ತಾರೆಯರ ಚಿನ್ನದ ಮಾತು

ಚಿನ್ನ ಯಾರಿಗೆ ತಾನೇ ಇಷ್ಟ ಇಲ್ಲ ಹೇಳಿ. ಬಂಗಾರದ ಮೇಲೆ ಮಹಿಳೆಯರಿಗೆ ವ್ಯಾಮೋಹ ಜಾಸ್ತಿ. ಇದಕ್ಕೆ ಕನ್ನಡದ ನಟ, ನಟಿಯರೂ ಹೊರತಾಗಿಲ್ಲ. ಅಕ್ಷಯ ತೃತೀಯವನ್ನು ಗ್ರ್ಯಾಂಡ್ ಆಗಿ ಸೆಲೆಬ್ರೇಟ್ ಮಾಡದೇ ಇದ್ರೂ, ಚಿನ್ನ ಖರೀದಿ ಮಾಡ್ತಾರೆ. ಸ್ಯಾಂಡಲ್‌ವುಡ್‌ ತಾರೆಯರುಈ ಬಾರಿ ಏನು ಖರೀದಿ ಮಾಡಬೇಕು ಎಂದು ಪ್ಲ್ಯಾನ್‌ ಮಾಡಿದ್ದಾರೆ ಬನ್ನಿ ನೋಡೋಣ...

‘ನಂಬಿಕೆಯಲ್ಲ, ಉಳಿತಾಯ’
ಅಕ್ಷಯ ತೃತೀಯದ ದಿನ ಕೊನೇಪಕ್ಷ ಮೂಗುಬೊಟ್ಟಾದರೂ ಖರೀದಿ ಮಾಡುತ್ತೇನೆ. ಆ ದಿನ ಕೊಂಡರೆ ಒಳ್ಳೆಯದಾಗುತ್ತದೆ ಎನ್ನುವ ನಂಬಿಕೆಗಿಂತ ಉಳಿತಾಯ ಮಾಡಬಹುದು ಎಂಬ ನಂಬಿಕೆ ಇದೆ. ಆಭರಣಕ್ಕಿಂತ ಹೆಚ್ಚಾಗಿ ಚಿನ್ನದ ನಾಣ್ಯ ಕೊಂಡುಕೊಂಡು ಇಟ್ಟುಕೊಳ್ಳುವ ರೂಢಿ ಇದೆ. ಐದು ವರ್ಷದಿಂದ ಇದನ್ನು ತಪ್ಪದೇ ನಡೆಸಿಕೊಂಡು ಬಂದಿದ್ದೇನೆ.
-ಅನುಪಮಾ, ನಿರೂಪಕಿ, ನಟಿ

*
‘ಚಿನ್ನ ಮಾತ್ರ ಕೊಳ್ಳಬೇಕಿಲ್ಲ’
ಅಮ್ಮ ಪ್ರತಿ ವರ್ಷ ಏನಾದರೂ ಚಿನ್ನ ಕೊಳ್ಳುತ್ತಾರೆ. ಆದರೆ ನನಗೆ ಈ ದಿನ ಯಾವುದಾದರೂ ಕೆಲಸ ಆರಂಭಿಸಿದರೆ ಒಳ್ಳೆಯದಾಗುತ್ತದೆ ಎಂಬ ನಂಬಿಕೆ ಇದೆ. ಈ ದಿನ ಆರಂಭಿಸಿದ ಕೆಲಸ ಕೈಹಿಡಿಯುತ್ತದೆ. ಒಳ್ಳೆಯ ಕೆಲಸಗಳನ್ನು ಮಾಡಲು ನಾನು ಈ ದಿನ ಆಯ್ಕೆ ಮಾಡಿಕೊಳ್ಳುತ್ತೇನೆ.
- ರಿಷಿ, ನಟ

*
ಚಿನ್ನಕ್ಕೆ ಬೆಲೆ ಕಟ್ಟಲು ಸಾಧ್ಯವಿಲ್ಲ
ಪ್ರತಿ ವರ್ಷ ಒಂದು ಗ್ರಾಂ ಆದರೂ ಚಿನ್ನ ಕೊಳ್ಳುತ್ತೇನೆ. ಈ ದಿನ ಕೊಳ್ಳೋದು ನಂಬಿಕೆಯಿಂದ ಮಾತ್ರ ಅಲ್ಲ. ಏನಾದ್ರೂ ನೆಪ ಬೇಕಲ್ವಾ?. ಚಿನ್ನ ಯಾವ ದಿನ ತೊಗೊಂಡ್ರೂ ಒಳ್ಳೇದೆ. ಹೆಣ್ಣುಮಕ್ಕಳಿಗೆ ಕಷ್ಟಕ್ಕೆ ಆಗುವಂತದ್ದು. ವಜ್ರದ ಆಭರಣಗಳು ನನಗೆ ತುಂಬಾ ಇಷ್ಟ.
-ಹರ್ಷಿಕಾ ಪೂಣಚ್ಚ, ನಟಿ