‘ಧೀರ ಭಗತ್ ರಾಯ್’ ಚಿತ್ರ ಡಿ.6ರಂದು ತೆರೆಗೆ

ಬಹುತೇಕ ಹೊಸಬರಿಂದಲೇ ಕೂಡಿರುವ ‘ಧೀರ ಭಗತ್ ರಾಯ್’ ಚಿತ್ರ ಡಿಸೆಂಬರ್‌ 6ರಂದು ತೆರೆಗೆ ಬರಲಿದೆ. ಕರ್ಣನ್ ಅವರ ಚೊಚ್ಚಲ ನಿರ್ದೇಶನದ ಚಿತ್ರವಿದು. 

‘ಪುಷ್ಪ–2 ಚಿತ್ರ ಬಿಡುಗಡೆ ದಿನವೇ ತೆರೆಗೆ ಬರುತ್ತಿದ್ದೇವೆ. ತೆಲುಗಿನ ‘ಬಾಹುಬಲಿ’ ಎದುರು ‘ರಂಗಿತರಂಗ’ ಚಿತ್ರ ತೆರೆ ಕಂಡು ಯಶಸ್ವಿಯಾಗಿತ್ತು. ಅದೇ ರೀತಿ ನಮ್ಮ ಚಿತ್ರವನ್ನು ಜನ ಗೆಲ್ಲಿಸುತ್ತಾರೆ ಎಂಬ ವಿಶ್ವಾಸವಿದೆ. ‘ಜೈಭೀಮ್’, ‘ವಿಸಾರಣೈ’ ಚಿತ್ರಗಳ ಛಾಯೆ ನಮ್ಮ ಚಿತ್ರದಲ್ಲಿದೆ ಎನ್ನುತ್ತಿದ್ದಾರೆ. ‘ಧೀರ ಭಗತ್ ರಾಯ್’ ಅಸಲಿ ಕಥೆಯೇನು?,‌ ‘ಕಾಟೇರ’ ಮುಂದುವರೆದ ಅಧ್ಯಾಯವಾ ಎಂಬುದಕ್ಕೆ ಚಿತ್ರಮಂದಿರದಲ್ಲಿಯೇ ಉತ್ತರ ಸಿಗಲಿದೆ’ ಎಂದರು ನಿರ್ದೇಶಕ ಕರ್ಣನ್‌. 

ಭೂ ಸುಧಾರಣೆ ಕಾಯ್ದೆ ಹಿನ್ನೆಲೆಯ ಕಥೆಯನ್ನು ಹೊಂದಿರುವ ಚಿತ್ರದಲ್ಲಿ ರಾಕೇಶ್ ದಳವಾಯಿಗೆ ಸುಚರಿತಾ ಜೋಡಿಯಾಗಿದ್ದಾರೆ. ಶರತ್ ಲೋಹಿತಾಶ್ವ, ನೀನಾಸಂ ಅಶ್ವಥ್ ಮುಂತಾದವರು ಚಿತ್ರದಲ್ಲಿದ್ದಾರೆ.

ವೈಟ್ ಲೋಟಸ್ ಎಂಟರ್‌ಟೈನ್‌ಮೆಂಟ್‌ ಮತ್ತು ಶ್ರೀ ಓಂ ಸಿನಿ ಎಂಟ್ರಟೈನರ್ಸ್ ಬ್ಯಾನರ್ ಅಡಿಯಲ್ಲಿ ಈ ಚಿತ್ರ ನಿರ್ಮಾಣವಾಗಿದೆ. ಪೂರ್ಣಚಂದ್ರ ತೇಜಸ್ವಿ ಸಂಗೀತ, ಸೆಲ್ಪಂ ಜಾನ್ ಛಾಯಾಚಿತ್ರಗ್ರಹಣ, ಎನ್.ಎಂ ವಿಶ್ವ ಸಂಕಲನವಿದೆ.