160 ಭಾಷೆಗಳಲ್ಲಿ ಬರಲಿದೆ ಅವತಾರ್–2: ಬಿಡುಗಡೆ ದಿನಾಂಕ ಘೋಷಿಸಿದ ನಿರ್ದೇಶಕ
2009ರಲ್ಲಿ ತೆರೆಕಂಡು ಸಿನಿ ಜಗತ್ತಿನಲ್ಲಿ ಭಾರಿ ಸಂಚಲನ ಮೂಡಿಸಿದ್ದ ಹಾಲಿವುಡ್‌ ಸಿನಿಮಾ 'ಅವತಾರ್'ನ ಎರಡನೇ ಭಾಗಕ್ಕೆ 'ಅವತಾರ್: ದಿ ವೇ ಆಫ್‌ ವಾಟರ್‌' ಎಂದು ಹೆಸರಿಡಲಾಗಿದೆ. ಈ ಚಿತ್ರವನ್ನು 160 ಭಾಷೆಗಳಲ್ಲಿ ಇದೇ ವರ್ಷ (2022) ಡಿಸೆಂಬರ್‌ 16ರಂದು ಬಿಡುಗಡೆ ಮಾಡಲಾಗುವುದು ಎಂದು ನಿರ್ದೇಶಕ ಜೇಮ್ಸ್‌ ಕ್ಯಾಮೆರಾನ್‌ ತಿಳಿಸಿದ್ದಾರೆ.
ಜೇಮ್ಸ್‌ ಅವರು, ಚಿತ್ರಮಂದಿರಗಳ ಮಾಲೀಕರ ವಾರ್ಷಿಕ ಸಮಾವೇಶ 'ಸಿನೆಮಾಕಾನ್‌'ನಲ್ಲಿ ಭಾಗವಹಿಸಿ ಮಾತನಾಡಿದರು. ಲಾಸ್‌ ವೆಗಾಸ್‌ನಲ್ಲಿ ಏಪ್ರಿಲ್ 25 ಆರಂಭವಾಗಿರುವ ಈ ಸಮಾವೇಶವು ಇಂದು (ಏ.28) ಕೊನೆಗೊಳ್ಳಲಿದೆ.
2009ರಲ್ಲಿ ಬಿಡುಗಡೆಯಾದ ಅವತಾರ್, ಜಾಗತಿಕವಾಗಿ ಸಾರ್ವಕಾಲಿಕ ಹೆಚ್ಚು (ಅಂದಾಜು ₹ 21 ಸಾವಿರ ಕೋಟಿ) ಗಳಿಕೆ ಕಂಡ ಸಿನಿಮಾ ಎನಿಸಿದೆ. ಮಾತ್ರವಲ್ಲದೆ ₹ 20 ಸಾವಿರ ಕೋಟಿಗಿಂತ ಹೆಚ್ಚು ಗಳಿಕೆ ಕಂಡ ಮೊದಲ ಚಿತ್ರವೂ ಹೌದು.
'ಅವತಾರ್: ದಿ ವೇ ಆಫ್‌ ವಾಟರ್‌'ಗೆ ಜೇಮ್ಸ್‌ ಕ್ಯಾಮೆರಾನ್‌ ನಿರ್ದೇಶನವಿದೆ. ಜೇಮ್ಸ್‌ ಅವರೊಂದಿಗೆ ಜಾನ್‌ ಲ್ಯಾನ್‌ಡೌ ಬಂಡವಾಳ ಹೂಡಿದ್ದಾರೆ. ಸಿಗೌರ್ನಿ ವೀವರ್‌, ಸ್ಟೇಫನ್‌ ಲ್ಯಾಂಗ್‌, ಕ್ಲಿಫ್‌ ಕರ್ಟೀಸ್‌, ಜೋಲ್‌ ಡೇವಿಡ್‌ ಮೂರ್‌, ಸಿಸಿಎಚ್‌ ಪೌಂಡರ್‌, ಎಡೀ ಫಾಲ್ಕೊ ಮತ್ತಿತರರು ತೆರೆಮೇಲೆ ಕಾಣಿಸಿಕೊಳ್ಳಲಿದ್ದಾರೆ.
'ಅವತಾರ್' ಸರಣಿಯ ಒಟ್ಟು ಐದು ಸಿನಿಮಾಗಳು ತಯಾರಾಗಲಿವೆ.
ಇವನ್ನೂ ಓದಿ
*ದಕ್ಷಿಣ ಭಾರತದ ನಟರ ಬಗ್ಗೆ ಉತ್ತರದವರಿಗೆ ಅಸೂಯೆ, ಭಯ ಇದೆ: ರಾಮ್‌ ಗೋಪಾಲ್‌ ವರ್ಮಾ
*ಹಿಂದಿ ರಾಷ್ಟ್ರ ಭಾಷೆ ಅಲ್ಲ: ಕಿಚ್ಚ ಸುದೀಪ್ ಹೇಳಿಕೆಗೆ ಅಜಯ್ ದೇವಗನ್ ಕಿಡಿ
*ದಕ್ಷಿಣದ ಸಿನಿಮಾಗಳನ್ನು ಕಂಡು ಬಾಲಿವುಡ್‌ನವರು ಹೆದರಿದ್ದಾರೆ: ಮನೋಜ್ ಬಾಜಪೇಯಿ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.