ಐಟಂ ಸಾಂಗ್‌ಗೆ ಸೀಮಿತಗೊಂಡ ‘ಅಧ್ಯಕ್ಷ’ನ ಹೀರೊಯಿನ್!
ಬಣ್ಣದ ಲೋಕದಲ್ಲಿ ನಟೀಮಣಿಯರ ಯಶಸ್ಸಿನ ಹಾದಿ ತುಸು ಕಡಿಮೆಯೇ. ಹೀರೊಗಳಷ್ಟು ಅವರಿಗೆ ಅದೃಷ್ಟ ಒಲಿಯುವುದಿಲ್ಲ. ಮೂವತ್ತು ವರ್ಷ ದಾಟಿದ ತಕ್ಷಣ ಪೋಷಕ ಪಾತ್ರಗಳಿಗೆಯೇ ಅವರನ್ನು ಸೀಮಿತಗೊಳಿಸುವುದು ಹೆಚ್ಚು. ಆದರೆ, ಚಿತ್ರರಂಗದಲ್ಲಿ ತಮ್ಮದೇ ಆದ ನಟನೆಯ ಚಾಪು ಮೂಡಿಸಿರುವ ಕೆಲವು ನಟಿಯರಿಗೆ ಈ ಮಾತು ಅನ್ವಯಿಸುವುದಿಲ್ಲ.
ವೃತ್ತಿಬದುಕಿನಲ್ಲಿ ಹೀರೊಯಿನ್ ಆಗಿ ಸೂಪರ್ ಹಿಟ್‌ ಚಿತ್ರಗಳಲ್ಲಿ ನಟಿಸಿದ ಕೆಲವು ನಟಿಯರು ಅಚಾನಕ್‌ ಆಗಿ ಐಟಂ ಸಾಂಗ್‌ಗಳಿಗೆ ಹೆಜ್ಜೆ ಹಾಕಿ ಮತ್ತೆ ಅವಕಾಶಗಳಿಲ್ಲದೇ ತೆರೆಮರೆಗೆ ಸರಿದ ಉದಾಹರಣೆಗಳು ಸಾಕಷ್ಟಿವೆ. ಈ ಪಟ್ಟಿಗೆ ನಟಿ ಹೆಬಾ ಪಟೇಲ್ ಹೊಸ ಸೇರ್ಪಡೆ. ಯಾರು ಈ ಹೆಬಾ ಎಂದು ಹೆಚ್ಚಿಗೆ ತಲೆಕೆಡಿಸಿಕೊಳ್ಳಬೇಡಿ. ನಂದ ಕಿಶೋರ್ ನಿರ್ದೇಶನದ ‘ಅಧ್ಯಕ್ಷ’ ಸಿನಿಮಾದಲ್ಲಿ ನಟ ಶರಣ್‌ ಜೊತೆಗೆ ಹೆಜ್ಜೆಹಾಕಿದ್ದ ಮುಂಬೈ ಬೆಡಗಿಯೇ ಈ ಹೆಬಾ ಪಟೇಲ್.
‘ಅಧ್ಯಕ್ಷ’ ಚಿತ್ರದ ಯಶಸ್ಸಿನ ಬಳಿಕ ಹೆಬಾ ಹಾರಿದ್ದು ಟಾಲಿವುಡ್‌ಗೆ. ತೆಲುಗಿನಲ್ಲಿ ಅವರು ನಟಿಸಿದ ಮೊದಲ ಚಿತ್ರ ‘ಕುಮಾರಿ 21ಎಫ್‌’. 2015ರಲ್ಲಿ ತೆರೆಕಂಡ ಈ ಚಿತ್ರದಲ್ಲಿನ ಆಕೆಯ ನಟನೆ ಕಂಡು ಎಲ್ಲರೂ ಬೆರಗಾಗಿದ್ದರು. ಆದರೆ, ಮೊದಲ ಚಿತ್ರದಷ್ಟು ಕ್ರೇಜ್‌ ಉಳಿಸಿಕೊಳ್ಳಲು ಆಕೆ ಎಡವಿದ್ದು ದಿಟ.
ಅವಕಾಶಗಳ ನಿರೀಕ್ಷೆಯಲ್ಲಿದ್ದ ಅವರು ಇತ್ತೀಚೆಗೆ ತೆರೆಕಂಡ ನಿತಿನ್ ನಟನೆಯ ‘ಭೀಷ್ಮ’ ಚಿತ್ರದಲ್ಲಿ ಅತಿಥಿ ಪಾತ್ರಕ್ಕೆ ಬಣ್ಣ ಹಚ್ಚಿದ್ದರು. ಈ ಚಿತ್ರದಲ್ಲಿನ ಆಕೆಯ ಗ್ಲಾಮರ್‌ ಲುಕ್‌ ಕಂಡು ಅಭಿಮಾನಿಗಳು ಬೇಸರಪಟ್ಟಿದ್ದಾರಂತೆ. ಆದರೆ, ಗ್ಲಾಮರ್‌ ಪ್ರಿಯರು ಆಕೆಯ ಲುಕ್‌ಗೆ ಫಿದಾ ಆಗಿರುವುದು ಸುಳ್ಳೇನಲ್ಲ. ಮತ್ತೊಂದೆಡೆ ಈ ಅತಿಥಿ ಪಾತ್ರವೇ ಹೆಬಾ ಅವರನ್ನು ‘ಐಟಂ ಸಾಂಗ್‌’ಗಳಿಷ್ಟೇ ಸೀಮಿತಗೊಳಿಸುತ್ತಿರುವುದು ಆಕೆಯ ಅಭಿಮಾನಿಗಳಲ್ಲಿ ಕೋ‍ಪಕ್ಕೆ ಕಾರಣವಾಗಿದೆ. ಮತ್ತೊಂದೆಡೆ ರಾಮ್‌ ಪೋನಿನೇನಿ ನಟನೆಯ ‘ರೆಡ್‌’ ಚಿತ್ರದಲ್ಲಿ ಐಟಂ ಸಾಂಗ್‌ವೊಂದಕ್ಕೆ ಆಕೆಗೆ ಆಫರ್‌ ಬಂದಿದೆ.
ಸದ್ಯಕ್ಕೆ ಹೆಬಾ ಕೈಯಲ್ಲಿ ಯಾವುದೇ ಹೊಸ ಸಿನಿಮಾಗಳಿಲ್ಲ. ಈ ಐಟಂ ಸಾಂಗ್‌ ಅವಕಾಶವೇ ಆಕೆಗೆ ಹೊಸ ಅವಕಾಶಗಳಿಗೆ ಹೆಬ್ಬಾಗಿಲು ತೆರೆಯಲಿದೆ ಎನ್ನುವುದು ಆಕೆಯ ಅಭಿಮಾನಿಗಳ ಇಂಗಿತ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.