರ ಪೂರ್ಣಗೊಳ್ಳಲಿದೆ.

ಸೊರಬದಲ್ಲಿ ‘ಹಿಂದುತ್ವ’ದ ರಾಜಕೀಯ ಇಲ್ಲ. ಎಲ್ಲ ಜಾತಿ ವರ್ಗದವರು ನಮ್ಮನ್ನು ಪ್ರೀತಿ ಮಾಡುತ್ತಾರೆ. 80ರ ದಶಕದಲ್ಲಿ ಕೋಮುಗಲಭೆಗೆ ಸಿಲುಕಿ ತೊಂದರೆಗೀಡಾಗಿದ್ದ ಮುಸ್ಲಿಮರಿಗೆ ಕಾನಕೇರಿ, ಅಂಡಿಗೆಯಲ್ಲಿ ನಮ್ಮ ತಂದೆ (ಎಸ್‌. ಬಂಗಾರಪ್ಪ) ಆಶ್ರಯ ಕೊಟ್ಟಿದ್ದರು. ಹಿಂದುತ್ವ ವಿಚಾರ ಈಗ ದೇಶದಲ್ಲಿ ತುತ್ತತುದಿ ತಲುಪಿ ಕೆಳಗೆ ಇಳಿಯುತ್ತಿದೆ. ನಾವು ದ್ವೇಷ ಮಾಡುವುದಿಲ್ಲ. ಜಾತಿ–ಧರ್ಮಕ್ಕಿಂತ ಮಾನವೀಯತೆಯೇ ದೊಡ್ಡದು ಎಂಬ ಭಾವನೆ ಜನರಲ್ಲಿ ಈಗ ಮೊಳೆತಿದೆ. ಹೀಗಾಗಿ ಬಿಜೆಪಿಯವರು ಪಾಕಿಸ್ತಾನದ ಬಗ್ಗೆ ಮಾತಾಡಿದರೆ ಯಾರೂ ನಂಬುತ್ತಿಲ್ಲ. ಶ್ರೀರಾಮನ ಗುಡಿ ಕಟ್ಟಿ ಆಯ್ತು. ಪರೇಶ್ ಮೇಸ್ತಾ ವಿಚಾರದಲ್ಲಿ ವಾಸ್ತವ ಗೊತ್ತಾಗಿದೆ. ಅವರ (ಬಿಜೆಪಿ) ಬತ್ತಳಿಕೆ ಪೂರ್ಣ ಖಾಲಿ ಆಗಿದೆ.