OMG 2 ಆ.11ಕ್ಕೆ ತೆರೆಗೆ: 12 ವರ್ಷದ ಬಳಿಕ ಅಕ್ಷಯ್ ಚಿತ್ರಕ್ಕೆ A ಪ್ರಮಾಣಪತ್ರ

ಮುಂಬೈ: ಅಮಿತ್‌ ರೈ ನಿರ್ದೇಶನದ, ಅಕ್ಷಯ್‌ ಕುಮಾರ್‌ ನಟನೆಯ ‘ಓ ಮೈ ಗಾಡ್‌–2’ ಚಿತ್ರ ಆಗಸ್ಟ್‌ 11 ರಂದು ಬಿಡುಗಡೆಯಾಗುತ್ತಿದೆ.

ಓ ಮೈ ಗಾಡ್‌–2ಗೆ ಸೆನ್ಸಾರ್‌ ಮಂಡಳಿ ಎ ಪ್ರಮಾಣಪತ್ರ ನೀಡಿದ್ದು, 12 ವರ್ಷಗಳ ಬಳಿಕ ಅಕ್ಷಯ ಕುಮಾರ್‌ ಅವರ ಚಿತ್ರವೊಂದಕ್ಕೆ ಎ ಪ್ರಮಾಣಪತ್ರ ದೊರಕಿದೆ ಎಂದು ಹೇಳಲಾಗಿದೆ. 

2011ರಲ್ಲಿ ಅಕ್ಷಯ್‌ ಅವರ ದೇಸಿ ಬಾಯ್ಸ್‌ ಚಿತ್ರಕ್ಕೆ ಎ ಪ್ರಮಾಣಪತ್ರ ದೊರಕಿತ್ತು.

ಈ ಕುರಿತು ವ್ಯಾಪಾರ ವಿಶ್ಲೇಷಕ ತರಣ್‌ ಆದರ್ಶ್‌ ಅವರು ಟ್ವೀಟ್‌ ಮಾಡಿದ್ದಾರೆ. 

ಚಿತ್ರದಲ್ಲಿ ಹಲವು ದೃಶ್ಯಗಳು ಎಲ್ಲಾ ವಯಸ್ಸಿನವರು ನೋಡುವಂತಿಲ್ಲ, ಹೀಗಾಗಿ ಕೆಲವು ದೃಶ್ಯಗಳನ್ನು ತೆಗೆದುಹಾಕುವಂತೆ ಕೇಂದ್ರೀಯ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ (Central Board of Film Certification ) ಸೂಚಿಸಿತ್ತು. ಆದರೆ ನಿರ್ಮಾಪಕರು ಅದಕ್ಕೆ ಒಪ್ಪದ ಕಾರಣ ಚಿತ್ರದಲ್ಲಿ ಯಾವುದೇ ದೃಶ್ಯಗಳನ್ನು ಕಟ್‌ ಮಾಡಲಾಗಿಲ್ಲ. ಹೀಗಾಗಿ 18 ವರ್ಷ ಮೇಲ್ಪಟ್ಟವರು ಮಾತ್ರ ನೋಡುವಂತೆ ಎ ಪ್ರಮಾಣಪತ್ರ ನೀಡಿದೆ. 

ಚಿತ್ರದಲ್ಲಿ ಅಕ್ಷಯ್‌ ಕುಮಾರ್ ಅವರು ಶಿವನ ಪಾತ್ರದಲ್ಲಿ ನಟಿಸಿದ್ದು, ಅದಕ್ಕೂ ಸಾಕಷ್ಟು ಆಕ್ಷೇಪ ಕೇಳಿಬಂದಿದೆ. ಚಿತ್ರದಲ್ಲಿ ಯಾಮಿ ಗೌತಮ್‌, ಪಂಕಜ್‌ ತ್ರಿಪಾಠಿ ಸೇರಿ ಹಲವು ತಾರೆಯರು ನಟಿಸಿದ್ದಾರೆ.  

2012ರಲ್ಲಿ ಓ ಮೈ ಗಾಡ್‌ ಚಿತ್ರ ಬಿಡುಗಡೆಯಾಗಿತ್ತು.