ಸಿಂಗಪುರ: ಆನ್‌ಲೈನ್‌ನಲ್ಲಿ ಬಿಡುಗಡೆಯಾಗಲಿದೆ ‘ಗುರುನಾನಕ್‌’ ಕಿರುಚಿತ್ರ
ಸಿಂಗಪುರ: ಸಿಂಗಪುರ್‌ನಲ್ಲಿ ನೆಲೆಸಿರುವ ಭಾರತೀಯ ಮೂಲದ ಸಿಖ್‌ ದಂಪತಿ, ಸಿಖ್‌ ಗುರು ಗುರುನಾನಕ್‌ ಅವರು ಭೇಟಿ ನೀಡಿದ್ದ ಸ್ಥಳಗಳ ಕುರಿತು ವಿವರಿಸುವ 24 ಕಂತುಗಳ ಕಿರುಚಿತ್ರವನ್ನು ಆನ್‌ಲೈನ್‌ನಲ್ಲಿ ಬಿಡುಗಡೆ ಮಾಡಲಿದ್ದಾರೆ.
TheGuruNanak.com ಜಾಲತಾಣದಲ್ಲಿ ತಾನು (ಅಮರ್‌ದೀಪ್‌ ಸಿಂಗ್‌) ಮತ್ತು ಪತ್ನಿ ವಿನಿಂದರ್‌ ಕೌರ್‌ ಯಾವುದೇ ಶುಲ್ಕ ವಿಧಿಸದೆ ವಾರದ ಸಂಚಿಕೆಗಳಾಗಿ ಕಿರುಚಿತ್ರವನ್ನು ಬಿಡುಗಡೆ ಮಾಡಲಿದ್ದೇವೆ. ಇದು ಡೌನ್‌ಲೋಡ್‌ಗೂ ಲಭ್ಯವಿರುತ್ತದೆ ಎಂದು ಸಿಂಗ್‌ ಶುಕ್ರವಾರ ಹೇಳಿದರು.
ಲಾಸ್ಟ್‌ ಹೆರಿಟೇಜ್‌ ಪ್ರೊಡಕ್ಷನ್ಸ್‌ ಮತ್ತು ಸಿಖ್‌ ಲೆನ್ಸ್‌ ಪ್ರೊಡಕ್ಷನ್ಸ್‌ ಸಂಸ್ಥೆಗಳು ನಿರ್ಮಿಸುತ್ತಿರುವ ಈ ಕಿರುಚಿತ್ರದ ಪಂಜಾಬ್‌ ಮತ್ತು ಹಿಂದಿ ಅವತರಣಿಕೆಗಳನ್ನು ಮುಂದಿನ ಹಂತದಲ್ಲಿ ಬಿಡುಗಡೆ ಮಾಡಲಾಗುವುದು ಎಂದೂ ಅವರು ಹೇಳಿದರು.
ಅನೇಕ ಭೌಗೋಳಿಕ ಸವಾಲುಗಳು ಚಿತ್ರೀಕರಣಕ್ಕೆ ಸವಾಲು ಒಡ್ಡಿದ್ದವು. ಗುರುನಾನಕ್‌ ಅವರು ಸಂಚರಿಸಿದ ಶೇ 70 ರಷ್ಟು ಪ್ರದೇಶಗಳು ಈಗ ಕಾಲಗರ್ಭದಲ್ಲಿ ಹುದುಗಿ ಹೋಗಿವೆ. ಕಷ್ಟಕರ ಪರಿಸ್ಥಿತಿಯಲ್ಲಿ ಸ್ಥಳಗಳನ್ನು ಪತ್ತೆಹಚ್ಚಿ ಚಿತ್ರತಂಡವು ಚಿತ್ರೀಕರಣ ಮುಗಿಸಿದೆ ಎಂದು ಮಾಹಿತಿ ನೀಡಿದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.