ಬಹುನಿರೀಕ್ಷಿತ 'ನರಸಿಂಹ' ಚಿತ್ರದ ಪೋಸ್ಟರ್ ಬಿಡುಗಡೆಗೊಳಿಸಿದ ಹೊಂಬಾಳೆ ಫಿಲ್ಮ್ಸ್

ಬೆಂಗಳೂರು: ಹೊಸದೊಂದು ಪ್ರಯೋಗದೊಂದಿಗೆ ಫ್ಯಾಂಟಸಿ ಸಿನಿಮಾಕ್ಕೆ ಅಣಿಯಾಗಿರುವ ಹೊಂಬಾಳೆ ಫಿಲ್ಮ್ಸ್ ‘ಮಹಾವತಾರ್‌ ನರಸಿಂಹ’ ಸಿನಿಮಾದ ಫಸ್ಟ್ ಲುಕ್‌ ಬಿಡುಗಡೆಗೊಳಿಸಿದೆ. ಮಹಾವತಾರ್‌ ಸರಣಿಯ ಒಂದು ಭಾಗ ಇದಾಗಿದೆ.

ಈ ಕುರಿತು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಯೂಟ್ಯೂಬ್‌ ಲಿಂಕ್‌ನೊಂದಿಗೆ ಸಿನಿಮಾದ ಪೋಸ್ಟರ್‌ ಅನ್ನು ಹಂಚಿಕೊಂಡಿದೆ. ಹೊಂಬಾಳೆ ಫಿಲ್ಮ್ಸ್‌ ಪ್ರಸ್ತುತಪಡಿಸುತ್ತಿರುವ ಸಿನಿಮಾ ಇದಾಗಿದ್ದು, ಕ್ಲೀಮ್‌ ಪ್ರೊಡಕ್ಷನ್‌ ನಿರ್ಮಾಣ ಮಾಡಿದೆ.

'ನಂಬಿಕೆಗೆ ಸವಾಲು ಬಂದಾಗ ಅವನು ಕಾಣಿಸಿಕೊಳ್ಳುತ್ತಾನೆ. ಭಗವಾನ್ ವಿಷ್ಣುವಿನ ಅತ್ಯಂತ ಶಕ್ತಿಶಾಲಿ ಅವತಾರಗಳಲ್ಲಿ ನರಸಿಂಹವತಾರ ಒಂದಾಗಿದೆ. ಒಳ್ಳೆಯದು ಮತ್ತು ಕೆಟ್ಟದರ ನಡುವಿನ ಮಹಾಕಾವ್ಯದ ಯುದ್ಧವನ್ನು ಅನುಭವಿಸಿ. 3ಡಿಯಲ್ಲಿ ಸಿನಿಮಾ ನಿಮ್ಮ ಹತ್ತಿರದ ಚಿತ್ರಮಂದಿರಗಳಿಗೆ ಶೀಘ್ರದಲ್ಲೇ ಬರಲಿದೆ!’ ಎಂದು ನಿರ್ಮಾಣ ಸಂಸ್ಥೆ ಬರೆದುಕೊಂಡಿದೆ.

ಈ ಸಿನಿಮಾವನ್ನು ಅಶ್ವಿನ್‌ ಕುಮಾರ್‌ ನಿರ್ದೇಶಿಸಿದ್ದು, ಸ್ಕ್ರೀನ್‌ ಪ್ಲೇ ಕೂಡ ಬರೆದಿದ್ದಾರೆ. ಶಿಲ್ಪಾ ಧವನ್‌, ಚೈತನ್ಯ ದೇಸಾಯಿ ಮತ್ತು ಕುಶಾಲ್‌ ದೇಸಾಯಿ ಸಿನಿಮಾ ನಿರ್ಮಾಣ ಮಾಡಿದ್ದಾರೆ. ಕನ್ನಡ, ಹಿಂದಿ, ತಮಿಳು, ತೆಲುಗು ಮತ್ತು ಮಲಯಾಳಂ ಸೇರಿದಂತೆ ಒಟ್ಟು ಐದು ಭಾಷೆಗಳಲ್ಲಿ ಸಿನಿಮಾ ತೆರೆಕಾಣಲಿದೆ.