ಫೈಟರ್ ಫಸ್ಟ್‌ ಲುಕ್‌!
ಇತ್ತೀಚೆಗಷ್ಟೇ ‘ರಗಡ್‌’ ಚಿತ್ರಕ್ಕಾಗಿ ಏಯ್ಟ್‌ ಪ್ಯಾಕ್‌ ಮಾಡಿ ಹುರಿಗೊಂಡು ಸುದ್ದಿಯಾಗಿದ್ದ ವಿನೋದ್ ಪ್ರಭಾಕರ್, ಈಗ ಫೈಟ್ ಮಾಡೋಕೆ ಸಿದ್ಧರಾಗಿದ್ದಾರೆ. ಯಾರ ಜತೆಗೆ ಫೈಟ್? ಯಾಕಾಗಿ ಫೈಟ್? ಇವರು ಮಾಡುವುದೆಲ್ಲವೂ ಸಿನಿಮಾಕ್ಕಾಗಿ. ವಿನೋದ್ ಪ್ರಭಾಕರ್ ಅವರ ಹೊಸ ಸಿನಿಮಾ ‘ಫೈಟರ್’. ಈ ಚಿತ್ರದ ಫಸ್ಟ್‌ ಲುಕ್‌ ಅನ್ನು ಇತ್ತೀಚೆಗೆ ಚಿತ್ರತಂಡ ಬಿಡುಗಡೆ ಮಾಡಿದೆ. ಬುಡಬುಡಕೆಯವರ ಹಾಗೆ ದಿರಿಸು ತೊಟ್ಟು ಹುಕ್ಕಾ ಸೇದುತ್ತಿರುವ ಅವರ ಚಿತ್ರ ಮೊದಲ ನೋಟಕ್ಕೇ ಗಮನ ಸೆಳೆಯುವಂತಿದೆ. ಅವರ ಹರಿತ ನೋಟವೂ ನೋಡುಗರ ಎದೆಯಲ್ಲಿ ಚುಳುಕು ಹುಟ್ಟಿಸುವ ಹಾಗಿದೆ.
ಆಕಾಶ್‌ ಎಂಟರ್‌ಪ್ರೈಸರ್ ಲಾಂಛನದಲ್ಲಿ ಕೆ. ಸೋಮಶೇಖರ್ ಕಟ್ಟಿಗೇನಹಳ್ಳಿ ಅವರು ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ನೂತನ್ ಉಮೇಶ್ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಇದೇ ತಿಂಗಳ 5ರಂದು ‘ಫೈಟರ್’ ಚಿತ್ರದ ಮುಹೂರ್ತ ನಡೆಯಲಿದೆ. ರಾಕೇಶ್ ಛಾಯಾಗ್ರಹಣ, ಕೆ.ಎಂ. ಪ್ರಕಾಶ್‌ ಅವರ ಸಂಕಲನ ಈ ಚಿತ್ರಕ್ಕಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.