'ಭೈರತಿ ರಣಗಲ್' ಟ್ರೇಲರ್: ಮಾಸ್‌ ಲುಕ್‌ನಲ್ಲಿ ಮಚ್ಚು ಹಿಡಿದು ಅಬ್ಬರಿಸಿದ ಶಿವಣ್ಣ

ಬೆಂಗಳೂರು: ಕರುನಾಡು ಚಕ್ರವರ್ತಿ ಶಿವರಾಜ್‌ಕುಮಾರ್‌, ರುಕ್ಮಿಣಿ ವಸಂತ್‌ ಜೋಡಿಯಾಗಿ ನಟಿಸಿರುವ ‘ಭೈರತಿ ರಣಗಲ್’ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿದ್ದು ಸಾಮಾಜಿಕ ಮಾಧ್ಯಮಗಳಲ್ಲಿ ಸದ್ದು ಮಾಡುತ್ತಿದೆ.

ಟ್ರೇಲರ್ ಬಿಡುಗಡೆಯಾಗಿ ಕೆಲವೇ ಗಂಟೆಗಳಲ್ಲಿ ಯುಟ್ಯೂಬ್‌ನಲ್ಲಿ ಲಕ್ಷಾಂತರ ವೀಕ್ಷಣೆ ಕಂಡಿದೆ. ಈ ಚಿತ್ರ ನವೆಂಬರ್‌ 15ರಂದು ತೆರೆಗೆ ಬರಲಿದೆ.

ಭೈರತಿ ರಣಗಲ್​ನ ಬಾಲ್ಯ, ಬಾಲ್ಯದಲ್ಲಿ ಆತ ಎದುರಿಸಿದ ಸಮಸ್ಯೆಗಳು, ಆತನ ಕಾನೂನಾತ್ಮಕ ಹೋರಾಟಗಳು, ಆ ಕಾಲ ಘಟ್ಟದ ವ್ಯವಸ್ಥೆಯ ಸಣ್ಣ ಝಲಕ್​ಗಳು ಟ್ರೇಲರ್‌ನಲ್ಲಿ ಕಾಣುತ್ತವೆ. ಹಾಗೇ ಶಿವಣ್ಣ ಮತ್ತೆ ಮಚ್ಚು ಹಿಡಿದು ಅಬ್ಬರಿಸುವ ದೃಶ್ಯಗಳು ಬಂದು ಹೋಗುತ್ತವೆ. ಎಲ್ಲಕ್ಕಿಂತ ಮಿಗಿಲಾಗಿ ಶಿವಣ್ಣ ಮಾಸ್‌ ಪಾತ್ರದಲ್ಲಿ ಸಖತ್ ಆಗಿ ಕಾಣಿಸಿಕೊಂಡಿದ್ದಾರೆ. ಹಾಗಾಗಿ ಈ ಟ್ರೇಲರ್ ಅಭಿಮಾನಿಗಳಿಗೆ ಮತ್ತು ಸಿನಿ ಪ್ರೇಕ್ಷಕರಿಗೆ ಸಖತ್‌ ಇಷ್ಟವಾಗಿದ್ದು ಉತ್ತಮ ಸ್ಪಂದನೆ ವ್ಯಕ್ತವಾಗುತ್ತಿದೆ.

ಶಿವಣ್ಣ ಮಾತ್ರವೇ ಅಲ್ಲದೆ ಬಾಲಿವುಡ್ ನಟ ರಾಹುಲ್ ಭೋಸ್, ಶಿವಣ್ಣನ ಸಹೋದರಿಯ ಪಾತ್ರ ನಿರ್ವಹಿಸಿರುವ ಛಾಯಾ ಸಿಂಗ್, ನಾಯಕಿ ರುಕ್ಮಿಣಿ ವಸಂತ್​, ಪೋಷಕ ನಟ ಅವಿನಾಶ್ ಸೇರಿದಂತೆ ಹಲವರು ಕಾಣಿಸುತ್ತಾರೆ. 

ಗೀತಾ ಪಿಕ್ಚರ್ಸ್ ಲಾಂಛನದಲ್ಲಿ ಗೀತಾ ಶಿವರಾಜ್‌ಕುಮಾರ್ ಚಿತ್ರವನ್ನು ನಿರ್ಮಿಸಿದ್ದಾರೆ. ನರ್ತನ್ ನಿರ್ದೇಶನ ಮಾಡಿದ್ದು,ರವಿ ಬಸ್ರೂರ್ ಸಂಗೀತ ಸಂಯೋಜಿಸಿದ್ದಾರೆ. ದೇವರಾಜ್, ಬಾಬು ಹಿರಣ್ಣಯ್ಯ, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು ತಾರಾಗಣದಲ್ಲಿದ್ದಾರೆ.