ಶುರುವಾದ ಇಂಡಿಯನ್–2 ಅಬ್ಬರ: ಶಂಕರ್ ನಿರ್ದೇಶನಕ್ಕೆ ಮಿಶ್ರ ಪ್ರತಿಕ್ರಿಯೆ

ನವದೆಹಲಿ: ಖ್ಯಾತ ನಿರ್ದೇಶಕ ಎಸ್. ಶಂಕರ್ ನಿರ್ದೇಶಿಸಿರುವ, ಕಮಲ್ ಹಾಸನ್ ಅಭಿನಯದ ಬಹು ನಿರೀಕ್ಷಿತ 'ಇಂಡಿಯನ್ 2' ಚಿತ್ರ ಇಂದು ಜಗತ್ತಿನಾದ್ಯಂತ ಬಿಡುಗಡೆಯಾಗಿದ್ದು ಸಿನಿಪ್ರಿಯರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಲೈಕಾ ಪ್ರೊಡಕ್ಷನ್ಸ್ ತನ್ನ ಅಧಿಕೃತ ಖಾತೆ 'ಎಕ್ಸ್'ನಲ್ಲಿ ಈ ಬಗ್ಗೆ ಮಾಹಿತಿ ಹಂಚಿಕೊಂಡಿದೆ. 'ಸೇನಾಪತಿಯ ಪುನರಾಗಮನವಾಗಿದೆ. 'ಇಂಡಿಯನ್ 2' ಚಿತ್ರಮಂದಿರಗಳಲ್ಲಿ ಬಿರುಗಾಳಿ ಎಬ್ಬಿಸಿದೆ' ಎಂದು ಬರೆದುಕೊಂಡಿದೆ.

'ಇಂಡಿಯನ್' ಚಿತ್ರ 1996ರಲ್ಲಿ ತೆರೆಕಂಡಿದ್ದ ‘ಇಂಡಿಯನ್’ನ ಮುಂದುವರಿದ ಭಾಗ. ಕಮಲ್ ಹಾಸನ್ ಅವರು ಸೇನಾಪತಿ ಪಾತ್ರದಲ್ಲಿ ಮಿಂಚಿದ್ದರು. ಅದು ಇಲ್ಲಿ ವಿಭಿನ್ನ ಅವತಾರದಲ್ಲಿ ಮುಂದುವರೆದಿದೆ. ನಟ ಸಿದ್ದಾರ್ಥ್ ಸಹ ಮುಖ್ಯಪಾತ್ರದಲ್ಲಿದ್ದು ಚಿತ್ರವು ಭ್ರಷ್ಟಾಚಾರದ ವಿರುದ್ಧದ ಹೋರಾಟದ ಕಥೆಯನ್ನು ಹೊಂದಿದೆ.

ಇನ್ನೊಂದೆಡೆ ಈ ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು ಕೆಲವರು ಹಳೆಯ ಸರಕು ಇಟ್ಟುಕೊಂಡು ಮೋಡಿ ಮಾಡುವಲ್ಲಿ ಶಂಕರ್ ವಿಫಲರಾಗಿದ್ದಾರೆ ಎಂದು ಆಕ್ಷೇಪಿಸಿದ್ದರೇ ಇನ್ನೂ ಕೆಲವರು ಕಮಲ್ ಹಾಸನ್ ಅಭಿಮಾನಿಗಳಿಗೆ ಇದು ಭರ್ಜರಿ ಉಡುಗೊರೆ ಎಂದು ಹೇಳಿದ್ದಾರೆ.

ಇನ್ನೊಂದೆಡೆ ವಯೋವೃದ್ಧನ ಪಾತ್ರದಲ್ಲಿನ ಕಮಲ್ ಹಾಸನ್ ಅವರ ಸಾಹಸ ದೃಶ್ಯಗಳ ತುಣಕುಗಳು, ಫೋಟೊಗಳು ಗಮನ ಸೆಳೆಯುತ್ತಿವೆ

ಚಿತ್ರದಲ್ಲಿ ಕಾಜಲ್ ಅಗರ್‌ವಾಲ್, ರಾಕುಲ್ ಪ್ರೀತ್ ಸಿಂಗ್, ಎಸ್‌.ಜೆ ಸೂರ್ಯ, ವಿವೇಕ್, ಬಾಬಿ ಸಿಂಹ, ನೆಡುಮುಡಿ ವೇಣು, ಪಿ ಸಮುದ್ರಕನಿ, ಪ್ರಿಯಾ ಭವಾನಿ ಶಂಕರ್, ಮನೋಬಾಲಾ, ಗುಲ್ಶನ್ ಗ್ರೋವರ್, ಪಿಯೂಷ್ ಮಿಶ್ರಾ ಮತ್ತು ಬ್ರಹ್ಮಾನಂದಂ ಬಣ್ಣ ಹಚ್ಚಿದ್ದಾರೆ.

ಚಿತ್ರಕ್ಕೆ ಅನಿರುದ್ಧ್ ರವಿಚಂದರ್ ಸಂಗೀತ, ರವಿವರ್ಮನ್ ಛಾಯಾಗ್ರಹಣವಿದೆ. ಲೈಕಾ ಪ್ರೊಡಕ್ಷನ್ಸ್ ಮತ್ತು ರೆಡ್ ಜೈಂಟ್ ಮೂವೀಸ್ ಬ್ಯಾನರ್ ಅಡಿ ಚಿತ್ರ ನಿರ್ಮಾಣವಾಗಿದೆ.